AVESTA: KHORDA AVESTA: 16. DEN YASHT

Based on edition of Karl F. Geldner, Avesta, the Sacred Books of the Parsis, Stuttgart, 1896.

0.: (pa nãm i ýazdã, hôrmezd i hvadâe i awazûnî gurz hvarahe awazâyât,
dîn i vahe i mazdayasnã bê rasât,
ezh hamâ gunâh ... pa patit hôm!)
xshnaothra ahurahe mazdå, tarôidîti angrahe mainyêush, haithyâvarshtãm hyat vasnâ ferashôtemem. staomî ashem,
ashem vohû...(3).
fravarâne mazdayasnô zarathushtrish vîdaêvô ahura-tkaêshô,

(Here recite the appropriate Gah dedication.)

razishtayå cistayå mazdadhâtayå ashaonyå
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!

1.: razishtãm cistãm mazdadhâtãm ashaonîm ýazamaide hupathmainyãm huaiwitacinãm nimarezishtãm barat-zaothrãm ashaonîm hunaravaitîm frasrûtãm âsu-kairyãm moshu-kairyãm hvâyaonãm hvâyaozdãm ýãm vanguhîm daênãm mâzdayasnîm.
2.: ýãm ýazata zarathushtrô, use-hishta haca gâtvô frashûsa haca demânât razishte ciste mazdadhâte ashaoni, ýezi ahi paurva-naêmât âat mãm avi nmânaya ýezi paskât âat mãm avi apaya.
3.: athanâ âxshta buyãn ýathanâ buyât hvâyaonånghô pañtânô hvâpathana garayô hvâtacina razura huperethwe âfsh nâuya ahmâi saokâi frasastâi fravâkâi uta framânâi.
4.: ahe raya hvarenanghaca
tãm ýazâi surunvata ýasna
tãm ýazâi huyashta ýasna razishtãm cistãm mazdadhâtãm ashaonîm zaothrâbyô, razishtãm cistãm mazdadhâtãm ashaonîm ýazamaide
haomayô gava baresmana hizvô danghangha mãthraca vacaca shyaothnaca zaothrâbyasca arshuxdhaêibyasca vâkhzhibyô.
ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide!

5.: razishtãm cistãm ... mâzdayasnîm, (Repeat verse 1.)
6.: ýãm ýazata zarathushtrô humatahe paiti mananghô hûxtahe paiti vacanghô hvarshtahe paiti shyaothnahe avaheca paiti ýãnahe,
7.: ýat hê dathat razishta cista mazdadhâta ashaoni pâdhave zâvare gaoshaêwe sraoma bâzuwe aojô tanvô vîspayå drvatâtem tanvô vîspayå vazdvare aomca sûkem ýim baraiti karô masyô upâpô ýô ranghayå dûraêpârayå jafrayå hazangrô- vîrayå varesô-stavanghem âpô urvaêsem mârayeiti.
ahe raya ... tåscâ ýazamaide! (Repeat verse 4.)

8.: razishtãm cistãm ... mâzdayasnîm, (Repeat verse 1.)
9.: ýãm ýazata zarathushtrô humatahe paiti mananghô hûxtahe paiti vacanghô hvarshtahe paiti shyaothnahe avaheca paiti ýãnahe,
10.: ýat hê dathat razishta cista mazdadhâta ashaoni pâdhave zâvare gaoshaêwe sraoma bâzuwe aojô tanvô vîspayå drvatâtem tanvô vîspayå vazdvare aomca sûkem ýim baraiti aspô arsha ýô tãthryascit haca xshafnô vâreñtyå snaêzhiñtyå srasciñtyå fyanghvaityå ýô naomyâcit haca xshathryât aspaêm varesem zemât avaoiritheñtem vaênaiti katârô akhravô vâ bunavô vâ.
ahe raya ... tåscâ ýazamaide! (Repeat verse 4.)

11.: razishtãm cistãm ... mâzdayasnîm, (Repeat verse 1.)
12.: ýãm ýazata zarathushtrô humatahe paiti mananghô hûxtahe paiti vacanghô hvarshtahe paiti shyaothnahe avaheca paiti ýãnahe,
13.: ýat hê dathat razishta cista mazdadhâta ashaoni pâdhave zâvare gaoshaêwe sraoma bâzuwe aojô tanvô vîspayå drvatâtem tanvô vîspayå vazdvare aomca sûkem ýim baraiti kahrkâsô zarenumainyush ýô naomyâcit haca danghaot mushti-masanghem xrûm aiwi-vaênaiti avavatcit ýatha sûkayå brâzayå brâzem avavatcit ýatha sûkayå naêzem.
ahe raya ... tåscâ ýazamaide! (Repeat verse 4.)

14.: razishtãm cistãm ... mâzdayasnîm, (Repeat verse 1.)
15.: ýãm ýazata hvôvi ashaoni vîthushi vohu bakhem isemna ashavanem zarathushtrem anumatêe daênayâi anuxtêe daênayâi anvarshtêe daênayâi.
ahe raya ... tåscâ ýazamaide! (Repeat verse 4.)

16.: razishtãm cistãm ... mâzdayasnîm, (Repeat verse 1.)
17.: ýãm ýazata âthrava dûraêfrakâtô maremnem isemnô daênayâi amem isemnô tanuye.
ahe raya ... tåscâ ýazamaide! (Repeat verse 4.)

18.: razishtãm cistãm ... mâzdayasnîm, (Repeat verse 1.)
19.: ýãm ýazata sâsta danghêush danghupaitish âxshti isemnô danghave amem isemnô tanuye.
ahe raya ... tåscâ ýazamaide! (Repeat verse 4.)
(Recite silently:)
20.: (hôrmezd i hvadâe i awazûnî mardum mardum sardagã hamâ sardagã ham bâ ýasht i vahã vaem vahe dîn i mâzdayasnã âgâhî âstvãnî nêkî rasãnât êduñ bât,)
(Recite aloud:): ýathâ ahû vairyô...(2).
ýasnemca vahmemca aojasca zavareca âfrînâmi
razishtayå cistayå mazdadhâtayå ashaonyå.
ashem vohû....
: ahmâi raêshca ... hazangrem ... jasa-mê ... (kerba mazhd) ... ashem vohû...!!