AVESTA: VENDIDAD, Fargard 1-3 (Avestan)

Avesta -- Zoroastrian Archives

Contents

Vendidad

English

Glossary

AVESTA: Vendidad

Fargard 1.

1: mraot ahurô mazdå spitamâi zarathushtrâi, azem dadhãm spitama zarathushtra asô râmô- dâitîm nôit kudat shâitîm, ýeidhi-zî azem nôit daidhyãm spitama zarathushtra asô râmô-dâitîm nôit kudat shâitîm vîspô anghush astvå airyanem vaêjô frâshnvât.
2: paoirîm asanghãmca shôithranãmca vahishtem frâthweresem azem ýô ahurô mazdå airyanem vaêjô vanghuyå dâityayå. âat ahe paityârem frâkereñtat angrô mainyush pouru-mahrkô azhimca ýim raoidhitem zyãmca daêvô-dâtem,
3: dasa avathra månghô zayana dva hãmina taêca heñti sareta âpô sareta zemô sareta urvarayå adha zimahe maidhim adha zimahe zaredhaêm adha zyåscit pairi-pataiti adha fraêshtem vôikhnanãm.
4: bitîm asanghãmca shôithranãmca vahishtem frâthweresem azem ýô ahurô mazdå
gâum ýim sukhdhô-shayanem, âat ahe paityârem frâkereñtat angrô mainyush pouru-mahrkô skaitîm ýãm gavaca dayaca pouru-mahrkem.
5: thritîm asanghãmca shôithranãmca vahishtem frâthweresem azem ýô ahurô mazdå
môurum sûrem ashavanem, âat ahe paityârem frâkereñtat angrô mainyush pouru-mahrkô maredhãmca vîthushãmca.
6: tûirîm asanghãmca shôithranãmca vahishtem frâthweresem azem ýô ahurô mazdå
bâxdhîm srîrãm eredhwô-drafshãm, âat ahe paityârem frâkereñtat angrô mainyush pouru-mahrkô bravaremca usadhasca.
7: puxdhem asanghãmca shôithranãmca vahishtem frâthweresem azem ýô ahurô mazdå nisâim ýim añtare môurumca bâxdhîmca, âat ahe paityârem frâkereñtat angrô mainyush pouru-mahrkô akhemca vîmanô-hîm.
8: xshtûm asanghãmca shôithranãmca vahishtem frâthweresem azem ýô ahurô mazdå
harôyûm ýim vish-harezanem, âat ahe paityârem frâkereñtat angrô mainyush pouru-mahrkô saraskemca driwikâca.
9: haptathem asanghãmca shôithranãmca vahishtem frâthweresem azem ýô ahurô mazdå vaêkeretem ýim dûzhakô- sayanem, âat ahe paityârem frâkereñtat angrô mainyush pouru-mahrkô pairikãm ýãm xnãthaite ýâ upanghacat keresâspem.
10: ashtemem asanghãmca shôithranãmca vahishtem frâthweresem azem ýô ahurô mazdå urvãm pouru-vâstrãm, âat ahe paityârem frâkereñtat angrô mainyush pouru-mahrkô akha aiwishtâra.
11: nâumem asanghãmca shôithranãmca vahishtem frâthweresem azem ýô ahurô mazdå xneñtem ýim vehrkânô- shayanem, âat ahe paityârem frâkereñtat angrô mainyush pouru-mahrkô akha anâperetha shyaothna ýâ narô-vaêpaya.
12: dasemem asanghãmca shôithranãmca vahishtem frâthweresem azem ýô ahurô mazdå harahvaitîm srîrãm, âat ahe paityârem frâkereñtat angrô mainyush pouru-mahrkô akha anâperetha shyaothna ýâ nasuspaya.
13: aêvañdasem asanghãmca shôithranãmca vahishtem frâthweresem azem ýô ahurô mazdå haêtumañtem raêvañtem hvarenanguhañtem, âat ahe paityârem frâkereñtat angrô mainyush pouru-mahrkô akha ýâtava,
14: aêmca ahe cithrô daxshtô anghat aêm cithrô-paiti-dayô ýatha kavacit jasen zaoyehe ýâtumeñtem adha heñti ýâtumastema adha taêcit uzjaseñti ýâ mereñcyâica zaradhakhnyâica xshtãmicatca madhaxaheca.
15: dvadasem asanghãmca shôithranãmca vahishtem frâthweresem azem ýô ahurô mazdå rakhãm thrizañtûm, âat ahe paityârem frâkereñtat angrô mainyush pouru-mahrkô akhemca uparô-vîmanô-hîm.
16: thridasem asanghãmca shôithranãmca vahishtem frâthweresem azem ýô ahurô mazdå
caxrem sûrem ashavanem, âat ahe paityârem frâkereñtat angrô mainyush pouru-mahrkô akha anâperetha shyaothna ýâ nasuspacya.
17: cathrudasem asanghãmca shôithranãmca vahishtem frâthweresem azem ýô ahurô mazdå varenem ýim cathru-gaoshem ýahmâi zayata thraêtaonô jañta azhôish dahâkâi, âat ahe paityârem frâkereñtat angrô mainyush pouru-mahrkô arathwyâca daxshta anairyâca dainghush-aiwishtâra.
18: pañcadasem asanghãmca shôithranãmca vahishtem frâthweresem azem ýô ahurô mazdå ýô hapta heñdu, âat ahe paityârem frâkereñtat angrô mainyush pouru-mahrkô arathwyâca daxshta arathwîmca garemâum.
19: xshvash-dasem asanghãmca shôithranãmca vahishtem frâthweresem azem ýô ahurô mazdå upa aodhaêshu ranghayå ýô asârô aiwyâxshayeiñti, âat ahe paityârem frâkereñtat angrô mainyush pouru-mahrkô zyãmca daêvô-dâtem taozhyâca dainghush-aiwishtâra.
20: heñti anyåscit asåsca shôithråsca srîråsca gufråsca berexdhåsca frashåsca bâmyåsca!
ashem vohû...!!

Fargard 2.

