AVESTA: YASNA (Sacred Liturgy)

Based on edition of Karl F. Geldner, Avesta, the Sacred Books of the Parsis, Stuttgart, 1896.

0. Introduction

(pa nãm i ýazdã)

1: ashem vohû...(1 u 3). fravarâne mazdayasnô zarathushtrish vîdaêvô ahura-tkaêshô, hâvanêe ashaone ashahe rathwe ýasnâica vahmâica xshnaothrâica frasastayaêca, sâvanghêe vîsyâica ashaone ashahe rathwe ýasnâica vahmâica xshnaothrâica frasastayaêca.
2: âthrô ahurahe mazdå puthrahe tava âtarsh puthra ahurahe mazdå xshnaothra ýasnâica vahmâica xshnaothrâica frasastayaêca.
3: ýathâ ahû vairyô zaotâ frâ-mê mrûtê, athâ ratush ashâtcît haca frâ ashava vîdhvå mraotû.
: ashem vohû...(3). ýathâ ahû vairyô...(2).
4: frastuyê humatôibyascâ hûxtôibyascâ hvarshtôibyascâ mãthwôibyascâ vaxedhwôibyascâ varshtvôibyascâ, aibigairyâ daithê vîspâ humatâcâ hûxtâcâ hvarshtâcâ, paitiricyâ daithê vîspâ dushmatâcâ duzhûxtâcâ duzhvarshtâcâ.
5: ferâ vê râhî ameshâ speñtâ ýasnemcâ vahmemcâ ferâ mananghâ ferâ vacanghâ ferâ shyaothanâ ferâ anghuyâ ferâ tanvascît hvah'yå ushtanem.
6: staomî ashem, ashem vohû vahishtem astî ushtâ astî ushtâ ahmâi hyat ashâi vahishtâi ashem(3)!
7: fravarâne mazdayasnô zarathushtrish vîdaêvô ahura-tkaêshô, hâvanêe ashaone ashahe rathwe ýasnâica vahmâica xshnaothrâica frasastayaêca, sâvanghêe vîsyâica ashaone ashahe rathwe ýasnâica vahmâica xshnaothrâica frasastayaêca, rathwãm ayaranãmca asnyanãmca mâhyanãmca ýâiryanãmca saredhanãmca ýasnâica vahmâica xshnaothrâica frasastayaêca.
8: ahurahe mazdå raêvatô hvarenanguhatô ameshanãm speñtanãm mithrahe vouru-gaoyaotôish râmanasca hvâstrahe,
9: hvarexshaêtahe ameshahe raêvahe aurvat-aspahe, vayaosh uparô-kairyehe taradhâtô anyâish dâmãn, aêtat tê vayô ýat tê asti speñtô- mainyaom, razishtayå cistayå mazdadhâtayå ashaonyå daênayå vanghuyå mâzdayasnôish,
10: mãthrahe speñtahe ashaonô verezyanguhahe dâtahe vîdaêvahe dâtahe zarathushtrôish darekhayå upayanayå daênayå vanghuyå mâzdayasnôish zarazdâtôish mãthrahe speñtahe, ushi-darethrem daênayå mâzdayasnôish vaêdhîm mãthrahe speñtahe, âsnahe xrathwô mazdadhâtahe gaoshô-srûtahe xrathwô mazdadhâtahe,
11: âthrô ahurahe mazdå puthrahe tava âtarsh puthra ahurahe mazdå mat vîspaêibyô âterebyô, garôish ushi-darenahe mazdadhâtahe ashahvâthrahe,
12: vîspaêshãm ýazatanãm ashaonãm mainyavanãm gaêthyanãm, ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm xshnaothra ýasnâica vahmâica xshnaothrâica frasastayaêca!
13: (zôt,)
ýathâ ahû vairyô zaotâ frâ-mê mrûtê,
(râspî,)
ýathâ ahû vairyô ýô zaotâ frâ-mê mrûtê, (zôt,)
athâ ratush ashâtcît haca frâ ashava vîdhvå mraotû. ashem vohû...(3).
14: xshnaothra ahurahe mazdå tarôidîte angrahe mainyêush, haithyâvarshtãm hyat vasnâ ferashôtemem. ashem vohû...(3)!
15: ýathâ ahû vairyô athâ ratush ashâtcît hacâ
vanghêush dazdâ mananghô shyaothananãm anghêush mazdâi
xshathremcâ ahurâi â ýim drigubyô dadat vâstârem(4)!!

YASNA - Chapter 1.