1: peresat zarathushtrô ahurem mazdãm,
ahura mazda mainyô
spênishta dâtare gaêthanãm
astvaitinãm ashâum kahmâi paoiryô mashyânãm aperese-tûm ýô ahurô mazdå anyô mana ýat zarathushtrâi,
kahmâi fradaêsayô daênãm
ýãm âhûirîm zarathushtrîm.
2: âat mraot ahurô mazdå, ýimâi srîrâi hvãthwâi ashâum zarathushtra
ahmâi paoiryô mashyânãm
aperese azem ýô ahurô mazdå
anyô thwat ýat zarathushtrât,
ahmâi fradaêsaêm daênãm
ýãm âhûirîm zarathushtrîm.
3: âat hê mraot zarathushtra
azem ýô ahurô mazdå,
vîsangha mê ýima srîra vîvanghana
meretô beretaca daênayâi,
âat mê aêm paityaoxta
ýimô srîrô zarathushtra,
nôit dâtô ahmi nôit cistô
meretô beretaca daênayâi.
4: âat hê mraom zarathushtra
azem ýô ahurô mazdå,
ýezi mê ýima nôit vîvîse
meretô beretaca daênayâi âat mê gaêthå frâdhaya âat mê gaêthå varedhaya âat mê vîsâi gaêthanãm thrâtâca haretâca aiwyâxshtaca.
5: âat mê aêm paityaoxta
ýimô srîrô zarathushtra, azem tê gaêthå frâdhayeni azem tê gaêthå varedhayeni azem tê vîsâne gaêthanãm thrâtâca haretâca aiwyâxshtaca, nôit mana xshathre bvat aotô vâtô nôit garemô nôit axtish nôit mahrkô.
6: âat hê zaya frabarem
azem ýô ahurô mazdå suwrãm zaranaênîm ashtrãmca zaranyô- paêsîm.
7: ýimô asti berethe xshathrayå.
8: âat ýimâi xshathrâi thrisatô-zima hañjaseñti,
âat hê îm zå bvat perene
pasvãmca staoranãmca
mashyânãmca sûnãmca vayãmca
âthrãmca suxrãm saociñtãm
nôit hîm gâtvô viñden
pasvasca staorâca mashyâca.
9: âat ýimâi paiti-vaêdhaêm,
ýima srîra vîvanghana
perene îm zå hañgata
pasvãmca staoranãmca
mashyânãmca sûnãmca vayãmca
âthrãmca suxrãm saociñtãm
nôit hîm gâtvô viñdeñti
pasvasca staorâca mashyâca.
10: âat ýimô frashûsat raocå â upa rapithwãm hû paiti adhwanem,
hô imãm zãm aiwishvat
suwrya zaranaênya
avi dim sifat ashtraya uityaojanô,
fritha speñta ârmaite
fraca shva vîca nemangha barethre pasvãmca staoranãmca mashyânãmca.
11: âat ýimô imãm zãm vîshâvayat aêva thrishva ahmât masyehîm ýatha para ahmât as, tem ithra fracareñta pasvasca staorâca mashyâca
hvãm anu ushtîm zaoshemca
ýatha kathaca hê zaoshô.
12-14: âat ýimâi xshathrâi xshvash-satô-zima hañjaseñti, âat hê îm zå bvat perene ... mashyânãmca.
15: âat ýimô imãm zãm vîshâvayat dva thrishva ahmât masyehîm ýatha para ahmât as, tem ithra fracareñta pasvasca staorâca mashyâca hvãm anu ushtîm zaoshemca ýatha kathaca hê zaoshô.
16: âat ýimâi xshathrâi nava-satô-zima hañjaseñti, âat hê îm zå bvat perene pasvãmca staoranãmca mashyânãmca sûnãmca vayãmca âthrãmca suxrãm saociñtãm, nôit hîm gâtvô viñden pasvasca staorâca mashyâca.
17: âat ýimâi paiti-vaêdhaêm, ýima srîra vîvanghana perene îm zå hañgata pasvãmca staoranãmca mashyânãmca sûnãmca vayãmca âthrãmca suxrãm saociñtãm, nôit hîm gâtvô viñdeñti pasvasca staorâca mashyâca.
18: âat ýimô frashûsat raocå â upa rapithwãm hû paiti adhwanem, hô imãm zãm aiwishvat suwrya zaranaênya avi dim sifat ashtraya uityaojanô, fritha speñta ârmaite fraca shva vîca nemangha barethre pasvãmca staoranãmca mashyânãmca.
19: âat ýimô imãm zãm vîshâvayat thribyô thrishvaêibyô ahmât masyehîm ýatha para ahmât as, tem ithra fracareñta pasvasca staorâca mashyâca hvãm anu ushtîm zaoshemca ýatha kathaca hê zaoshô!
20: hañjamanem frabarata ýô dadhvå ahurô mazdå hathra mainyaoibyô ýazataêibyô srûtô airyene vaêjahi vanghuyå dâityayå, hañjamanem frabarata ýô ýimô xshaêtô hvãthwô hathra vahishtaêibyô mashyâkaêibyô srûtô airyene vaêjahi vanghuyå dâityayå.
21: â-tat hañjamanem paiti-jasat ýô dadhvå ahurô mazdå hathra mainyaoibyô ýazataêibyô srûtô airyene vaêjahi vanghuyå dâityayå, â-tat hañjamanem paiti-jasât ýô ýimô xshaêtô hvãthwô hathra vahishtaêibyô mashyâkaêibyô srûtô airyene vaêjahi vanghuyå dâityayå.
22: âat aoxta ahurô mazdå ýimâi, ýima srîra vîvanghana avi ahûm astvañtem akhem zimô jangheñtu ýahmat haca staxrô mrûrô zyå, avi ahûm astvañtem akhem zimô jangheñtu ýahmat haca paurvô snaodhô vafra snaêzhât barezishtaêibyô gairibyô bãshnubyô areduyå.
23: thrizhatca idha ýima gêush apa-jasat ýatca anghat thwyãstemaêshu asanghãm ýatca anghat bareshnush paiti gairinãm ýatca jãfnushva raonãm paxrumaêshu nmânaêshu.
24: parô zimô aêtanghå
danghush anghat beretô vâstrem
tem âfsh paurva vazaidhyâi
pasca vîtaxti vafrahe abdaca idha ýima anguhe astvaite sadayât ýat idha pasêush anumayehe padhem vaênâite.
25: âat tem varem kerenava caretu-drâjô kemcit paiti cathrushanãm hathra taoxma upa-bara pasvãmca staoranãmca mashyânãmca sûnãmca vayãmca âthrãmca suxrãm saociñtãm, âat tem varem kerenava caretu-drâjô kemcit paiti cathrushanãm narãm aiwi-xshôithne caretu-drâjô kemcit paiti cathrushanãm gavãm gâvayanem.
26: hathra âpem frâtat-caya
hâthrô-masanghem adhwanem
hathra marekhå avastaya, avi mat zairi-gaonem mat hvairyeite ajyamnem,
hathra nmânå avastaya katemca fraskembemca fravâremca pairi-vâremca.
27: hathra vîspanãm narãm nâirinãmca taoxma upa-bara ýôi heñti ainghå zemô mazishtaca vahishtaca sraêshtaca, hathra vîspanãm gêush saredhanãm taoxma upa-bara ýôi heñti ainghå zemô mazishtaca vahishtaca sraêshtaca.
28: hathra vîspanãm urvaranãm taoxma upa-bara ýôi heñti ainghå zemô barezishtaca hubaoidhitemaca, hathra vîspanãm hvarethanãm taoxma upa-bara ýôi heñti ainghå zemô hvarezishtaca hubaoidhitemaca, tê kerenava mithwaire ajyamnem vîspem â ahmât ýat aête narô varefshva anghen.
29: mâ athra frakavô mâ apakavô mâ apâvayô mâ haredhish mâ driwish mâ daiwish mâ kasvîsh mâ vîzbârish mâ vîmîtô-dañtânô mâ paêsô ýô vîteretô-tanush mâdha-cim anyãm daxshtanãm ýôi heñti angrahe mainyêush daxshtem mashyâishca paiti nidhâtem.
30: fratemem dainghêush nava perethwô kerenava madhemô xshvash nitemô tishrô, fratemem perethwô hazangrem narãm nâirinãmca taoxma upa-bara madhemô xshvash sata nitemô tishrô sata, aiwica tê varefshva suwrya zaranaênya
apica tem varem mareza dvarem raocanem hvâraoxshnem añtare-naêmât.
31: âat mãsta ýimô, kutha tê
azem varem kerenavâne ýâ mê aoxta ahurô mazdå, âat aoxta ahurô mazdå ýimâi, ýima srîra vîvanghana ainghå zemô pâshnâbya vîspara zastaêibya vîxadha mãnayen ahe ýatha nû mashyâka xshivisti zemê vîshâvayeiñte.
32: âat ýimô avatha kerenaot ýatha dim ishat ahurô mazdå ainghå zemô pâshnâbya vîsparat zastaêibya vîxadhat mãnayen ahe ýatha nû mashyâka xshivisti zemê vîshâvayeiñte.
33: âat ýimô varem kerenaot caretu-drâjô kemcit paiti cathrushanãm, hathra taoxma upa-barat pasvãmca staoranãmca mashyânãmca sûnãmca vayãmca âthrãmca suxrãm saociñtãm, âat ýimô varem kerenaot caretu-drâjô kemcit paiti cathrushanãm narãm aiwi-xshôithne caretu-drâjô kemcit paiti cathrushanãm gavãm gâvayanem.
34: hathra âpem frâtat-cayat
hâthrô-masanghem adhwanem
hathra marekhå avastayat avi mat zairi-gaonem mat hvairyeite ajyamnem,
hathra nmânå avastayat katemca fraskembemca fravâremca pairi-vâremca.
35: hathra vîspanãm narãm nâirinãmca taoxma upa-barat ýôi heñti ainghå zemô mazishtaca vahishtaca sraêshtaca, hathra vîspanãm gêush saredhanãm taoxma upa-barat ýôi heñti ainghå zemô mazishtaca vahishtaca sraêshtaca.
36: hathra vîspanãm urvaranãm taoxma upa-barat ýôi heñti ainghå zemô barezishtaca hubaoidhitemaca, hathra vîspanãm hvarethanãm taoxma upa-barat ýôi heñti ainghå zemô hvarezishtaca hubaoidhitemaca, tê kerenaot mithwaire ajyamnem vîspem â ahmât ýat aête narô varefshva anghen.
37: nôit athra frakavô nôit apakavô nôit apâvayô nôit haredhish nôit driwish nôit daiwish nôit kasvîsh nôit vîzbârish nôit vîmîtô-dañtânô nôit paêsô ýô vîteretô-tanush naêdha-cim anyãm daxshtanãm ýôi heñti angrahe mainyêush daxshtem mashyâishca paiti nidhâtem.
38: fratemem dainghêush nava perethwô kerenaot madhemô xshvash nitemô tishrô fratemem perethwô hazangrem narãm nâirinãmca taoxma upa-barat madhemô xshvash sata nitemô tishrô sata, aiwica hô varefshva suwrya zaranaênya
apica hô varem marezat dvarem raocanem hvâraoxshnem añtare-naêmât.
39: dâtare gaêthanãm astvaitinãm ashâum cayô âat aête raocå anghen ashâum ahura mazda ýô avatha â-raocayeite aêtaêshva varefshva ýô ýimô kerenaot.
40: âat aoxta ahurô mazdå, hvadhâtaca raocå stidhâtaca, hakeret zî irixtahe sadhayaca vaênaite starasca måsca hvareca.
41: taêca ayare mainyeñte ýat ýâre, cathwaresatem aiwi-gâmanãm dvaêibya haca nerebya dva nara us-zayeiñte mithwana strica nairyasca atha aêtaêshãm ýôi gêush saredhanãm, taêca narô sraêshta gaya jvaiñti aêtaêshva varefshva ýô ýimô kerenaot.
42: dâtare gaêthanãm astvaitinãm ashâum, kô avatha daênãm mâzdayasnîm vî-barat aêtaêshva varefshva ýô ýimô kerenaot, âat aoxta ahurô mazdå, vîsh karshipta spitama zarathushtra.
43: dâtare ... ashâum, kô aêshãm asti anghuca ratushca, âat mraot ahurô mazdå, urvatat-narô zarathushtra tûmca ýô zarathushtrô! ashem vohû...!!

Fargard 3.