(zôt u râspî,)
1: nivaêdhayemi hañkârayemi dathushô ahurahe mazdå raêvatô hvarenanguhatô mazishtaheca vahishtaheca sraêshtaheca xraozhdishtaheca xrathwishtaheca hukereptemaheca ashât apanôtemaheca hudhâmanô vouru-rafnanghô ýô nô dadha ýô tatasha ýô tuthruyê ýô mainyush speñtôtemô.
2: nivaêdhayemi hañkârayemi vanghave mananghe ashâi vahishtâi xshathrâi vairyâi speñtayâi ârmatêe haurvatbya ameretatbya gêush tashne gêush urune âthre ahurahe mazdå ýaêtushtemâi ameshanãm speñtanãm!
3: nivaêdhayemi hañkârayemi asnyaêibyô ashahe ratubyô, hâvanêe ashaone ashahe rathwe, nivaêdhayemi hañkârayemi sâvanghêe vîsyâica ashaone ashahe rathwe, nivaêdhayemi hañkârayemi mithrahe vouru-gaoyaotôish hazangrô-gaoshahe baêvare-cashmanô aoxtô-nâmanô ýazatahe râmanô hvâstrahe!
4: (zôt,) nivaêdhayemi hañkârayemi rapithwinâi ashaone ashahe rathwe, nivaêdhayemi hañkârayemi frâdat-fshave zañtumâica ashaone ashahe rathwe, nivaêdhayemi hañkârayemi ashahe vahishtahe âthrasca ahurahe mazdå.
5: nivaêdhayemi hañkârayemi uzayeirinâi ashaone ashahe rathwe, nivaêdhayemi hañkârayemi frâdat-vîrâi dâh'yumâica ashaone ashahe rathwe, nivaêdhayemi hañkârayemi berezatô ahurahe nafedhrô apãm apasca mazdadhâtayå.
6: nivaêdhayemi hañkârayemi aiwisrûthrimâi aibigayâi ashaone ashahe rathwe, nivaêdhayemi hañkârayemi frâdat-vîspãm- hujyâtêe zarathushtrôtemâica ashaone ashahe rathwe, nivaêdhayemi hañkârayemi ashâunãm fravashinãm khenãnãmca vîrô-vãthwanãm ýâiryayåsca hushitôish, amaheca hutâshtahe huraodhahe verethrakhnaheca ahuradhâtahe vanaiñtyåsca uparatâtô.
7: nivaêdhayemi hañkârayemi ushahinâi ashaone ashahe rathwe, nivaêdhayemi hañkârayemi berejyâi nmânyâica ashaone ashahe rathwe, nivaêdhayemi hañkârayemi sraoshahe ashyehe ashivatô verethrâjanô frâdat-gaêthahe, rashnaosh razishtahe arshtâtasca frâdat-gaêthayå varedat-gaêthayå!
8: nivaêdhayemi hañkârayemi mâhyaêibyô ashahe ratubyô, añtaremånghâi ashaone ashahe rathwe, nivaêdhayemi hañkârayemi perenô-månghâi vîshaptathâica ashaone ashahe rathwe!
9: nivaêdhayemi hañkârayemi ýâiryaêibyô ashahe ratubyô, maidhyôizaremayâi ashaone ashahe rathwe, nivaêdhayemi hañkârayemi maidhyôishemâi ashaone ashahe rathwe, nivaêdhayemi hañkârayemi paitishhahyâi ashaone ashahe rathwe, nivaêdhayemi hañkârayemi ayâthrimâi fraourvaêshtrimâi varshniharshtâica ashaone ashahe rathwe, nivaêdhayemi hañkârayemi maidhyâiryâi ashaone ashahe rathwe, nivaêdhayemi hañkârayemi hamaspathmaêdayâi ashaone ashahe rathwe, nivaêdhayemi hañkârayemi saredhaêibyô ashahe ratubyô.
10: nivaêdhayemi hañkârayemi vîspaêibyô aêibyô ratubyô ýôi heñti ashahe ratavô thrayasca thrisãsca nazdishta pairishhâvanayô ýôi heñti ashahe ýat vahishtahe mazdô-frasâsta zarathushtrô- fraoxta!
11: nivaêdhayemi hañkârayemi ahuraêibya mithraêibya berezañbya aithyajanghaêibya ashavanaêibya stârãmca speñtô-mainyavanãm dâmanãm tishtryeheca stârô raêvatô hvarenanguhatô månghaheca gaocithrahe hvareca xshaêtahe aurvat-aspahe dôithrahe ahurahe mazdå mithrahe dâh'yunãm dainghupatôish, nivaêdhayemi hañkârayemi (...rôz...) ahurahe mazdå raêvatô hvarenanguhatô, nivaêdhayemi hañkârayemi ( ...mâh...) ashâunãm fravashinãm!
12: nivaêdhayemi hañkârayemi tava âthrô ahurahe mazdå puthra mat vîspaêibyô âterebyô, nivaêdhayemi hañkârayemi aiwyô vanguhibyô vîspanãmca apãm mazdadhâtanãm vîspanãmca urvaranãm mazdadhâtanãm!
13: nivaêdhayemi hañkârayemi mãthrahe speñtahe ashaonô verezyanguhahe dâtahe vîdaêvahe dâtahe zarathushtrôish darekhayå upayanayå daênayå vanghuyå mâzdayasnôish.
14: nivaêdhayemi hañkârayemi garôish ushidarenahe mazdadhâtahe ashahvâthrahe vîspaêshãmca gairinãm ashahvâthranãm pouru-hvâthranãm mazdadhâtanãm kâvayeheca hvarenanghô mazdadhâtahe ahvaretaheca hvarenanghô mazdadhâtahe, nivaêdhayemi hañkârayemi ashôish vanghuyå cistôish vanghuyå erethê vanghuyå rasãstâtô vanghuyå hvarenanghô savanghô mazdadhâtahe.
15: nivaêdhayemi hañkârayemi dahmayå vanghuyå âfritôish dahmaheca narsh ashaonô ukhraheca taxmahe dâmôish upamanahe ýazatahe!
16: nivaêdhayemi hañkârayemi ånghãm asanghãmca shôithranãmca gaoyaoitinãmca maêthananãmca avô- hvarenanãmca apãmca zemãmca urvaranãmca ainghåsca zemô avaingheca ashnô vâtaheca ashaonô strãm månghô hûrô anakhranãm raocanghãm hvadhâtanãm vîspanãmca speñtahe mainyêush dâmanãm ashaonãm ashaoninãmca ashahe rathwãm.
17: nivaêdhayemi hañkârayemi rathwô berezatô ýô ashahe, rathwãm ayaranãmca asnyanãmca mâhyanãmca ýâiryanãmca saredhanãmca ýôi heñti ashahe ratavô, hâvanôish rathwô!
18: nivaêdhayemi hañkârayemi ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm havahe urunô fravashêe.
19: nivaêdhayemi hañkârayemi vîspaêibyô ashahe ratubyô, nivaêdhayemi hañkârayemi vîspaêibyô vanghudhâbyô ýazataêibyô mainyaoibyascâ gaêthyaêibyascâ ýôi heñti ýasnyâca vahmyâca ashât haca ýat vahishtât!
20: havane ashâum ashahe ratvô savanghe ashâum ashahe ratvô rapithwina ashâum ashahe ratvô uzayeirina ashâum ashahe ratvô aiwisrûthrima aibigaya ashâum ashahe ratvô ushahina ashâum ashahe ratvô.
21: ýezi thwâ didvaêsha ýezi manangha ýezi vacangha ýezi shyaothna ýezi zaosha ýezi azaosha, â-tê ainghe fraca stuyê nî-tê vaêdhayemi ýezi tê ainghe avâ-urûraodha ýat ýasnaheca vahmaheca.
22: ratavô vîspe mazishta ashâum ashahe ratavô ýezi vô didvaêsha ýezi manangha ýezi vacangha ýezi shyaothna ýezi zaosha ýezi azaosha, â-vô ainghe fraca stuyê nî-vô vaêdhayemi ýezi vô ainghe avâ-urûraodha ýat ýasnaheca vahmaheca!
(zôt u râspî,)
23: fravarâne mazdayasnô zarathushtrish vîdaêvô ahura-tkaêshô hâvanêe ashaone ashahe rathwe ýasnâica vahmâica xshnaothrâica frasastayaêca, sâvanghêe vîsyâica ashaone ashahe rathwe ýasnâica vahmâica xshnaothrâica frasastayaêca, rathwãm ayaranãmca asnyanãmca mâhyanãmca ýâiryanãmca saredhanãmca ýasnâica vahmâica xshnaothrâica (râspî,) frasastayaêca!!

YASNA - Chapter 2.