1: dâtare gaêthanãm astvaitinãm ashâum, kva paoirîm ainghå zemô shâishtem, âat mraot ahurô mazdå, ýat bâ paiti nâ ashava frayat spitama zarathushtra aêsmô-zastô baresmô-zastô gao-zastô hâvanô-zastô âxshtaêdha daênaya vaca framrû mithremca vouru-gaoyaoitîm jaidhyã râmaca hvâstrem.
2: dâtare ... ashâum, kva bitîm ainghå zemô shâishtem, âat mraot ahurô mazdå, ýat bâ paiti nâ ashava nmânem uzdasta âthravat gaomavat nâirivat puthravat hvãthwavat.
3: âat pascaêta ahe nmânahe frapithwô gâush frapithwô ashem frapithwô vastrem frapithwô spâ frapithwô nâirika frapithwô aperenâyûkô frapithwô âtarsh frapithwô vîspãm hujyâitish.
4: dâtare ... ashâum, kva thritîm ainghå zemô shâishtem, âat mraot ahurô mazdå, ýat bâ paiti fraêshtem kârayeiti spitama zarathushtra ýavanãmca vâstranãmca urvaranãmca hvarethô-bairyanãm ýat vâ anâpem âi âpem kerenaoiti ýat vâ âpem âi anâpem kerenaoiti.
5: dâtare ... ashâum, kva tûirîm ainghå zemô shâishtem, âat mraot ahurô mazdå, ýat bâ paiti fraêshtem us-zîzeñti pasvasca staorâca.
6: dâtare ... ashâum, kva puxdhem ainghå zemô shâishtem, âat mraot ahurô mazdå, ýat bâ paiti fraêshtem maêzeñti pasvasca staorâca.
7: dâtare ... ashâum, kva paoirîm ainghå zemô ashâishtem, âat mraot ahurô mazdå, ýat arezûrahe grîvaya spitama zarathushtra ýat ahmya daêva hañdvareñti drujô haca geredhâdha.
8: dâtare ... ashâum, kva bitîm ainghå zemô ashâishtem, âat mraot ahurô mazdå, ýat bâ paiti fraêshtem sairi nikañte spânasca irista naraêca irista.
9: dâtare ... ashâum, kva thritîm ainghå zemô ashâishtem, âat mraot ahurô mazdå, ýat bâ paiti fraêshtem daxma uzdaêza kiryeiñte ýahmya narô irista nidhayeiñte.
10: dâtare ... ashâum, kva tûirîm ainghå zemô ashâishtem, âat mraot ahurô mazdå, ýat bâ paiti fraêshtem bavaiñti angrô- mainyavanãm geredhãm.
11: dâtare ... ashâum, kva puxdhem ainghå zemô ashâishtem, âat mraot ahurô mazdå, ýat bâ paiti narsh ashaonô spitama zarathushtra nâirikaca aperenâyûkasca varaithîm pañtãm azôit pãsnvånghem hikvånghem jarezîm baraiti vâcim.
12: dâtare ... ashâum, kô paoirîm imãm zãm mazishta xshnaoma xshnâvayeiti, âat mraot ahurô mazdå, ýat bâ paiti fraêshtem uskeñti ýahmya sairi nikañte spânasca irista naraêca irista.
13: dâtare ... ashâum kô bitîm imãm zãm mazishta xshnaoma xshnâvayeiti, âat mraot ahurô mazdå, ýat bâ paiti fraêshtem daxma uzdaêza vîkañti ýahmya narô irista nidhayeiñte!
14: mâ-cish barô aêvô ýat iristem, âat ýezi-shê barât aêvô ýat iristem upa vâ nasush raêthwât nånghanat haca cashmanat haca hizumat haca paitish-hvarenâdha fravâxshat haca frashumakat haca tê, aêshãm paiti sruye aêsha druxsh ýâ nasush upa-dvãsaiti, ayaozhdya pascaêta bavaiñti ýavaêca ýavaêtâtaêca.
15: dâtare ... ashâum kva aêtahe narsh gâtush anghat ýat iristô-kashahe, âat mraot ahurô mazdå, ýat anghat ainghå zemô vî-âpô-tememca vî-urvarô-tememca ýaozhdâtô-zemôtememca hushô-zemôtememca kambishtemca aête pathå frayãn pasvasca staorâca âtremca ahurahe mazdå baresmaca ashaya frastaretem naremca ýim ashavanem.
16: dâtare ... ashâum cvat drâjô haca âthrat cvat drâjô haca apat cvat drâjô haca baresmen frastairyât cvat drâjô haca nerebyô ashavabyô.
17: âat mraot ahurô mazdå, thrisata-gâim haca âthrat thrisata-gâim haca apat thrisata- gâim haca baresmen frastairyât thrigâim haca nerebyô ashavabyô.
18: aêtadha hê aête mazdayasna ainghå zemô pairi-daêzãn pairi-daêzayãn, hvarethaêibyô pascaêta âstayañta aête ýôi mazdayasna vastraêibyô pascaêta âstayañta aête ýôi mazdayasna.
19: draêjishtôtemaêshvaca niuruzdôtemaêshvaca aêtå hvarethå hvaratu aêtå vastrå vanghatu vîspem â ahmât ýat hanô vâ zaururô vâ pairishtâ-xshudrô vâ bavât.
20: âat ýat hanô vâ zaururô vâ pairishtâ-xshudrô vâ bavât aojishtemca dim pascaêta mazdayasna tañcishtemca vaêdhyôtememca upa-maitîm barezanghãm pãstô-frathanghem hê kameredhem vînâthayen ash-hvaretemaêibyô speñtô-mainyavanãm dâmanãm kerefsh-hvârãm kerefsh paiti nisrinuyât vayãm kahrkâsãm uityaojanô, avå hîm paiti mithnâiti vîspem dushmatemca duzhûxtemca duzhvarshtemca
21: ýezica hê anya akha shyaothna fravarshta paitita hê citha âat ýezi-shê anya akha shyaothna nôit fravarshta paititem ahe narsh ýavaêca ýavaêtâtaêca!
22: dâtare ... ashâum kô thritîm imãm zãm mazishta xshnaoma xshnâvayeiti, âat mraot ahurô mazdå, ýat bâ paiti fraêshtem vîkeñte angrô- mainyavanãm geredhãm.
23: dâtare ... ashâum kô tûirîm imãm zãm mazishta xshnaoma xshnâvayeiti, âat mraot ahurô mazdå, ýat bâ paiti fraêshtem kârayeiti spitama zarathushtra ýavanãmca vâstranãmca urvaranãmca hvarethôbairyanãm ýat vâ anâpem âi âpem kerenaoiti ýat vâ âpem âi anâpem kerenaoiti.
24: nôit zî îm zå shå ýâ darekha akarshta saêta ýâ karshya karshivata
aibish tat vanghêush aiwi-shôithna
idha carâiti huraodha
ýâ darekha aputhra aêti
aibish tat vanghêush arshânô.
25: ýô imãm zãm aiwi-verezyeiti spitama zarathushtra
hâvôya bâzvô dashinaca
dashina bâzvô haoyaca
upa hê gaonem baraiti mãnayen ahe ýatha-nâ fryô fryâi vañtaoe stareta gâtush sayamanô puthrem vâ gaonem vâ avi ava-baraiti.
26: ýô imãm zãm aiwi-verezyeiti spitama zarathushtra hâvôya bâzvô dashinaca dashina bâzvô haoyaca
âat aoxta îm zå, nara
ýô mãm aiwi-verezyeihi
hâvôya bâzvô dashinaca
dashina bâzvô haoyaca
27: bâdha idha âfrasâne danghubyô
bâdha idha aêni berethi
vîspå hvareñtîsh para-barãn
hãmberethwãm parô ýavahe.
28: ýô imãm zãm nôit aiwi-verezyeiti spitama zarathushtra hâvôya bâzvô dashinaca dashina bâzvô haoyaca
âat aoxta îm zå, nara
ýô mãm nôit aiwi-verezyeihi
hâvôya bâzvô dashinaca
dashina bâzvô haoyaca
29: bâdha idha hishtahe anyehe dvare srayanô hvareñtîsh peresemnaêshuca,
bâdha thwãm tarasca ånghânô
srasciñtîsh hvarethå bairyeiñte tê âbya bairyeiñte
ýaêshãm dim frâyô vohunãm.
30: dâtare gaêthanãm astvaitinãm ashâum kat asti daênayå mâzdayasnôish uruthware, âat mraot ahurô mazdå, ýat ukhrem paiti ýaokarshti spitama zarathushtra.
31: ýô ýaom kârayeiti hô ashem kârayeiti, hô daênãm mâzdayasnîm fravâza vazaite, hô imãm daênãm mâzdayasnîm frapinaoiti satem paitishtanãm hazangrem paiti-daranãm baêvare paiti ýasnô-kereitinãm.
32: ýat ýavô dayât âat daêva hvîsen ýat sudhush dayât âat daêva tusen ýat pishtrô dayât âat daêva uruthen ýat guñdô dayât âat daêva peredhen, idha mithnât daêva aipi-jaiñti nmâne ainghâi guñdayâi
zafare tafsãn aya masô
hãm-urvîsvånghô sadayeiti
ýat ýavô pourush bavât.
33: adha mãthrem tadha mairyât,
naêcish ahvareñtãm tva nôit ukhrãm ashayãm nôit ukhrãm vâstryãm nôit ukhrãm puthrôishtîm, hvâshaya zî vîspô anghush astvå jvaiñti ahvâshe framiryeite!
34: dâtare gaêthanãm astvaitinãm ashâum kô puxdhem imãm zãm mazishta xshnaoma xshnâvayeiti, âat mraot ahurô mazdå, ýat bâ paiti spitama zarathushtra ainghå zemô naire ashaone verezyât ashaya dadhâiti.
35: ýat bâ paiti spitama zarathushtra ainghå zemô naire ashaone verezyât ashaya vanghuya nôit dadhâiti avi tem spayât speñtayå ârmatôish temô âca vaêshô âca acishtem âca ahûm â vîspaca avi tikhra nimata!
36: dâtare gaêthanãm astvaitinãm ashâum ýat ainghå zemô nikañte spânasca irista naraêca irista naêmem ýâre- drâjô anuskañte kâ-hê asti citha, âat mraot ahurô mazdå, pañca sata upâzananãm upâzôit aspahe ashtraya pañca sata sraoshô-caranaya.
37: dâtare ... ashâum ýat ainghå zemô nikañte spânasca irista naraêca irista ýâre-drâjô anuskañte kâ hê asti citha, âat mraot ahurô mazdå, hazangrem upâzananãm upâzôit aspahe ashtraya hazangrem sraoshô-caranaya.
38: dâtare ... ashâum ýat ainghå zemô nikañte spânasca irista naraêca irista byâre-drâjô anuskañte kâ hê asti citha kâ-hê asti âperetish kat hê asti ýaozhdâthrem.
39: âat mraot ahurô mazdå, nava-hê asti citha nava-hê asti âperetish nôit hê asti ýaozhdâthrem anâperetha haca shyaothna ýavaêca ýavaêtâtaêca.
40: kva aêva, ýezi anghat âstûtô vâ aiwi-sravanô vâ daênãm mâzdayasnîm âat ýezi anghat anâstûtô vâ anaiwi-sravanô vâ daênãm mâzdayasnîm, aêtâcit aêibyô spånghaite âstavanaêibyô daênãm mâzdayasnîm everezenbyô pascaêta arathwya shyaothna.
41: spayeite zî spitama zarathushtra daêna mâzdayasnish narsh âstavanahe bañdem spayeite draoshem spayeite ashavakhnîm spayeite nasuspaêm spayeite anâperethem shyaothnem spayeite derezânô-peretem pârem spayeite vîspa tâ shyaothna ýâ-cica verezyeiti.
42: mãnayen ahe spitama zarathushtra daêna mâzdayasnish narsh ashaonô framerezaiti vîspem dushmatemca duzhûxtemca duzhvarshtemca ýatha vâtô derezi-takathrô thwâshem dashinât pairi framerezôit, [vohu idha zarathushtra hvarshtem shyaothnem verezimnem vanguhi daêna mâzdayasnish perenâyush cithãm thweresaiti]!
ashem vohû...!!

Fargard 4.