(zôt u râspî,)
1: zaothra âyese ýeshti baresma âyese ýeshti, baresma âyese ýeshti zaothra âyese ýeshti, zaothra hadha-baresma âyese ýeshti baresma hadha-zaothra âyese ýeshti, ahmya zaothre imat baresma âyese ýeshti, ana baresmana imãm zaothrãm âyese ýeshti, hadha-zaothrem imat baresma âyese ýeshti, imat baresma (zôt,) hadha-zaothrem hadha-aiwyånghanem ashaya frastaretem âyese ýeshti!
2: ahmya zaothre baresmanaêca ahurem mazdãm ashavanem ashahe ratûm âyese ýeshti, ameshâ speñtâ huxshathrâ hudhånghô âyese ýeshti!
3: ahmya zaothre baresmanaêca asnya ashavana ashahe ratavô âyese ýeshti, hâvanîm ashavanem ashahe ratûm âyese ýeshti, sâvanghaêm vîsîmca ashavanem ashahe ratûm âyese ýeshti, ahmya zaothre baresmanaêca mithrem vouru-gaoyaoitîm hazangra- gaoshem baêvare-cashmanem aoxtô-nâmanem ýazatem âyese ýeshti, râma hvâstrem âyese ýeshti.
4: ahmya zaothre baresmanaêca rapithwinem ashavanem ashahe ratûm âyese ýeshti, frâdat-fshâum zañtumemca ashavanem ashahe ratûm âyese ýeshti, ahmya zaothre baresmanaêca ashem vahishtem âtremca ahurahe mazdå puthrem âyese ýeshti.
5: ahmya zaothre baresmanaêca uzayeirinem ashavanem ashahe ratûm âyese ýeshti, frâdat-vîrem dâh'yumemca ashavanem ashahe ratûm âyese ýeshti, ahmya zaothre baresmanaêca berezañtem ahurem xshathrîm xshaêtem apãm napâtem aurvat-aspem âyese ýeshti, apemca mazdadhâtãm ashaonîm âyese ýeshti.
6: ahmya zaothre baresmanaêca aiwisrûthrimem aibigâim ashavanem ashahe ratûm âyese ýeshti, frâdat-vîspãm-hujyâitîm zarathushtrôtememca ashavanem ashahe ratûm âyese ýeshti, ahmya zaothre baresmanaêca ashâunãm vanguhîsh sûrå speñtå fravashayô âyese ýeshti, khnåsca vîrô-vãthwå âyese ýeshti, ýâiryãmca hushitîm âyese ýeshti, amemca hutashtem huraodhem âyese ýeshti, verethrakhnemca ahuradhâtem âyese ýeshti, vanaiñtîmca uparatâtem âyese ýeshti.
7: ahmya zaothre baresmanaêca ushahinem ashavanem ashahe ratûm âyese ýeshti, berejîm nmânîmca ashavanem ashahe ratûm âyese ýeshti, ahmya zaothre baresmanaêca sraoshem ashîm huraodhem verethrâjanem frâdat-gaêthem ashavanem ashahe ratûm âyese ýeshti,
rashnûm razishtem âyese ýeshti, arshtâtemca frâdat-gaêthãm varedat- gaêthãm âyese ýeshti!
8: ahmya zaothre baresmanaêca mâhya ashavana ashahe ratavô âyese ýeshti, añtaremånghem ashavanem ashahe ratûm âyese ýeshti, perenô-månghem vîshaptathem ashavanem ashahe ratûm âyese ýeshti!
9: ahmya zaothre baresmanaêca ýâirya ashavana ashahe ratavô âyese ýeshti,
maidhyôizaremaêm ashavanem ashahe ratûm âyese ýeshti,
ahmya zaothre baresmanaêca maidhyôishemem ashavanem ashahe ratûm âyese ýeshti,
ahmya zaothre baresmanaêca paitishhahîm ashavanem ashahe ratûm âyese ýeshti,
ahmya zaothre baresmanaêca ayâthrimem fraourvaêshtrimem varshniharshtem ashavanem ashahe ratûm âyese ýeshti, ahmya zaothre baresmanaêca maidhyâirîm ashavanem ashahe ratûm âyese ýeshti,
ahmya zaothre baresmanaêca hamaspathmaêdaêm ashavanem ashahe ratûm âyese ýeshti,
ahmya zaothre baresmanaêca saredha ashavana ashahe ratavô âyese ýeshti.
10: ahmya zaothre baresmanaêca vîspe ashahe ratavô âyese ýeshti
ýôi heñti ashahe ratavô thrayasca thrisãsca nazdishta pairishhâvanayô ýôi heñti ashahe ýat vahishtahe mazdô- frasâsta zarathushtrô-fraoxta!
11: ahmya zaothre baresmanaêca ahura mithra berezañta aithyajangha ashavana âyese ýeshti, strêushca månghemca hvareca urvarâhu paiti baresmanyâhu mithrem vîspanãm dah'yunãm dainghupaitîm âyese ýeshti, ahmya zaothre baresmanaêca (...rôz...) ahurem mazdãm raêvañtem hvarenanguhañtem âyese ýeshti, ahmya zaothre baresmanaêca (...mâh...) ashâunãm vanguhîsh sûrå speñtå fravashayô âyese ýeshti!
12: ahmya zaothre baresmanaêca thwãm âtrem ahurahe mazdå puthrem ashavanem ashahe ratûm âyese ýeshti mat vîspaêibyô âterebyô, ahmya zaothre baresmanaêca âpô vanguhîsh vahishtå mazdadhâtå ashaonîsh âyese ýeshti, vîspå âpô mazdadhâtå ashaonîsh âyese ýeshti, vîspå urvarå mazdadhâtå ashaonîsh âyese ýeshti!
13: ahmya zaothre baresmanaêca mãthrem speñtem ashhvarenanghem âyese ýeshti, dâtem vîdôyûm âyese ýeshti, dâtem zarathushtri âyese ýeshti, darekhãm upayanãm âyese ýeshti, daênãm vanguhîm mâzdayasnîm âyese ýeshti.
14: ahmya zaothre baresmanaêca gairîm ushidarenem mazdadhâtem ashahvâthrem ýazatem âyese ýeshti, vîspå garayô ashahvâthrå pouru- hvâthrå mazdadhâta ashavana ashahe ratavô âyese ýeshti, ukhrem kavaêm hvarenô mazdadhâtem âyese ýeshti, ukhrem ahvaretem hvarenô mazdadhâtem âyese ýeshti, ahmya zaothre baresmanaêca ashîm vanguhîm âyese ýeshti, xshôithnîm berezaitîm amavaitîm huraodhãm hvâparãm, hvarenô mazdadhâtem âyese ýeshti, savô mazdadhâtem âyese ýeshti.
15: ahmya zaothre baresmanaêca dahmãm vanguhîm âfritîm âyese ýeshti, dahmemca narem ashavanem âyese ýeshti, ukhrem taxmem dâmôish upamanem ýazatem âyese ýeshti.
16: ahmya zaothre baresmanaêca imå apasca zemasca urvaråsca âyese ýeshti, imå asåsca shôithråsca gaoyaoitîshca maêthanyåsca avô-hvarenåsca âyese ýeshti, imemca shôithrahe paitîm âyese ýeshti ýim ahurem mazdãm!
17: ahmya zaothre baresmanaêca ratavô vîspe mazishta âyese ýeshti ayara asnya mâhya ýâirya saredha, ahmya zaothre baresmanaêca ashâunãm vanguhîsh sûrå speñtå fravashayô âyese ýeshti.
18: ahmya zaothre baresmanaêca vîspe ashavanô ýazata âyese ýeshti, vîspe ashahe ratavô âyese ýeshti, hâvanîm paiti ratûm sâvanghaêm vîsîmca paiti ratûm, ratavô vîspe mazishta paiti ratûm!!

YASNA - Chapter 3.

1: baresmana paiti-bereta hadha-zaothra hâvanôish rathwô hvarethem myazdem âyese ýeshti haurvata ameretâta gâush hudå xshnûmaine ahurahe mazdå ameshanãm speñtanãm xshnûmaine sraoshahe ashyehe ashivatô verethrâjanô frâdat-gaêthahe.
2: haomemca para-haomemca âyese ýeshti xshnûmaine zarathushtrahe spitâmahe ashaonô fravashêe, aêsmã âyese ýeshti baoidhi xshnûmaine tava âthrô ahurahe mazdå puthra.
3: haomã âyese ýeshti xshnûmaine aiwyô vanguhibyô apãm vanguhînãm mazdadhâtanãm, âpem haomyãm âyese ýeshti, gãm jîvyãm âyese ýeshti, urvarãm hadhânaêpatãm ashaya uzdâtãm âyese ýeshti, xshnûmaine apãm mazdadhâtanãm.
4: imat baresma hadha-zaothrem hadha-aiwyånghanem ashaya frastaretem âyese ýeshti xshnûmaine ameshanãm speñtanãm, vâca humata hûxta hvarshta âyese ýeshti, gâthanãmca sraothrem âyese ýeshti, hvarshtå mãthrå âyese ýeshti, imãm anghuyãmca ashayãmca rathwãmca ratufritîmca âyese ýeshti xshnûmaine ýazatanãm ashaonãm mainyavanãm gaêthyanãm xshnûmaine havaheca urunô!
5: âyese ýeshti asnyaêibyô ashahe ratubyô, hâvanêe ashaone ashahe rathwe, âyese ýeshti sâvanghêe vîsyâica ashaone ashahe rathwe âyese ýeshti mithrahe vouru-gaoyaotôish hazangrô-gaoshahe baêvare- cashmanô aoxtô-nâmanô ýazatahe râmanô hvâstrahe.
6: âyese ýeshti rapithwinâi ashaone ashahe rathwe, âyese ýeshti frâdat-fshave zañtumâica ashaone ashahe rathwe, âyese ýeshti ashahe vahishtahe âthrasca ahurahe mazdå.
7: âyese ýeshti uzayeirinâi ashaone ashahe rathwe, âyese ýeshti frâdat-vîrâi dâh'yumâica ashaone ashahe rathwe, âyese ýeshti berezatô ahurahe nafedhrô apãm apasca mazdadhâtayå.
8: âyese ýeshti aiwisrûthrimâi aibigayâi ashaone ashahe rathwe, âyese ýeshti frâdat-vîspãm-hujyâtêe zarathushtrôtemâica ashaone ashahe rathwe, âyese ýeshti ashâunãm fravashinãm khenãnãmca vîrô-vãthwanãm ýâiryayåsca hushitôish amaheca hutâshtahe huraodhahe verethrakhnaheca ahuradhâtahe vanaiñtyåsca uparatâtô.
9: âyese ýeshti ushahinâi ashaone ashahe rathwe, âyese ýeshti berejyâi nmânyâica ashaone ashahe rathwe, âyese ýeshti sraoshahe ashyehe ashivatô verethrâjanô frâdat-gaêthahe rashnaosh razishtahe arshtâtasca frâdat-gaêthayå varedat-gaêthayå!
10: âyese ýeshti mâhyaêibyô ashahe ratubyô, añtaremånghâi ashaone ashahe rathwe, âyese ýeshti perenô-månghâi vîshaptathâica ashaone ashahe rathwe!
11: âyese ýeshti ýâiryaêibyô ashahe ratubyô, maidhyôizaremayâi ashaone ashahe rathwe, âyese ýeshti maidhyôishemâi ashaone ashahe rathwe, âyese ýeshti paitishhahyâi ashaone ashahe rathwe, âyese ýeshti ayâthrimâi fraourvaêshtrimâi varshniharshtâica ashaone ashahe rathwe, âyese ýeshti maidhyâiryâi ashaone ashahe rathwe, âyese ýeshti hamaspathmaêdayâi ashaone ashahe rathwe, âyese ýeshti saredhaêibyô ashahe ratubyô.
12: âyese ýeshti vîspaêibyô aêibyô ratubyô ýôi heñti ashahe ratavô thrayasca thrisãsca nazdishta pairishhâvanayô ýôi heñti ashahe ýat vahishtahe mazdô-frasâsta zarathushtrô-fraoxta!
13: âyese ýeshti ahuraêibya mithraêibya berezañbya aithyajanghaêibya ashavanaêibya stârãmca speñtô- mainyavanãm dâmanãm tishtryeheca stârô raêvatô hvarenanguhatô månghaheca gaocithrahe hvareca xshaêtahe aurvat-aspahe dôithrahe ahurahe mazdå mithrahe dah'yunãm dainghupatôish, âyese ýeshti (...rôz...) ahurahe mazdå raêvatô hvarenanguhatô, âyese ýeshti (...mâh...) ashâunãm fravashinãm!
14: âyese ýeshti tava âthrô ahurahe mazdå puthra mat vîspaêibyô âterebyô, âyese ýeshti aiwyô vanguhibyô vîspanãmca apãm mazdadhâtanãm vîspanãmca urvaranãm mazdadhâtanãm!
15: âyese ýeshti mãthrahe speñtahe ashaonô verezyanguhahe dâtahe vîdaêvahe dâtahe zarathushtrôish darekhayå upayanayå daênayå vanghuyå mâzdayasnôish.
16: âyese ýeshti garôish ushidarenahe mazdadhâtahe ashahvâthrahe vîspaêshãmca gairinãm ashahvâthranãm pouru-hvâthranãm mazdadhâtanãm kâvayeheca hvarenanghô mazdadhâtahe ahvaretaheca hvarenanghô mazdadhâtahe, âyese ýeshti ashôish vanghuyå cistôish vanghuyå erethê vanghuyå rasãstâtô vanghuyå hvarenanghô savanghô mazdadhâtahe.
17: âyese ýeshti dahmayå vanghuyå âfritôish dahmaheca narsh ashaonô ukhraheca taxmahe dâmôish upamanahe ýazatahe!
18: âyese ýeshti ånghãm asanghãmca shôithranãmca gaoyaoitinãmca maêthananãmca avô-hvarenanãmca apãmca zemãmca urvaranãmca ainghåsca zemô avaingheca ashnô vâtaheca ashaonô strãm månghô hûrô anakhranãm raocanghãm hvadhâtanãm vîspanãmca speñtahe mainyêush dâmanãm ashaonãm ashaoninãmca ashahe rathwãm.
19: âyese ýeshti rathwô berezatô ýô ashahe, rathwãm ayaranãmca asnyanãmca mâhyanãmca ýâiryanãmca saredhanãmca ýôi heñti ashahe ratavô, hâvanôish rathwô!
(zôt u râspî)
20: hvarethem myazdem âyese ýeshti haurvata ameretâta gâush hudå xshnûmaine sraoshahe ashyehe taxmahe tanumãthrahe darshi- draosh âhûiryehe aoxtô-nâmanô ýazatahe.
21: haomemca para-haomemca âyese ýeshti xshnûmaine zarathushtrahe spitâmahe ashaonô fravashêe aoxtô-nâmanô ýazatahe, aêsmã âyese ýeshti baoidhi xshnûmaine tava âthrô ahurahe mazdå puthra aoxtô-nâmanô ýazatahe. (hvarethem > ýazatahe (2).)
22: âyese ýeshti ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm.
23: âyese ýeshti vîspaêibyô ashahe ratubyô, âyese ýeshti vîspaêibyô vanghudhâbyô ýazataêibyô mainyaoibyascâ gaêthyaêibyascâ ýôi heñti ýasnyâca vahmyâca ashât haca ýat vahishtât!
24: fravarâne mazdayasnô zarathushtrish vîdaêvô ahura-tkaêshô, hâvanêe ashaone ashahe rathwe ýasnâica vahmâica xshnaothrâica frasastayaêca, sâvanghêe vîsyâica ashaone ashahe rathwe ýasnâica vahmâica xshnaothrâica frasastayaêca, rathwãm ayaranãmca asnyanãmca mâhyanãmca ýâiryanãmca saredhanãmca ýasnâica vahmâica xshnaothrâica (râspî,) frasastayaêca.
25: (zôt,) ýathâ ahû vairyô zaotâ frâ-mê mrûtê, (râspî,) ýathâ ahû vairyô ýô zaotâ frâ-mê mrûtê, (zôt,) athâ ratush ashâtcît haca frâ ashava vîdhvå mraotû!!