1: ýô naire nemangheñte
nôit nemô paiti-baraiti
tâyush nemanghô bavaiti
hazangha nemô-barahe aêshãmcit ithra vâ asni ithra vâ xshafne maêthanahe hvâi pairi-geurvayeite!
2: dâtare gaêthanãm astvaitinãm ashâum caiti aête mithra tava ýat ahurahe mazdå, âat mraot ahurô mazdå, xshvash ashâum zarathushtra paoiryô vacahinô bityô zastâ-marshtô thrityô pasu-mazô tûiryô staorô-mazô puxdhô vîrô-mazô xshtvô dainghu-mazô, [ýô dainghave hu-vaxshâi fradhemnahe varedhemnahe xrathwemnahe suyamnahe].
3: vacô paoirîm mithrem kerenaoiti zastô-masô adhât framarezaiti zastô-masô adhât añtare urvaitya fradathaiti, pasu-zamô adhât framarezaiti pasu-zamô adhât añtare urvaitya fradathaiti.
4: staorô-mazô adhât framarezaiti staorô- mazô adhât añtare urvaitya fradathaiti, vîrô-mazô adhât framarezaiti vîrô- mazô adhât añtare urvaitya fradathaiti, dainghu-mazô adhât framarezaiti dainghu-mazô adhât añtare urvaitya fradathaiti.
5: dâtare ... ashâum cvat aêshô mithrô aiwi-druxtô âstâraiti ýô vacahinô, âat mraot ahurô mazdå, thrish satâish hadha-cithanãm narãm nabânazdishtanãm para-baraiti.
6: dâtare ... ashâum cvat aêshô mithrô aiwi-druxtô âstâraiti ýô zastâ-marshtô, âat mraot ahurô mazdå, xshvash satâish hadha-cithanãm narãm nabânazdishtanãm para-baraiti.
7: dâtare ... ashâum cvat aêshô mithrô aiwi-druxtô âstâraiti ýô pasu-mazô, âat mraot ahurô mazdå, hapta satâish hadha-cithanãm narãm nabânazdishtanãm para-baraiti.
8: dâtare ... ashâum cvat aêshô mithrô aiwi-druxtô âstâraiti ýô staorô-mazô, âat mraot ahurô mazdå, ashta satâish hadha-cithanãm narãm nabânazdishtanãm para-baraiti.
9: dâtare ... ashâum cvat aêshô mithrô aiwi-druxtô âstâraiti ýô vîrô-mazô, âat mraot ahurô mazdå, nava satâish hadha-cithanãm narãm nabânazdishtanãm para-baraiti.
10: dâtare ... ashâum cvat aêshô mithrô aiwi-druxtô âstâraiti ýô dainghu-mazô, âat mraot ahurô mazdå, hazangrem hadha-cithanãm narãm nabânazdishtanãm para-baraiti.
11: dâtare ... ashâum ýô mithrem aiwi-druzhaiti ýim vacahinem kâ-hê asti citha, âat mraot ahurô mazdå, tishrô sata upâzananãm upâzôit aspahe ashtraya tishrô sata sraoshô-caranaya.
12: dâtare ... ashâum ýô mithrem aiwi-druzhaiti ýim zastâ-marshtem kâ-hê asti citha, âat mraot ahurô mazdå, xshvash sata upâzananãm upâzôit aspahe ashtraya xshvash sata sraoshô-caranaya.
13: dâtare ... ashâum ýô mithrem aiwi-druzhaiti ýim pasu-mazem kâ-hê asti citha, âat mraot ahurô mazdå, hapta sata upâzananãm upâzôit aspahe ashtraya hapta sata sraoshô-caranaya.
14: dâtare ... ashâum ýô mithrem aiwi-druzhaiti ýim staorô-mazem kâ-hê asti citha, âat mraot ahurô mazdå, ashta sata upâzananãm upâzôit aspahe ashtraya ashta sata sraoshô-caranaya.
15: dâtare ... ashâum ýô mithrem aiwi-druzhaiti ýim vîrô-mazem kâ-hê asti citha, âat mraot ahurô mazdå, nava sata upâzananãm upâzôit aspahe ashtraya nava sata sraoshô-caranaya.
16: dâtare ... ashâum ýô mithrem aiwi-druzhaiti ýim dainghu-mazem kâ-hê asti citha, âat mraot ahurô mazdå, hazangrem upâzananãm upâzôit aspahe ashtraya hazangrem sraoshô-caranaya!
17: ýô narsh snathem usehishtaiti aêtat hê âgereptem ýat frashusaiti aêtat hê avaoirishtem ýat dim aênô-manangha paiti-ashnaoiti aêtat hê aredush, puxdhemcit nâ aredushãm tanûm piryeite.
18: dâtare gaêthanãm astvaitinãm ashâum ýô narem âgereptem âgeurvayeiti kâ-hê asti citha, âat mraot ahurô mazdå, pañca upâzana aspahe ashtraya pañca sraoshô-caranaya bitîm dasa upâzana aspahe ashtraya dasa sraoshô-caranaya thritîm pañca-dasa upâzana aspahe ashtraya pañca-dasa sraoshô-caranaya.
19: tûirîm thrisatem upâzananãm upâzôit aspahe ashtraya thrisatem sraoshô-caranaya puxdhem pañcâsatem upâzananãm upâzôit aspahe ashtraya pañcâsatem sraoshô-caranaya xshtûm haptâitîm upâzananãm upâzôit aspahe ashtraya haptâitîm sraoshô- caranaya haptathem navaitîm upâzananãm upâzôit aspahe ashtraya navaitîm sraoshô-caranaya.
20: ashtemem aêtaêshãm shyaothenanãm verezimnem anuzvarshtât paiti paurvât kâ-hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
21: dâtare ... ashâum ýezi nôit uzvarezyât ýô narem âgereptem âgeurvayeiti kâ-hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
22: dâtare ... ashâum ýô narem avaoirishtem avaourvaêsaite kâ-hê asti citha, âat mraot ahurô mazdå, dasa upâzana aspahe ashtraya dasa sraoshô-caranaya bitîm pañca-dasa upâzana aspahe ashtraya pañca-dasa sraoshô-caranaya.
23: thritîm thrisatem upâzananãm upâzôit aspahe ashtraya thrisatem sraoshô-caranaya tûirîm pañcâsatem upâzananãm upâzôit aspahe ashtraya pañcâsatem sraoshô-caranaya puxdhem haptâitîm upâzananãm upâzôit aspahe ashtraya haptâitîm sraoshô- caranaya xshtûm navaitîm upâzananãm upâzôit aspahe ashtraya navaitîm sraoshô-caranaya.
24: haptathem aêtaêshãm shyaothenanãm verezimnem anuzvarshtât paiti paurvât kâ-hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
25: dâtare ... ashâum ýezi nôit uzvarezyât ýô narem avaoirishtem avaourvaêsaite kâ-hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
26: dâtare ... ashâum ýô narem aredusha snatha jaiñti kâ-hê asti citha, âat mraot ahurô mazdå, pañca-dasa upâzana aspahe ashtraya pañca-dasa sraoshô-caranaya
27: bitîm thrisatem upâzananãm upâzôit aspahe ashtraya thrisatem sraoshô-caranaya thritîm pañcâsatem upâzananãm upâzôit aspahe ashtraya pañcâsatem sraoshô-caranaya tûirîm haptâitîm upâzananãm upâzôit aspahe ashtraya haptâitîm sraoshô- caranaya puxdhem navaitîm upâzananãm upâzôit aspahe ashtraya navaitîm sraoshô-caranaya.
28: xshtûm aêtaêshãm shyaothenanãm ... sraoshô-caranaya.
29: dâtare ... ashâum ýezi nôit uzvarezyât ýô narem aredusha snatha jaiñti kâ-hê asti citha, âat mraot ahurô mazdå ... sraoshô-caranaya.
30: dâtare ... ashâum ýô narem vîxrûmeñtem hvarem jaiñti kâ-hê asti citha, âat mraot ahurô mazdå,
31: thrisatem upâzananãm upâzôit aspahe ashtraya thrisatem sraoshô-caranaya bitîm pañcâsatem upâzananãm upâzôit aspahe ashtraya pañcâsatem sraoshô-caranaya thritîm haptâitîm upâzananãm upâzôit aspahe ashtraya haptâitîm sraoshô- caranaya tûirîm navaitîm upâzananãm upâzôit aspahe ashtraya navaitîm sraoshô-caranaya.
32: puxdhem aêtaêshãm shyaothenanãm ... sraoshô-caranaya.
33: dâtare ... ashâum ýezi nôit uzvarezyât ýô narem vîxrûmeñtem hvarem jaiñti kâ-hê asti citha, âat mraot ahurô mazdå ... sraoshô-caranaya.
34: dâtare ... ashâum ýô narem tacat- vohunîm hvarem jaiñti kâ-hê asti citha, âat mraot ahurô mazdå, pañcâsatem upâzananãm upâzôit aspahe ashtraya pañcâsatem sraoshô-caranaya bitîm haptâitîm upâzananãm upâzôit aspahe ashtraya haptâitîm sraoshô-caranaya thritîm navaitîm upâzananãm upâzôit aspahe ashtraya navaitîm sraoshô-caranaya.
35: tûirîm aêtaêshãm shyaothenanãm ... sraoshô-caranaya.
36: dâtare ... ashâum ýezi nôit uzvarezyât ýô narem tacat-vohunîm hvarem jaiñti kâ-hê asti citha, âat mraot ahurô mazdå ... sraoshô-caranaya.
37: dâtare ... ashâum ýô narem astô- bidhem hvarem jaiñti kâ-hê asti citha, âat mraot ahurô mazdå, haptâitîm upâzananãm upâzôit aspahe ashtraya haptâitîm sraoshô-caranaya bitîm navaitîm upâzananãm upâzôit aspahe ashtraya navaitîm sraoshô-caranaya.
38: thritîm aêtaêshãm shyaothenanãm ... sraoshô-caranaya.
39: dâtare ... ashâum ýezi nôit uzvarezyât ýô narem astô-bidhem hvarem jaiñti kâ-hê asti citha, âat mraot ahurô mazdå ... sraoshô-caranaya.
40: dâtare ... ashâum ýô narem frazâbaodhanghem snathem jaiñti kâ-hê asti citha, âat mraot ahurô mazdå, navaitîm upâzananãm upâzôit aspahe ashtraya navaitîm sraoshô-caranaya.
41: bitîm aêtaêshãm shyaothenanãm ... sraoshô-caranaya.
42: dâtare ... ashâum ýezi nôit uzvarezyât ýô narem frazâbaodhanghem snathem jaiñti kâ-hê asti citha, âat mraot ahurô mazdå ... sraoshô-caranaya.
43: hâmô-shyaothna tê pascaêta bavaiñti ashahe paiti pañtãm ashahe paiti mãthrem ashahe paiti frasastîm!
44: ýaêca idha narô hâmô-daêna jasãn brâthra vâ haxaya vâ shaêtô-cinanghô vâ nâiri-cinanghô vâ xratu-cinanghô vâ ýezi shaêtô-cinanghô jasãn hãm idha shaêtem hãm-bârayen ýezi nâiri-cinanghô jasãn upa vâ nâirikãm vâdhayaêta.
45: ýezi xratu-cinanghô jasãn upa vâ mãthrem speñtem maraêta pourumca naême asne aparemca pourumca naême xshafne aparemca uxshne xrathwe vîdrvânahe ashât ashica nemanghâna uxshne xrathwe ýaonem âste, maidhyâi asnãmca xshafnãmca avanghabdaêta paiti asne paiti xshafne vîspem â ahmât ýat tå sravå dreñjayãn ýå paourva aêthrapatayô dreñjayãn!
46: hãm-taptibyô aiwyô câxrare nerebyô zarathushtra, mâ gêush mâ vastrahe hatô adhâitîm vaocôit.
47: adhaêca uiti nâirivaite zî-tê ahmât pourum framraomi spitama zarathushtra ýatha makhavô fravâxshôit vîsâne ahmât ýatha evîsâi puthrâne ahmât ýatha aputhrâi shaêtavatô ahmât ýatha ashaêtâi.
48: hâuca ayå narå vohu manô jâgerebushtarô anghat ýô gêush uruthware hãm-pâfrâiti ýatha hâu ýô nôit itha hô upa-meretô hâu asperenô-mazô hâu anumayô-mazô hâu staorô-mazô hâu vîrô-mazô.
49: aêshô zî narô paityeiñti astô vîdhôtush peshanaiti ýasca ishush hvâthaxtô peshanaiti ýasca zemakô peshanaiti kamnem vaste vanghanem ýasca mashîm drvañtem sâstârem kameredhaja peshanaiti ýasca ashemaokhem anashavanem anguharestâtem peshanaiti.
50: paoirîm aêtaêshãm shyaothenanãm verezimnem nôit bitîm, avadha aêtadha aêtahe shyaothnahe ýatha vaêtheñti ýatha aêtahmi anghvô ýat astvaiñti ayanghaênâish karetâish azdibîsh paiti ava-kerethyât aoshanghaithyåse-tanvô masyô vâ ahmâtcit.
51: avadha aêtadha aêtahe shyaothnahe ýatha vaêtheñti ýatha aêtahmi anghvô ýat astvaiñti ayanghaênâish fshêbîsh azdibîsh paiti ava-pashât aoshanghaithyåse-tanvô masyô vâ ahmâtcit.
52: avadha aêtadha aêtahe shyaothnahe ýatha vaêtheñti ýatha aêtahmi anghvô ýat astvaiñti satô-vîrem vaêmem anusô paidhyâite aoshanghaithyåse-tanvô masyô vâ ahmâtcit.
53: avadha aêtadha aêtahe shyaothnahe ýatha vaêtheñti ýatha aêtahmi anghvô ýat astvaiñti anusô pârem marezem ava- hishtât.
54: avadha aêtadha aêtahe shyaothnahe ýatha vaêtheñti ýatha aêtahmi anghvô ýat astvaiñti âpem saokeñtavaitîm zaranyâvaitîm vîthushavaitîm draogem vîthush apâithish rashnaoshca paiti-sanghem mithraheca aiwi-druxtem.
55: dâtare ... ashâum ýô âpem saokeñtavaitîm zaranyâvaitîm vîthushavaitîm draogem vîthush apâithish rashnaoshca paiti-sanghem mithraheca aiwi-druxtem kâ-hê asti citha, âat mraot ahurô mazdå, hapta sata upâzananãm upâzôit aspahe ashtraya hapta sata sraoshô-caranaya! ashem vohû...!!

Fargard 5.

1: nâ-tat para-irithyeiti avi jãfnavô raonãm â-tat merekhem uzvazaite haca bareshnavô gairinãm avi jãfnavô raonãm upa-tãm kehrpem franguharaiti ýãm iristahe mashyehe, â-tat merekhem uzvazaite haca jãfnavô raonãm avi bareshnavô gairinãm upa-tãm vanãm vazaite xraozhdvanãmca varedvanãmca avi dim vañta avi dim irita avi dim patita.
2: nâ-tat frashusaiti haca jãfnavô raonãm avi bareshnavô gairinãm upa-tãm vanãm aêiti ýãm hô merekhô âthre aêsmãn ishaiti, avi dim janaiti avi dim thweresaiti avi dim tâshti avi dim aiwi-raocayeiti âthrô ahurahe mazdå puthrem kâ- hê asti citha.
3: âat mraot ahurô mazdå, nôit spô-beretô nôit vayô-beretô nôit vehrkô-beretô nôit vâtô-beretô nôit maxshi-beretô nasush narem nôit âstryeiti.
4: ýezica aête nasâvô ýâ spô-beretaca vayô-beretaca vehrkô-beretaca vâtô-beretaca maxshi-beretaca nasush narem âstryeiñtîm ånghât ishare-shtâitya mê vîspô anghush astvå ishasem jit-ashem xraodat-urva peshô-tanush frêna ånghãm nasunãm ýå paiti âya zemâ irîrithare.
5: dâtare ... ashâum nâ-tat âpem hiñcaiti avi ýavô-carânîm ana-tâ vaidhîm ayå ana bitîm ana thritîm pasca tûirîm nasâum ava-karesheñti spânem vâ raozhem vâ vehrkem vâ kâ-hê asti citha.
6: âat mraot ahurô mazdå, nôit spô-beretô nôit vayô-beretô nôit vehrkô-beretô nôit vâtô-beretô nôit maxshi-beretô nasush narem nôit âstryeiti.
7: ýezica aête nasâvô ýâ spô-beretaca vayô-beretaca vehrkô-beretaca vâtô-beretaca maxshi-beretaca nasush narem âstryeiñtîm ånghât ishare-shtâitya mê vîspô anghush astvå ishasem jit-ashem xraodat-urva peshô-tanush frêna ånghãm nasunãm ýå paiti âya zemâ irîrithare!
8: dâtare ... ashâum âfsh narem jaiñti vâ, âat mraot ahurô mazdå, âfsh narem nôit jaiñti astô vîdhôtush dim bañdayeiti vayô dim bastem nayeiti âfsh uzvazaiti âfsh nivazaiti âfsh paiti- raêcayeiti vayô dim pascaêta franguhareñti,
athra adhât frajasaiti
baxta adhât nijasaiti.
9: dâtare ... ashâum âtarsh narem jaiñti vâ, âat mraot ahurô mazdå, âtarsh narem nôit jaiñti astô vîdhôtush dim bañdayeiti vayô dim bastem nayeiti âtarsh hañdazhaiti asta ushtânemca,
athra adhât frajasaiti
baxta adhât nijasaiti!
10: dâtare ... ashâum frâ hama saciñte atha aiwi-gâme kutha tê verezyãn aête ýôi mazdayasna, âat mraot ahurô mazdå, nmâne nmâne vîsi vîsi thrâyô kata uzdaithyãn aêtahe ýat iristahe.
11: dâtare ... ashâum cvañtô anghen aête kata aêtahe ýat iristahe, âat mraot ahurô mazdå, ýat hê nôit eredvô ånghanem vakhdhanem upa- janyât nôit frasha pâdhaêibya nôit zastaêibya vîtarem, aêshô zî asti dâityô kata aêtahe ýat iristahe.
12: aêtadha hê uzbaodhãm tanûm nidaithyãn bixshaparem vâ thrixshaparem vâ mâzdrâjahîm vâ vîspem â ahmât ýat frâ vayô patãn frâ urvara uxshyãn nyåñcô apa-tacin us vâtô zãm haêcayât.
13: âat ýat hîsh frâ vayô patãn frâ urvara uxshyãn nyåñcô apa-tacin us vâtô zãm haêcayât aêtadha hê aête mazdayasna aêtem kehrpem hvare-daresîm kerenaot.
14: ýezi nôit aête mazdayasna aêtem kehrpem hvare-daresîm kerenavãn ýâre-drâjô avavañtem ashavakhnyâi tãm cithãm daêsayô vîspem â ahmât nasunãmca aiwi-varshtanãm daxmanãmca aiwi-varshtanãm hixranãmca aiwi-varshtanãm vayanãmca franguharetanãm!
15: dâtare ... ashâum âpem zazâhi tûm ýô ahurô mazdå zrayanghat haca vouru-kashât hathra vâtemca dunmãnca,
16: avi nasûm vazâhi tûm ýô ahurô mazdå upa daxmem vazâhi tûm ýô ahurô mazdå upa hixrem vazâhi tûm ýô ahurô mazdå upa astem frazayayâhi tûm ýô ahurô mazdå anghaithîm frafrâvayâhi tûm ýô ahurô mazdå tâ hathra frafrâvayâhi avi zrayô pûitikem.
17: âat mraot ahurô mazdå,
aêvatha bâ zarathushtra
ýatha tûm erezvô vashanghe, âpem zazâmi azem ýô ahurô mazdå zrayanghat haca vouru-kashât hathra vâtemca dunmãnca,
18: avi nasûm vazâmi azem ýô ahurô mazdå upa daxmem vazâmi azem ýô ahurô mazdå upa hixrem vazâmi azem ýô ahurô mazdå upa astem frazayayâmi azem ýô ahurô mazdå anghaithîm frafrâvayâmi azem ýô ahurô mazdå tâ hathra frafrâvayâmi avi zrayô pûitikem.
19: tê hishteñti khzhare-khzhareñtîsh añtare aredhem zrayanghô, ýaozhdya taciñti âpô zrayanghat haca pûitikât avi zrayô vouru-kashem avi vanãm ýãm hvâpîm, athra mê urvarå raodheñti vîspå vîspô-saredhô satavaitinãm hazangravaitinãm baêvare baêvaranãm,
20: tâ hathra vîvârayemi
azem ýô ahurô mazdå
hvarethemca naire ashaone
vâstremca gave hudhånghe, ýavô mê mashyô hvarât vâstrem gave hudhånghe.
21: imat vanghô imat srayô
ýatha tûm erezvô vashanghe,
â-dim tâ vaca râmayat
ahurô mazdå ashava
ashavanem zarathushtrem, ýaozhdå mashyâi aipi-zãthem vahishta, hâ ýaozhdå zarathushtra ýâ daêna mâzdayasnish ýô hvãm anghvãm ýaozhdâite humatâishca hûxtâishca hvarshtâishca.
22: dâtare ... ashâum cû asti masyô vanghô srayô aêtem dâtem ýim vîdôyûm zarathushtri upairi anyâish sravâish masanaca vanghanaca srayanaca.
23: âat mraot ahurô mazdå, mãnayen bâ spitama zarathushtra aêtem dâtem ýim vîdôyûm zarathushtri upairi anyâish sravâish masanaca vanghanaca srayanaca ýatha zrayô vouru-kashem upairi anyå âpô.
24: mãnayen bâ spitama zarathushtra aêtem dâtem ýim vîdôyûm zarathushtri upairi anyâish sravâish masanaca vanghanaca srayanaca ýatha masyayå âfsh kasyanghãm apãm avi- frâdavaiti, mãnayen bâ spitama zarathushtra aêtem dâtem ýim vîdôyûm zarathushtri upairi anyâish sravâish masanaca vanghanaca srayanaca ýatha masyayå vana kasyanghãm vanãm aiwi-verenvaiti.
25: mãnayen bâ spitama zarathushtra aêtem dâtem ýim vîdôyûm zarathushtri upairi anyâish sravâish masanaca vanghanaca srayanaca ýatha imãm zãm âca pairica bvâva.
26: aoxtô ratush aoxtô sraoshâvarezô uzgereptât paiti draonât nava uzgereptât dâtât paiti draonât nava dâtât nisritât paiti draonât nava nisritât xshayeite hê pascaêta aêsha ýô ratush thrishum aêtahe cithå apangharshtêe, ýezica hê anya akha shyaothna fravarshta paitita hê citha, âat ýezi-shê anya akha shyaothna nôit fravarshta paititem ahe narsh ýavaêca ýavaêtâtaêca!
27: dâtare ... ashâum ýô narô hâmô-gâtvô nipaidhyeiñte hãm vâ paiti stairish hãm vâ paiti barezish paitica hê anya dva vâ nara anghen pañca vâ pañcâsatem vâ satem vâ hãm nâirinãm âat aêshãm narãm aêvô irithyât cvat añtare nerêsh aêsha druxsh ýâ nasush axtica pivatica âhitica frâshnaoiti.
28: âat mraot ahurô mazdå, ýezi anghat âthrava frâ-zî dvãsaiti spitama zarathushtra aêsha druxsh ýâ nasush ýezi aêvañdasô frâshnaoiti dasemem paiti-raêthwayeiti, âat ýezi anghat rathaêshtå frâ-zî dvãsaiti spitama zarathushtra aêsha druxsh ýâ nasush ýezi dasemem frâshnaoiti nâumem paiti-raêthwayeiti, âat ýezi anghat vâstryô fshuyãs frâ- zî dvãsaiti spitama zarathushtra aêsha druxsh ýâ nasush ýezi nâumem frâshnaoiti ashtemem paiti-raêthwayeiti.