YASNA - Chapter 4.

(zôt u râspî,)
1: ima humatâca hûxtâca hvarshtâca (zôt,) imã haomãsca myazdãsca zaothråsca baresmaca ashaya frastaretem gãmca hudhånghem haurvata ameretâta gãmca hudhånghem haomemca para-haomemca aêsmãsca baoidhîmca imãm anghuyãmca ashayãmca rathwãmca ratufritîmca gâthanãmca sraothrem hvarshtå mãthrå pairica dademahî âca vaêdhayamahî.
2: âat dîsh âvaêdhayamahî ahurâica mazdâi sraoshâica ashyâi ameshaêibyasca speñtaêibyô ashâunãmca fravashibyô ashâunãmca urvôibyô âthraêca ahurahe mazdå rathwaêca berezaite vîspayå sãcatca ashaonô stôish ýasnâica vahmâica xshnaothrâica frasastayaêca.
3: âat dîsh âvaêdhayamahî ima humatâca hûxtâca hvarshtâca imã haomãsca myazdãsca zaothråsca baresmaca ashaya frastaretem gãmca hudhånghem haurvata ameretâta gãmca hudhånghem haomemca para-haomemca aêsmãsca baoidhîmca imãm anghuyãmca ashayãmca rathwãmca ratufritîmca gâthanãmca sraothrem hvarshtå mãthrå pairica dademahî âca vaêdhayamahî.
4: âat dîsh âvaêdhayamahî ameshaêibyô speñtaêibyô huxshathraêibyô hudhâbyô ýavaêjibyô ýavaêsubyô ýôi vanghêush â mananghô shyeiñti ýåsca uiti.
5: âat dîsh âvaêdhayamahî frâyehîsh ahe nmânahe fradathâi ahe nmânahe pasvãmca narãmca zâtanãmca zãhyamnanãmca ashaonãm ýenghe aêm heñti.
6: âat dîsh âvaêdhayamahî ashâunãm vanguhibyô fravashibyô ýå ukhråsca aiwithûråsca ashaonãm avanghe.
7: âat dîsh âvaêdhayamahî dathushô ahurahe mazdå raêvatô hvarenanguhatô mainyêush mainyaoyehe ameshanãm speñtanãm ýasnâica vahmâica xshnaothrâica frasastayaêca!
8: âat dîsh âvaêdhayamahî asnyaêibyô ashahe ratubyô, hâvanêe ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî sâvanghêe vîsyâica ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî mithrahe vouru-gaoyaotôish hazangrô-gaoshahe baêvare-cashmanô aoxtô-nâmanô ýazatahe râmanô hvâstrahe ýasnâica vahmâica xshnaothrâica frasastayaêca.
9: âat dîsh âvaêdhayamahî rapithwinâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî frâdat-fshave zañtumâica ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî ashahe vahishtahe âthrasca ahurahe mazdå ýasnâica vahmâica xshnaothrâica frasastayaêca.
10: âat dîsh âvaêdhayamahî uzayeirinâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî frâdat- vîrâi dâh'yumâica ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî berezatô ahurahe nafedhrô apãm apasca mazdadhâtayå ýasnâica vahmâica xshnaothrâica frasastayaêca.
11: âat dîsh âvaêdhayamahî aiwisrûthrimâi aibigayâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî frâdat-vîspãm-hujyâtêe zarathushtrôtemâica ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî ashâunãm fravashinãm khenãnãmca vîrô- vãthwanãm ýâiryayåsca hushitôish, amaheca hutâshtahe huraodhahe verethrakhnaheca ahuradhâtahe vanaiñtyåsca uparatâtô ýasnâica vahmâica xshnaothrâica frasastayaêca.
12: âat dîsh âvaêdhayamahî ushahinâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî berejyâi nmânyâica ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî sraoshahe ashyehe ashivatô verethrâjanô frâdat-gaêthahe, rashnaosh razishtahe arshtâtasca frâdat-gaêthayå varedat-gaêthayå ýasnâica vahmâica xshnaothrâica frasastayaêca!
13: âat dîsh âvaêdhayamahî mâhyaêibyô ashahe ratubyô, añtaremånghâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî perenô- månghâi vîshaptathâica ashaone ashahe rathwe ýasnâica vahmâica xshnaothrâica frasastayaêca!
14: âat dîsh âvaêdhayamahî ýâiryaêibyô ashahe ratubyô, maidhyôizaremayâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî maidhyôishemâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî paitishhahyâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî ayâthrimâi fraourvaêshtrimâi varshniharshtâica ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî maidhyâiryâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî hamaspathmaêdayâi ashaone ashahe rathwe ýasnâica vahmâica xshnaothrâica frasastayaêca, âat dîsh âvaêdhayamahî saredhaêibyô ashahe ratubyô ýasnâica vahmâica xshnaothrâica frasastayaêca.
15: âat dîsh âvaêdhayamahî vîspaêibyô aêibyô ratubyô ýôi heñti ashahe ratavô thrayasca thrisãsca nazdishta pairishhâvanayô ýôi heñti ashahe ýat vahishtahe mazdô-frasâsta zarathushtrô- fraoxta, ýasnâica vahmâica xshnaothrâica frasastayaêca!
16: âat dîsh âvaêdhayamahî ahuraêibya mithraêibya berezañbya aithyajanghaêibya ashavanaêibya stârãmca speñtô-mainyavanãm dâmanãm tishtryeheca stârô raêvatô hvarenanguhatô månghaheca gaocithrahe hvareca xshaêtahe aurvat-aspahe dôithrahe ahurahe mazdå mithrahe dâh'yunãm dainghupatôish, ýasnâica vahmâica xshnaothrâica frasastayaêca, âat dîsh âvaêdhayamahî (...rôz...) ahurahe mazdå raêvatô hvarenanguhatô ýasnâica vahmâica xshnaothrâica frasastayaêca, âat dîsh âvaêdhayamahî (...mâh...) ashâunãm fravashinãm ýasnâica vahmâica xshnaothrâica frasastayaêca!
17: âat dîsh âvaêdhayamahî tava âthrô ahurahe mazdå puthra mat vîspaêibyô âterebyô ýasnâica vahmâica xshnaothrâica frasastayaêca, âat dîsh âvaêdhayamahî aiwyô vanguhibyô vîspanãmca apãm mazdadhâtanãm vîspanãmca urvaranãm mazdadhâtanãm ýasnâica vahmâica xshnaothrâica frasastayaêca!
18: âat dîsh âvaêdhayamahî mãthrahe speñtahe ashaonô verezyanguhahe dâtahe vîdaêvahe dâtahe zarathushtrôish darekhayå upayanayå daênayå vanghuyå mâzdayasnôish ýasnâica vahmâica xshnaothrâica frasastayaêca.
19: âat dîsh âvaêdhayamahî garôish ushidarenahe mazdadhâtahe ashahvâthrahe vîspaêshãmca gairinãm ashahvâthranãm pouru-hvâthranãm mazdadhâtanãm kâvayeheca hvarenanghô mazdadhâtahe ahvaretaheca hvarenanghô mazdadhâtahe ýasnâica vahmâica xshnaothrâica frasastayaêca, âat dîsh âvaêdhayamahî ashôish vanghuyå cistôish vanghuyå erethê vanghuyå rasãstâtô vanghuyå hvarenanghô savanghô mazdadhâtahe ýasnâica vahmâica xshnaothrâica frasastayaêca.
20: âat dîsh âvaêdhayamahî dahmayå vanghuyå âfritôish dahmaheca narsh ashaonô ukhraheca taxmahe dâmôish upamanahe ýazatahe ýasnâica vahmâica xshnaothrâica frasastayaêca!
21: âat dîsh âvaêdhayamahî ånghãm asanghãmca shôithranãmca gaoyaoitinãmca maêthananãmca avô-hvarenanãmca apãmca zemãmca urvaranãmca ainghåsca zemô avaingheca ashnô vâtaheca ashaonô strãm månghô hûrô anakhranãm raocanghãm hvadhâtanãm vîspanãmca speñtahe mainyêush dâmanãm ashaonãm ashaoninãmca ashahe rathwãm ýasnâica vahmâica xshnaothrâica frasastayaêca.
22: âat dîsh âvaêdhayamahî rathwô berezatô ýô ashahe, rathwãm ayaranãmca asnyanãmca mâhyanãmca ýâiryanãmca saredhanãmca ýôi heñti ashahe ratavô, hâvanôish rathwô ýasnâica vahmâica xshnaothrâica frasastayaêca!
23: âat dîsh âvaêdhayamahî (râspî,) sraoshahe ashyehe taxmahe tanumãthrahe darshi- draosh âhûiryehe xshnaothra ýasnâica vahmâica xshnaothrâica frasastayaêca, âat dîsh âvaêdhayamahî zarathushtrahe spitâmahe ashaonô fravashêe xshnaothra ýasnâica vahmâica xshnaothrâica frasastayaêca, âat dîsh âvaêdhayamahî tava âtarsh puthra ahurahe mazdå xshnaothra ýasnâica vahmâica xshnaothrâica frasastayaêca.
24: âat dîsh âvaêdhayamahî ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm ýasnâica vahmâica xshnaothrâica frasastayaêca.
25: âat dîsh âvaêdhayamahî vîspaêibyô ashahe ratubyô ýasnâica vahmâica xshnaothrâica frasastayaêca, âat dîsh âvaêdhayamahî vîspaêibyô vanghudhâbyô ýazataêibyô mainyaoibyascâ gaêthyaêibyascâ ýôi heñti ýasnyâca vahmyâca ashât haca ýat vahishtât!
ameshâ speñtâ huxshathrâ hudhånghô ýazamaide,
26: ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ tåscâ ýazamaide!!

YASNA - Chapter 5.

1: (zôt,) ithâ ât ýazamaidê ahurem mazdãm ýê gãmcâ ashemcâ dât apascâ dât urvaråscâ vanguhîsh raocåscâ dât bûmîmcâ vîspâcâ vohû ahyâ xshathrâcâ mazênâcâ havapañghâishcâ.
2: têm at ýasnyanãm paurvatâtâ ýazamaidê ýôi gêush hacâ shyeiñtî.
3: têm at âhûiryâ nâmênî mazdâ-varâ speñtôtêmâ ýazamaidê, têm ahmâkâish azdibîshcâ ushtânâishcâ ýazamaidê, têm ashâunãm fravashîsh narãmcâ nâirinãmcâ ýazamaidê.
4: ashem at vahishtem ýazamaidê hyat sraêshtem hyat speñtem ameshem hyat raocañghvat hyat vîspâ vohû.
5: vohucâ manô ýazamaidê, vohucâ xshathrem vanguhîmcâ daênãm vanguhîmcâ fseratûm vanguhîmcâ ârmaitîm!
6: ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide!!

YASNA - Chapter 6.

1: dadhvånghem ahurem mazdãm ýazamaide, ameshâ speñtâ huxshathrâ hudhånghô ýazamaide!
2: asnya ashavana ashahe ratavô ýazamaide, hâvanîm ashavanem ashahe ratûm ýazamaide, sâvanghaêm vîsîmca ashavanem ashahe ratûm ýazamaide, mithrem vouru-gaoyaoitîm hazangra-gaoshem baêvare-cashmanem aoxtô-nâmanem ýazatem ýazamaide, râma hvâstrem ýazamaide.
3: rapithwinem ashavanem ashahe ratûm ýazamaide, frâdat-fshâum zañtumemca ashavanem ashahe ratûm ýazamaide, ashem vahishtem âtremca ahurahe mazdå puthrem ýazamaide.
4: uzayeirinem ashavanem ashahe ratûm ýazamaide, frâdat-vîrem dâh'yumemca ashavanem ashahe ratûm ýazamaide, berezañtem ahurem xshathrîm xshaêtem apãm napâtem aurvat-aspem ýazamaide, apemca mazdadhâtãm ashaonîm ýazamaide.
5: aiwisrûthrimem aibigâim ashavanem ashahe ratûm ýazamaide, frâdat-vîspãm-hujyâitîm zarathushtrôtememca ashavanem ashahe ratûm ýazamaide, ashâunãm vanguhîsh sûrå speñtå fravashayô ýazamaide, khnåsca vîrô-vãthwå ýazamaide, ýâiryãmca hushitîm ýazamaide, amemca hutashtem huraodhem ýazamaide, verethrakhnemca ahuradhâtem ýazamaide, vanaiñtîmca uparatâtem ýazamaide.
6: ushahinem ashavanem ashahe ratûm ýazamaide, berejîm nmânîmca ashavanem ashahe ratûm ýazamaide, sraoshem ashîm huraodhem verethrâjanem frâdat-gaêthem ashavanem ashahe ratûm ýazamaide, rashnûm razishtem ýazamaide, arshtâtemca frâdat-gaêthãm varedat-gaêthãm ýazamaide!
7: mâhya ashavana ashahe ratavô ýazamaide, añtaremånghem ashavanem ashahe ratûm ýazamaide, perenô-månghem vîshaptathem ashavanem ashahe ratûm ýazamaide!
8: ýâirya ashavana ashahe ratavô ýazamaide, maidhyôizaremaêm ashavanem ashahe ratûm ýazamaide, maidhyôishemem ashavanem ashahe ratûm ýazamaide, paitishhahîm ashavanem ashahe ratûm ýazamaide, ayâthrimem fraourvaêshtrimem varshniharshtem ashavanem ashahe ratûm ýazamaide, maidhyâirîm ashavanem ashahe ratûm ýazamaide, hamaspathmaêdaêm ashavanem ashahe ratûm ýazamaide, saredha ashavana ashahe ratavô ýazamaide.
9: vîspe ashahe ratavô ýazamaide ýôi heñti ashahe ratavô thrayasca thrisãsca nazdishta pairishhâvanayô ýôi heñti ashahe ýat vahishtahe mazdô-frasâsta zarathushtrô-fraoxta!
10: ahura mithra berezañta aithyajangha ashavana ýazamaide, strêushca månghemca hvareca urvarâhu paiti baresmanyâhu mithrem vîspanãm dah'yunãm dainghupaitîm ýazamaide, (...rôz...) ahurem mazdãm raêvañtem hvarenanguhañtem ýazamaide, ( ... mâh ... ) ashâunãm vanguhîsh sûrå speñtå fravashayô ýazamaide!
11: thwãm âtrem ahurahe mazdå puthrem ashavanem ashahe ratûm ýazamaide mat vîspaêibyô âterebyô, âpô vanguhîsh vahishtå mazdadhâtå ashaonîsh ýazamaide, vîspå âpô mazdadhâtå ashaonîsh ýazamaide, vîspå urvarå mazdadhâtå ashaonîsh ýazamaide!
12: mãthrem speñtem ashhvarenanghem ýazamaide, dâtem vîdôyûm ýazamaide, dâtem zarathushtri ýazamaide, darekhãm upayanãm ýazamaide, daênãm vanguhîm mâzdayasnîm ýazamaide.
13: gairîm ushidarenem mazdadhâtem ashahvâthrem ýazatem ýazamaide, vîspå garayô ashahvâthrå pouru-hvâthrå mazdadhâta ashavana ashahe ratavô ýazamaide, ukhrem kavaêm hvarenô mazdadhâtem ýazamaide, ukhrem ahvaretem hvarenô mazdadhâtem ýazamaide, ashîm vanguhîm ýazamaide, xshôithnîm berezaitîm amavaitîm huraodhãm hvâparãm hvarenô mazdadhâtem ýazamaide, savô mazdadhâtem ýazamaide.
14: dahmãm vanguhîm âfritîm ýazamaide, dahmemca narem ashavanem ýazamaide, ukhrem taxmem dâmôish upamanem ýazatem ýazamaide!
15: imå apasca zemasca urvaråsca ýazamaide, imå asåsca shôithråsca gaoyaoitîshca maêthanyåsca avô-hvarenåsca ýazamaide, imemca shôithrahe paitîm ýazamaide ýim ahurem mazdãm.
16: ratavô vîspe mazishta ýazamaide ayara asnya mâhya ýâirya saredha! (zôt u râspî,)
17: haurvata ameretâta ýazamaide, gâush hudå ýazamaide, sraoshem ashîm huraodhem verethrâjanem frâdat-gaêthem ashavanem ashahe ratûm ýazamaide.
18: haomemca para-haomemca ýazamaide, zarathushtrahe spitâmahe idha ashaonô ashîmca fravashîmca ýazamaide, aêsmãsca baoidhîmca ýazamaide, thwãm âtrem ahurahe mazdå puthrem ashavanem ashahe ratûm ýazamaide.
19: ashâunãm vanguhîsh sûrå speñtå fravashayô ýazamaide.
20: vîspe ashavanô ýazata ýazamaide, vîspe ashahe ratavô ýazamaide, hâvanîm paiti ratûm sâvanghaêm vîsîmca paiti ratûm, ratavô vîspe mazishta paiti ratûm!
21: ýenghê hâtãm.... (râspî,) ýathâ ahû vairyô ýô zaotâ frâ-mê mrûtê, (zôt,) athâ ratush ashâtcît haca frâ ashava vîdhvå mraotû!!