29: âat ýezi anghat spâ pasush-haurvô frâ-zî dvãsaiti spitama zarathushtra aêsha druxsh ýâ nasush ýezi ashtemem frâshnaoiti haptathem paiti-raêthwayeiti, âat ýezi anghat spâ vish-haurvô frâ-zî dvãsaiti spitama zarathushtra aêsha druxsh ýâ nasush ýezi haptathem frâshnaoiti xshtûm paiti-raêthwayeiti.
30: âat ýezi anghat spâ vohunazgô frâ- zî dvãsaiti spitama zarathushtra aêsha druxsh ýâ nasush ýezi xshtûm frâshnaoiti puxdhem paiti-raêthwayeiti, âat ýezi anghat spâ taurunô frâ-zî dvãsaiti spitama zarathushtra aêsha druxsh ýâ nasush ýezi puxdhem frâshnaoiti tûirîm paiti-raêthwayeiti.
31: âat ýezi anghat spâ sukurenô frâ- zî dvãsaiti spitama zarathushtra aêsha druxsh ýâ nasush ýezi tûirîm frâshnaoiti thritîm paiti-raêthwayeiti, âat ýezi anghat spâ jazhush frâ-zî dvãsaiti spitama zarathushtra aêsha druxsh ýâ nasush ýezi thritîm frâshnaoiti bitîm paiti-raêthwayeiti.
32: âat ýezi anghat spâ aiwizush frâ-zî dvãsaiti spitama zarathushtra aêsha druxsh ýâ nasush ýezi bitîm frâshnaoiti paoirîm paiti-raêthwayeiti, âat ýezi anghat spâ vîzush frâ-zî dvãsaiti spitama zarathushtra aêsha druxsh ýâ nasush ýezi paoirîm frâshnaoiti paoirîm paiti-raêthwayeiti.
33: dâtare ... ashâum âat ýezi anghat spâ urupish cvat aêshô spâ ýô urupish speñtahe mainyêush dâmanãm hãm- raêthwayeiti cvat paiti-raêthwayeiti.
34: âat mraot ahurô mazdå, nôit aêsha spâ ýô urupish speñtahe mainyêush dâmanãm hãm-raêthwayeiti nôit paiti-raêthwayeiti anyô ahmât ýô janaiti fraca kushaiti â dim â-hishhaxti ýavaêca ýavaêtâtaêca.
35: dâtare ... ashâum âat ýezi anghat mairyô drvå bizañgrô avatha ashemaokhô anashava cvat speñtahe mainyêush dâmanãm hãm-raêthwayeiti cvat paiti-raêthwayeiti.
36: âat mraot ahurô mazdå, ýatha vazakhacit vish-hushô tarô ýâre meretô, jvô zî spitama zarathushtra mainyô drvå bizañgrô avatha ashemaokhô anashava speñtahe mainyêush dâmanãm hãm- raêthwayeiti jvô paiti-raêthwayeiti,
37: jvô âpem jaiñti jvô âtrem frâvayeiti jvô gãm varatãm azaite jvô narem ashavanem frazâbaodhanghem snathem vîkeret- ushtânem jaiñti nôit avatha meretô,
38: jvô zî spitama zarathushtra mairyô drvå bizañgrô avatha ashemaokhô anashava narem ashavanem hanghush hvarethaheca vastraheca draoshca nimataheca ayangheca apa-baraiti nôit avatha meretô!
39: dâtare ... ashâum ýôi nmânå hãm-barâmahi ashâum ahura mazda ahmi anghvô ýat astvaiñti âtremca baresmaca tashtaca haomaca hâvanaca âat pascaêta ahe nmânahe spâ vâ nâ vâ irithyât kutha tê verezyãn aête ýôi mazdayasna.
40: âat mraot ahurô mazdå, us haca aêibyô nmânaêibyô barayen spitama zarathushtra âtremca baresmaca tashtaca haomaca hâvanaca us haca iristem barayen mãnayen ahe ýatha nâ dâityô dâityayâi bairyeteca hvairyeteca.
41: dâtare ... ashâum kutha tê aête mazdayasna aêtem âtrem aiti barãn ava aêtem nmânem ýat aêshô nâ para-irithyât.
42: âat mraot ahurô mazdå, nava-xshaparem upa-mãnayen aête ýôi mazdayasna aiwi-gâme âat hama mâzdrâjahîm, pascaêta aête mazdayasna aêtem âtrem aiti barãn ava aêtem nmânem ýat aêshô nâ para-irithyât.
43: dâtare ... ashâum ýezica aête mazdayasna aêtem âtrem aiti barãn ava aêtem nmânem ýat aêshô nâ para- irithyât añtarât naêmât nava-xshaparahe añtarât naêmât mâzdrâjahîm kâ hê asti citha.
44: âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
45: dâtare ... ashâum ýat ahmi nmâne ýat mâzdayasnôish nâirika upas-puthrîm jasât aêvô-mâhîm vâ bimâhîm vâ thrimâhîm vâ cathru-mâhîm vâ pañca-mâhîm vâ xshvash-mâhîm vâ hapta-mâhîm vâ ashta-mâhîm vâ nava-mâhîm vâ dasa- mâhîm vâ aêtadha aêsha nâirika tadha aputhrîm nijasât uzushtana kutha tê verezyãn aête ýôi mazdayasna.
46: âat mraot ahurô mazdå, ýat ahmi nmâne ýat mâzdayasnôish fraêshtem ýaozhdâtô-zemôtememca hushô-zemôtememca kambishtemca aête pathå frayãn pasvasca staorâca âtremca ahurahe mazdå baresmaca ashaya frastaretem naremca ýim ashavanem.
47: dâtare ... ashâum cvat drâjô haca âthrat cvat drâjô haca apat cvat drâjô haca baresmen frastairyât cvat drâjô haca nerebyô ashavabyô.
48: âat mraot ahurô mazdå, thrisata-gâim haca âthrat thrisata-gâim haca apat thrisata- gâim haca baresmen frastairyât thrigâim haca nerebyô ashavabyô.
49: aêtadha hê aête mazdayasna ainghå zemô pairi-daêzãn pairi-daêzayãn hvarethaêibyô pascaêta âstayañta aête ýôi mazdayasna vastraêibyô pascaêta âstayañta aête ýôi mazdayasna.
50: dâtare ... ashâum cish aêsha nâirika paoirîm hvarethanãm hvarât.
51: âat mraot ahurô mazdå, gêush maêsmana âtryô-paiti-iristem thrish vâ shâmãn ýat vâ xshvash ýat vâ nava aête daxma upangharezaêta añtarât naêmât barethrishva uruthwô-hva,
52: âat pascaêta aipi-khzhaurvatãm aspayanãmca payanghãm gâvayanãmca maêshinanãmca buzyanãmca hãm-vaoirinãm us-vaoirinãm gãmca hvâstem anâpem ýaomca ashem anâpem madhuca anâpem.
53: dâtare ... ashâum cvat drâjô upa- mãnayen cvat drâjô upa-maitîm âste hvareñti gãmca ýaomca madhuca.
54: âat mraot ahurô mazdå, thrixshaparem upa-mãnayen thrixshaparem upa-maitîm âste hvareñti gãmca ýaomca madhuca, âat pasca thrixshaparât us tanûm snayaêta us vastrât gêush maêsmana apâca nava upa makhem paiti avatha ýaozhdayãn.
55: dâtare ... ashâum cvat drâjô upa- mãnayen cvat drâjô upa-maitîm âste pasca thrixshaparât ýûtô gâtush ýûtô hvaretha ýûtô vastra ýûtô anyaêibyô mazdayasnaêibyô.
56: âat mraot ahurô mazdå, nava-xshaparem upa-mãnayen nava-xshaparem upa-maitîm âste pasca thrixshaparât ýûtô gâtush ýûtô hvaretha ýûtô vastra ýûtô anyaêibyô mazdayasnaêibyô, âat pasca nava-xshaparât us tanûm snayaêta us vastrât gêush maêsmana apâca paiti avatha ýaozhdayãn.
57: dâtare ... ashâum kat tâ vastra hãm- ýûta pasca ýaozhdâiti frasnâiti zaothre vâ hâvanâne vâ âtravaxshe vâ fraberethre vâ âberete vâ âsnâthre vâ raêthwishkare vâ sraoshâvareze vâ athaurune vâ mashyâi rathaêshtâi vâ vâstryâi vâ fshuyañte.
58: âat mraot ahurô mazdå, nôit tâ vastra hãm-ýûta pasca ýaozhdâiti frasnâiti zaothre nôit hâvanâne nôit âtravaxshe nôit fraberethre nôit âberete nôit âsnâthre nôit raêthwishkare nôit sraoshâvareze nôit athaurune mashyâi nôit rathaêshtâi nôit vâstryâi fshuyañte.
59: ýat ahmi nmâne ýat mâzdayasnôish nâirika daxshtavaiti anghat ýat vâ skeñdô aipi-jatô pishtrô aipi- iritô gâtush aêtadha aêtahe âste stairishca barezishca hãm-verenåñte vîspem â ahmât ýat hãm-ci zastô frîne nizhbarât.
60: nôit zî ahurô mazdå ýånghuyanãm avaretanãm paiti-ricya daithe nôit asperenô-mazô nôit avacinô-mazô ýavat aêsha carâitika avi mãm harekê harecayât.
61: ýezica aête mazdayasna upairi aêtem iristem avi mãm harekê herezyât ýavat aêsha carâitika avi mãm harekê harecayât jvascit nôit bvat ashava meshascit nôit baxshaiti vahishtahe anghêush,
62: tem ahûm paithyâiti ýim drvatãm temanghaênem temascithrem temanghem tem vå ahûm drvañtô shyaothnâish hvâish hvâ-daêna nisirinuyât acishtâi anguhe! ashem vohû...!!