YASNA - Chapter 7.

1: (zôt u râspî,) ashem vohû vahishtem astî ... (3)! (zôt,) ashaya dadhãmi hvarethem myazdem haurvata ameretâta gâush hudå xshnûmaine ahurahe mazdå ameshanãm speñtanãm, xshnûmaine sraoshahe ashyehe ashivatô verethrâjanô frâdat-gaêthahe.
2: ashaya dadhãmi haomemca para-haomemca xshnûmaine zarathushtrahe spitâmahe ashaonô fravashêe, ashaya dadhãmi aêsmã baoidhi xshnûmaine tava âthrô ahurahe mazdå puthra.
3: ashaya dadhãmi haomi xshnûmaine aiwyô vanguhibyô apãm vanguhînãm mazdadhâtanãm, ashaya dadhãmi âpem haomyãm, ashaya dadhãmi gãm jîvyãm, ashaya dadhãmi urvarãm hadhânaêpatãm ashaya uzdâtãm xshnûmaine apãm mazdadhâtanãm.
4: ashaya dadhãmi imat baresma hadha-zaothrem hadha-aiwyånghanem ashaya frastaretem xshnûmaine ameshanãm speñtanãm, ashaya dadhãmi vâca humata hûxta hvarshta, ashaya dadhãmi gâthanãmca sraothrem, ashaya dadhãmi hvarshtå mãthrå, ashaya dadhãmi imãm anghuyãmca ashayãmca rathwãmca ratufritîmca xshnûmaine ýazatanãm ashaonãm mainyavanãm gaêthyanãm xshnûmaine havaheca urunô!
5: ashaya dadhãmi asnyaêibyô ashahe ratubyô, hâvanêe ashaone ashahe rathwe, ashaya dadhãmi sâvanghêe vîsyâica ashaone ashahe rathwe, ashaya dadhãmi mithrahe vouru-gaoyaotôish hazangrô- gaoshahe baêvare-cashmanô aoxtô-nâmanô ýazatahe râmanô hvâstrahe.
6: ashaya dadhãmi rapithwinâi ashaone ashahe rathwe, ashaya dadhãmi frâdat-fshave zañtumâica ashaone ashahe rathwe, ashaya dadhãmi ashahe vahishtahe âthrasca ahurahe mazdå.
7: ashaya dadhãmi uzayeirinâi ashaone ashahe rathwe, ashaya dadhãmi frâdat-vîrâi dâh'yumâica ashaone ashahe rathwe, ashaya dadhãmi berezatô ahurahe nafedhrô apãm apasca mazdadhâtayå.
8: ashaya dadhãmi aiwisrûthrimâi aibigayâi ashaone ashahe rathwe, ashaya dadhãmi frâdat-vîspãm-hujyâtêe zarathushtrôtemâica ashaone ashahe rathwe, ashaya dadhãmi ashâunãm fravashinãm khenãnãmca vîrô-vãthwanãm ýâiryayåsca hushitôish amaheca hutâshtahe huraodhahe verethrakhnaheca ahuradhâtahe vanaiñtyåsca uparatâtô.
9: ashaya dadhãmi ushahinâi ashaone ashahe rathwe, ashaya dadhãmi berejyâi nmânyâica ashaone ashahe rathwe, ashaya dadhãmi sraoshahe ashyehe ashivatô verethrâjanô frâdat-gaêthahe rashnaosh razishtahe arshtâtasca frâdat-gaêthayå varedat-gaêthayå!
10: ashaya dadhãmi mâhyaêibyô ashahe ratubyô, añtaremånghâi ashaone ashahe rathwe, ashaya dadhãmi perenô-månghâi vîshaptathâica ashaone ashahe rathwe!
11: ashaya dadhãmi ýâiryaêibyô ashahe ratubyô, maidhyôizaremayâi ashaone ashahe rathwe, ashaya dadhãmi maidhyôishemâi ashaone ashahe rathwe, ashaya dadhãmi paitishhahyâi ashaone ashahe rathwe, ashaya dadhãmi ayâthrimâi fraourvaêshtrimâi varshniharshtâica ashaone ashahe rathwe, ashaya dadhãmi maidhyâiryâi ashaone ashahe rathwe, ashaya dadhãmi hamaspathmaêdayâi ashaone ashahe rathwe, ashaya dadhãmi saredhaêibyô ashahe ratubyô.
12: ashaya dadhãmi vîspaêibyô aêibyô ratubyô ýôi heñti ashahe ratavô thrayasca thrisãsca nazdishta pairishhâvanayô ýôi heñti ashahe ýat vahishtahe mazdô-frasâsta zarathushtrô-fraoxta!
13: ashaya dadhãmi ahuraêibya mithraêibya berezañbya aithyajanghaêibya ashavanaêibya stârãmca speñtô-mainyavanãm dâmanãm tishtryeheca stârô raêvatô hvarenanguhatô månghaheca gaocithrahe hvareca xshaêtahe aurvat-aspahe dôithrahe ahurahe mazdå mithrahe dah'yunãm dainghupatôish, ashaya dadhãmi (...rôz...) ahurahe mazdå raêvatô hvarenanguhatô, ashaya dadhãmi ( ... mâh ... ) ashâunãm fravashinãm!
14: ashaya dadhãmi tava âthrô ahurahe mazdå puthra mat vîspaêibyô âterebyô, ashaya dadhãmi aiwyô vanguhibyô vîspanãmca apãm mazdadhâtanãm vîspanãmca urvaranãm mazdadhâtanãm!
15: ashaya dadhãmi mãthrahe speñtahe ashaonô verezyanguhahe dâtahe vîdaêvahe dâtahe zarathushtrôish darekhayå upayanayå daênayå vanghuyå mâzdayasnôish.
16: ashaya dadhãmi garôish ushidarenahe mazdadhâtahe ashahvâthrahe vîspaêshãmca gairinãm ashahvâthranãm pouru-hvâthranãm mazdadhâtanãm kâvayeheca hvarenanghô mazdadhâtahe ahvaretaheca hvarenanghô mazdadhâtahe, ashaya dadhãmi ashôish vanghuyå cistôish vanghuyå erethê vanghuyå rasãstâtô vanghuyå hvarenanghô savanghô mazdadhâtahe.
17: ashaya dadhãmi dahmayå vanghuyå âfritôish dahmaheca narsh ashaonô ukhraheca taxmahe dâmôish upamanahe ýazatahe!
18: ashaya dadhãmi ånghãm asanghãmca shôithranãmca gaoyaoitinãmca maêthananãmca avô-hvarenanãmca apãmca zemãmca urvaranãmca ainghåsca zemô avaingheca ashnô vâtaheca ashaonô strãm månghô hûrô anakhranãm raocanghãm hvadhâtanãm vîspanãmca speñtahe mainyêush dâmanãm ashaonãm ashaoninãmca ashahe rathwãm.
19: ashaya dadhãmi rathwô berezatô ýô ashahe, rathwãm ayaranãmca asnyanãmca mâhyanãmca ýâiryanãmca saredhanãmca ýôi heñti ashahe ratavô, hâvanôish rathwô!
20: ashaya dadhãmi (zôt u râspî,) hvarethem myazdem haurvata ameretâta gâush hudå xshnûmaine sraoshahe ashyehe taxmahe tanumãthrahe darshi-draosh âhûiryehe aoxtô-nâmanô ýazatahe.
21: ashaya dadhãmi haomemca para-haomemca xshnûmaine zarathushtrahe spitâmahe ashaonô fravashêe aoxtô-nâmanô ýazatahe, ashaya dadhãmi aêsma baoidhi xshnûmaine tava âthrô ahurahe mazdå puthra aoxtô-nâmanô ýazatahe. (ashaya dadhãmi hvarethem myazdem ... ýazatahe (2).)
22: ashaya dadhãmi ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm.
23: ashaya dadhãmi vîspaêibyô ashahe ratubyô, ashaya dadhãmi vîspaêibyô vanghudhâbyô ýazataêibyô mainyaoibyascâ gaêthyaêibyascâ ýôi heñti ýasnyâca vahmyâca ashât haca ýat vahishtât!
24: ashaya-nô paitî jamyât ýehyâ savâ ishåñtî râdanghô, thwôi staotarascâ mãthranascâ ahura-mazdâ aogemadaêcâ usmahicâ vîsâmadaêcâ, hyat mîzhdem mavaêthem fradadâthâ daênâbyô mazdâ ahurâ, (thwôi staotarascâ ... mazdâ ahurâ (2).)
25: ahyâ hvô nê dâidî ahmâicâ ahuyê manah'yâica, tat ahyâ ýâ tat upâ jamyâmâ tavâcâ sarem ashah'yâcâ vîspâi ýavê. ýathâ ahû vairyô athâ ratush ashâtcît hacâ ... (2)!
26: ahunem vairîm ýazamaide, arshuxdhem vâcim ýazamaide, dahmãm vanguhîm âfritîm ýazamaide, ukhrem taxmem dâmôish upamanem ýazatem ýazamaide, haurvata ameretâta ýazamaide, gâush hudå ýazamaide, haomemca para-haomemca ýazamaide, aêsmãsca baoidhîmca ýazamaide, frasasti dahmayå vanghuyå âfritôish!
27: ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide.
28: (râspî,) ýathâ ahû vairyô ýô zaotâ frâ-mê mrûtê, (zôt,) athâ ratush ashâtcît haca frâ ashava vîdhvå mraotû!!

YASNA - Chapter 8.

(zôt u râspî,)
1: ashem vohû vahishtem astî ... (3). ashaya dadhãmi hvarethem myazdem haurvata ameretâta gâush hudå haomemca para-haomemca aêsmãsca baoidhîmca frasasti ahurahe mazdå ahunahe vairyehe arshuxdhahe vâxsh dahmayå vanghuyå âfritôish ukhrâi dâmôish upamanâi haomaheca mãthraheca ashaonaêca zarathushtrahe, ashaya-nô paiti jamyât!
2: (râspî,) hvarata narô aêtem myazdem ýôi dim hanghâna ashâca frêretica!
3: (zôt,) amesha speñta daêne mâzdayasne vanghavasca vanguhîshca zaothråsca, ýô aêshva mazdayasnaêshva mazdayasnô aojanô ashahe râthma jîshtayamnô ýâthwa gaêthå ashahe merekheñte avi tû dim disyata ýå apasca urvaråsca zaothråsca.
4: ýasca aêtaêshãm mazdayasnanãm perenâyunãm aiwi-zûzuyanãm imã vacô nôit vîsaiti framrûite aêtãm â ýâtumanahe jasaiti. ashem vohû vahishtem astî ... (3 u 4). ýathâ ahû vairyô ... (2)!
5: vasasca tû ahura-mazda ushtâca xshaêsha havanãm dâmanãm, vasô âpô vasô urvarå vasô vîspa vohû ashacithra xshayamnem ashavanem dâyata axshayamnem drvañtem.
6: vasô-xshathrô hyât ashava, avasô-xshathrô hyât drvå gatô hamistô nizhberetô haca speñtahe mainyêush dâmabyô varatô avasô-xshathrô.
7: haxshaya azemcit ýô zarathushtrô fratemã nmânanãmca vîsãmca zañtunãmca dah'yunãmca ainghå daênayå anumatayaêca anuxtayaêca anvarshtayaêca ýâ âhûirish zarathushtrish.
8: (râspî,) ravasca hvâthremca âfrînâmi vîspayå ashaonô stôish, ãzasca duzhâthremca âfrînâmi vîspayå drvatô stôish!
9: ashem vohû vahishtem astî ... (3). haomahe ashavazanghô xshnaothra ýasnâica vahmâica xshnaothrâica frasastayaêca. (zôt,) ýathâ ahû vairyô zaotâ frâ-mê mrûtê, (râspî,) ýathâ ahû vairyô ýô zaotâ frâ-mê mrûtê, (zôt,) athâ ratush ashâtcît haca frâ ashava vîdhvå mraotû!!

Avesta -- Zoroastrian Archives

Contents

Part 1 (Ha 0-8)

English