Fargard 6.

1: cvañtem drâjô zrvânem ainghå zemô anaidhya ýat ahmi spânasca narasca para-irithiñti, âat mraot ahurô mazdå, ýâre-drâjô ashâum zarathushtra ainghå zemô anaidhya ýat ahmi spânasca narasca para-irithiñti,
2: mâca pascaêta mazdayasna tãm zãm kârayen mâ âpô herezayen ýat ahmi spânasca narasca para-irithiñti añtarât naêmât ýâre-drâjô vasô pascaêta mazdayasna tãm anyãm zãm kârayen vasô âpô herezayen.
3: ýezi mazdayasna tãm zãm kârayen ýezi âpô herezayen ýat ahmi spânasca narasca para-irithiñti añtarât naêmât ýâre-drâjô nasuspaêm pascaêta âstryåñte aête ýôi mazdayasna apasca zemasca urvarayåsca.
4: dâtare ... ashâum ýezi mazdayasna tãm zãm kârayen ýezi âpô herezayen ýat ahmi spânasca narasca para-irithiñti añtarât naêmât ýâre-drâjô kâ-hê asti citha.
5: âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
6: dâtare ... ashâum ýezi vasen mazdayasna zãm raodhayãm hixtayaêca karshtayaêca parakañtayaêca kutha tê verezyãn aête ýôi mazdayasna.
7: âat mraot ahurô mazdå, aêtadha hê aête mazdayasna ainghå zemô pairishayañta aêtanghãm astãmca varesãmca spâmãmca mûthrãmca vanghutâtãmca.
8: dâtare ... ashâum ýezi nôit pairishåñte aêtanghãm astãmca varesãmca spâmãmca mûthrãmca vanghutâtãmca kâ-hê asti citha.
9: âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
10: dâtare ... ashâum ýô astem upangharezaiti sûnô vâ para-iristahe mashyehe vâ avavat aipi ýatha kasishtahe erezvô fratemem tbishish ýezi ahmya irithyeiti ûthem vâ ûthô-tâs vâ kâ-hê asti citha.
11: âat mraot ahurô mazdå, thrisatem upâzananãm upâzôit aspahe ashtraya thrisatem sraoshô-caranaya.
12: dâtare ... ashâum ýô astem upangharezaiti sûnô vâ para-iristahe mashyehe vâ avavat aipi ýatha madhemahe erezvô fratemem tbishish ýezi ahmya irithyeiti ûthem vâ ûthô-tâs vâ kâ-hê asti citha.
13: âat mraot ahurô mazdå, pañcâsatem upâzananãm upâzôit aspahe ashtraya pañcâsatem sraoshô-caranaya.
14: dâtare ... ashâum ýô astem upangharezaiti sûnô vâ para-iristahe mashyehe vâ avavat aipi ýatha masishtahe erezvô fratemem tbishish ýezi ahmya irithyeiti ûthem vâ ûthô-tâs vâ kâ-hê asti citha.
15: âat mraot ahurô mazdå, haptâitîm upâzananãm upâzôit aspahe ashtraya haptâitîm sraoshô-caranaya.
16: dâtare ... ashâum ýô astem upangharezaiti sûnô vâ para-iristahe mashyehe vâ erezu-stavanghem vâ peresu-masanghem vâ ýezi ahmya irithyeiti ûthem vâ ûthô-tâs vâ kâ- hê asti citha.
17: âat mraot ahurô mazdå, navaitîm upâzananãm upâzôit aspahe ashtraya navaitîm sraoshô-caranaya.
18: dâtare ... ashâum ýô astem upangharezaiti sûnô vâ para-iristahe mashyehe vâ baêerezu-stavanghem vâ biperesu-masanghem vâ ýezi ahmya irithyeiti ûthem vâ ûthô-tâs vâ kâ- hê asti citha.
19: âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
20: dâtare ... ashâum ýô astem upangharezaiti sûnô vâ para-iristahe mashyehe vâ bâzu-stavanghem vâ sraoni-masanghem vâ ýezi ahmya irithyeiti ûthem vâ ûthô-tâs vâ kâ- hê asti citha.
21: âat mraot ahurô mazdå, cathwârô sata upâzananãm upâzôit aspahe ashtraya cathwârô sata sraoshô-caranaya.
22: dâtare ... ashâum ýô astem upangharezaiti sûnô vâ para-iristahe mashyehe vâ avavat aipi ýatha narsh vakhdhanem ýezi ahmya irithyeiti ûthem vâ ûthô-tâs vâ kâ-hê asti citha.
23: âat mraot ahurô mazdå, xshvash sata upâzananãm upâzôit aspahe ashtraya xshvash sata sraoshô-caranaya.
24: dâtare ... ashâum ýô vîspãm haurvãm tanûm upangharezaiti sûnô vâ para-iristahe mashyehe vâ ýezi ahmya irithyeiti ûthem vâ ûthô-tâs vâ kâ-hê asti citha.
25: âat mraot ahurô mazdå, hazangrem upâzananãm upâzôit aspahe ashtraya hazangrem sraoshô-caranaya!
26: dâtare ... ashâum ýat aête ýôi mazdayasna pâdha ayañtem vâ taciñtem vâ baremnem vâ vazemnem vâ taci-apaya nasâum frajasãn kutha tê verezyãn aête ýôi mazdayasna.
27: âat mraot ahurô mazdå, mat aothranãm framuxti mat vastranãm nidhâiti upa- mãnayen zarathushtra frasha frayôit iristem uzbarôit âpô zarathushtra â-zañgaêibyascit âpô â-zhnubyascit âpô â-maidhyãnascit âpô â-nereberezascit âpô vîspem â ahmât ýadhôit upa-jasôit iristãm tanûm.
28: dâtare ... ashâum ýezica aête nasâvô frithyeitica puyetica kutha tê verezyãn aête ýôi mazdayasna.
29: âat mraot ahurô mazdå, ýavat cvatca hê zastaêibya hañgeurvayãn aêtavat apat haca nizhbârayen hushe zeme nidaithyãn nôit astãm nôit varsãm nôit spâmãm nôit mûthrãm nôit vanghutâtãm pairi- spâiti apãm âstryåñte.
30: dâtare ... ashâum cvat aêtanghå âpô ýat armaêshtayå aêsha druxsh ýâ nasush axtica pivatica âhitica frâshnaoiti.
31: âat mraot ahurô mazdå, xshvash-gâim kemcit paiti cathrushanãm vîspem â ahmât aêsha âfsh ayaozhdya anaiwish-hvaretha ýavat aêsha nasush nizhbereta, us haca nasâvô aêtavat apat haca nizhbârayen hushe zeme nidaithyãn.
32: ainghå âpô para-hiñcayen ýat vâ naêmem ýat vâ thrishum ýat vâ cathrushum ýat vâ pangtanghum ýezi tûtava navât tûtava, pasca nasâvô nizhberethi pasca âpô para-hixti aêsha âfsh ýaozhdya bavaiti vasô aiwish-hvaretha pasubya vîraêibya hamatha ýatha paracit.
33: dâtare ... ashâum cvat aêtanghå âpô ýat câtayå uzuityåsca aêsha druxsh ýâ nasush axtica pivatica âhitica frâshnaoiti.
34-35: âat mraot ahurô mazdå, vîspem â ahmât aêsha âfsh ayaozhdya anaiwish- hvaretha ýavat aêsha nasush nizhbereta, us haca ... ýatha paracit.
36: dâtare ... ashâum cvat aêtanghå âpô ýat snaêzhiñtyâica srasciñtyâica aêsha druxsh ýâ nasush axtica pivatica âhitica frâshnaoiti.
37: âat mraot ahurô mazdå, thrigâim kemcit paiti cathrushanãm vîspem â ahmât aêsha âfsh ayaozhdya anaiwish-hvaretha ýavat aêsha nasush nizhbereta, us haca nasâvô aêtavat apat haca nizhbârayen hushe zeme nidaithyãn.
38: pasca nasâvô nizhberethi pasca âpô vîtaxti aêsha âfsh ýaozhdya bavaiti vasô aiwish-hvaretha pasubya vîraêibya hamatha ýatha paracit.
39: dâtare ... ashâum cvat aêtanghå âpô ýat frâtat-caretayå aêsha druxsh ýâ nasush axtica pivatica âhitica frâshnaoiti.
40: âat mraot ahurô mazdå, thrigâim nyâpem nava-gâim paityâpem xshvash-gâim anaidhîm vîspem â ahmât ... nidaithyãn.
41: pasca nasâvô nizhberethi pasca âthritîm aiwi-varaiti aêsha âfsh ýaozhdya bavaiti vasô aiwish-hvaretha pasubya vîraêibya hamatha ýatha paracit!
42: dâtare ... ashâum kat tâ haoma ýaozhdayãn anghen ashâum ahura mazda ýâ nasâum ava-bereta sûnô vâ para- iristahe mashyehe vâ.
43: âat mraot ahurô mazdå, ýaozhdayãn anghen ashâum zarathushtra nôit haomô hutô axtish nôit mahrkô nôit nasush ava-beretô ava aête ahuta ýatha cathwârô erezvô aêtaêshãmca zemô nidaithyãn añtare aredhem nmânahe vîspem â ahmât ýat hê ýâre-drâjô sacâite, âat pasca ýâre-drâjô vasô hvarethå anghen nerebyô ashavabyô hamatha ýatha paracit!
44: dâtare ... ashâum kva narãm iristanãm tanûm barâma ahura mazda kva nidathâma.
45: âat mraot ahurô mazdå, barezishtaêshvaca paiti gâtushva spitama zarathushtra ýadhôit dim bâidhishtem avazanãm sûnô vâ kerefsh- hvarô vayô vâ kerefsh-hvarô.
46: aêtadha hê aête mazdayasna aêtem iristem nidarezayen havaêibya pâdhaêibya hvaêpathyâca varsa ayanghaênem vâ zarshtvaênem vâ fravâxshaênem vâ ýezi nôit sûnô vâ kerefsh-hvarô vayô vâ kerefsh-hvarô aêtanghãm astãm avi apãmca urvaranãmca bareñtem frajasãn.
47: dâtare ... ashâum ýezi nôit nidarezyåñte aêtadha hê aête sûnô vâ kerefsh-hvarô vayô vâ kerefsh-hvarô aêtanghãm astãm avi apãmca urvaranãmca bareñtem frajasât kâ-hê asti citha.
48: âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
49: dâtare ... ashâum kva narãm iristanãm azdibîsh barâma ahura mazda kva nidathâma.
50: âat mraot ahurô mazdå, uzhdânem hê adhât kerenaot upairi spânem upairi raozhem upairi vehrkem anaiwi-vareñtîm upara-naêmât apô ýat vairyayå
51: ýezi tavãn aête mazdayasna ýezi asânaêshva ýezi vîcicaêshva ýezi tûtuxshva, ýezi nôit tavãn aête mazdayasna hvâ-stairish hvâ-barezish raocå aiwi-varena hvare-daresya hê zeme paiti nidaithîta! ashem vohû...!!

Fargard 7.

1: peresat zarathushtrô ahurem mazdãm, ahura mazda mainyô spênishta dâtare gaêthanãm astvaitinãm ashâum kat tâ nara irista aêsha druxsh ýâ nasush upa- dvãsaiti.
2: âat mraot ahurô mazdå, ishare pasca para-iristîm spitama zarathushtra us haca baodhô ayât aêsha druxsh ýâ nasush upa-dvãsaiti apâxedhraêibyô naêmaêibyô maxshi kehrpa erekhaitya frashnaosh apazadhanghô akaranem driwyå ýatha zôizhdishtâish xrafstrâish.
3: dâtare ... ashâum âat ýat aête ýâ spô-jataca vehrkô-jataca ýâtu-jataca tbaêshô-jataca vaêmô-jataca mashyô-jataca zûrô-jataca ãzô-jataca cvañtem pascaêta zrvânem aêsha druxsh ýâ nasush upa-dvãsaiti.
4: âat mraot ahurô mazdå, asnyehe pascaêta anyehe rathwô aêsha druxsh ýâ nasush upa-dvãsaiti!
5-8: dâtare ... ashâum ýô narô hâmô-gâtvô ... ýezi puxdhem frâshnaoiti tûirîm paiti-raêthwayeiti, aêtadha aêtahe âste stairishca barezishca hãm- verenåñte.
9: dâtare ... ashâum cvat aête stairishca barezishca aêsha druxsh ýâ nasush axtica pivatica âhitica frâshnaoiti.
10: âat mraot ahurô mazdå, upema aête stairishca añtema aiwi-varena aêsha druxsh ýâ nasush axtica pivatica âhitica frâshnaoiti!
11: dâtare ... ashâum kat tâ vastra ýaozhdayãn anghen ashâum ahura mazda ýâ nasâum ava-bereta sûnô vâ para- iristahe mashyehe vâ.
12: âat mraot ahurô mazdå, ýaozhdayãn anghen ashâum zarathushtra, kva aêva, ýezi anghat upaêtem vâ aiwi-naptîm vâ aiwi- iritîm vâ aiwi-vañtîm vâ aêtadha hê aête mazdayasna aêtå vastrå fraca kereñten nica kanayen.
13: âat ýezi nôit anghat upaêtem vâ aiwi-naptîm vâ aiwi-iritîm vâ aiwi-vañtîm vâ aêtadha hê aête mazdayasna aêtå vastrå frasnâdhayen maêsmana gêush.
14: ýezi anghat izaênish thrish frasnâdhayen maêsmana gêush thrish zemô hañkanayen thrish âpô frasnâdhayen thrish månghô upa-baodhayãn raocanem paiti nmânahe.
15: âat ýezi anghat ubdaênish xshvash frasnâdhayen maêsmana gêush xshvash zemô hañkanayen xshvash âpô frasnâdhayen xshvash månghô upa-baodhayãn raocanem paiti nmânahe.
16: aredvî nãma âpa spitama zarathushtra hâ mê âpô ýaozhdadhâiti hâ arshnãm xshudrå hâ xshathrinãm garewã hâ xshathrinãm paêma.
17-22: dâtare ... ashâum kat tâ vastra hãm- ýûta ... acishtâi anguhe.
23: dâtare ... ashâum kat tâ nara ýaozhdayãn anghen ashâum ahura mazda ýâ nasâum franguharât sûnô vâ para-iristahe mashyehe vâ.
24: âat mraot ahurô mazdå, ayaozhdayãn anghen ashâum zarathushtra, taêca narô geredhô-keretåsca zeredhô- keretåsca taêca narô spiti-dôithra cashmanat haca nizhbareñti tê aêshãm paiti srvê aêsha druxsh ýâ nasush upa-dvãsaiti, ayaozhdya pascaêta bavaiñti ýavaêca ýavaêtâtaêca.
25: dâtare ... ashâum kat tâ nara ýaozhdayãn anghen ashâum ahura mazda ýâ nasâum mat-gûthãm âpem â vâ âtrem â vâ ayaozhdya frabareñti.
26: âat mraot ahurô mazdå, ayaozhdayãn anghen ashâum zarathushtra,
tê sûnô madhaxayåsca
aogazdastema bavaiñti
ýôi nasu-kereta drvañtô
tê haêcanghô avâstrahe
aogazdastema bavaiñti
ýôi nasu-kereta drvañtô,
27: tê zemô daêvô-dâtahe
gaojanô jaiwi-vafrahe
upa-srvatô xrûtahe
akhavatô duzhdånghahe
aogazdastema bavaiñti
ýôi nasu-kereta drvañtô, tê aêshãm paiti srvê aêsha druxsh ýâ nasush upa-dvãsaiti, ayaozhdya pascaêta bavaiñti ýavaêca ýavaêtâtaêca.
28: dâtare ... ashâum kat tâ aêsma ýaozhdayãn anghen ashâum ahura mazda ýâ nasâum ava-bereta sûnô vâ para- iristahe mashyehe vâ.
29: âat mraot ahurô mazdå, ýaozhdayãn anghen ashâum zarathushtra, kva aêva, ýezi aêsha nasush anaiwi-khnixta sûnô vâ kerefsh-hvarô vayô vâ kerefsh-hvarô vîtasti-drâjô ýat hushanãm frârâthni-drâjô ýat naptanãm ainghå zemô nidaithyãn kemcit paiti cathrushanãm hakeret âpô vîsrascayen atha ýaozhdayãn.
30: âat ýezi nasush aiwi-khnixta sûnô vâ kerefsh-hvarô vayô vâ kerefsh-hvarô frârâthni-drâjô ýat hushanãm frabâzu-drâjô ýat naptanãm ainghå zemô nidaithyãn kemcit paiti cathrushanãm hakeret âpô vîsrascayen atha ýaozhdayãn.
31: aêtavat hushanãm aêsmanãm aêtavat naptanãm aêtavat xraozhdvanãm aêtavat varedvanãm ainghå zemô nidaithyãn kemcit paiti cathrushanãm hakeret âpô vîsrascayen atha ýaozhdayãn.
32: dâtare ... ashâum kat tâ ýavaca vâstraca ýaozhdayãn anghen ashâum ahura mazda ýâ nasâum ava-bereta sûnô vâ para-iristahe mashyehe vâ.
33: âat mraot ahurô mazdå, ýaozhdayãn anghen ashâum zarathushtra, kva aêva, ýezi aêsha nasush anaiwi-khnixta sûnô vâ kerefsh-hvarô vayô vâ kerefsh-hvarô frârâthni-drâjô ýat hushanãm frabâzu-drâjô ýat naptanãm ainghå zemô nidaithyãn kemcit paiti cathrushanãm hakeret âpô vîsrascayen atha ýaozhdayãn.
34: âat ýezi nasush aiwi-khnixta sûnô vâ kerefsh-hvarô vayô vâ kerefsh-hvarô frabâzu-drâjô ýat hushanãm vîbâzu-drâjô ýat naptanãm ainghå zemô nidaithyãn kemcit paiti cathrushanãm hakeret âpô vîsrascayen atha ýaozhdayãn.
35: aêtavat hushanãm ýavanãm aêtavat naptanãm aêtavat karshtanãm aêtavat akarshtanãm aêtavat deretanãm aêtavat aderetanãm aêtavat hvastanãm aêtavat ahvastanãm aêtavat batanãm aêtavat abatanãm aêtavat ashanãm aêtavat anashanãm aêtavat athreñtãm ýavanãm ainghå zemô nidaithyãn kemcit paiti cathrushanãm hakeret âpô vîsrascayen atha ýaozhdayãn!
36: dâtare ... ashâum ýat aête ýôi mazdayasna baêshazâi fravazåñte katârô paurvô âmayåñte mazdayasnaêibyô vâ daêvayasnaêibyô vâ.
37: âat mraot ahurô mazdå, daêvayasnaêibyô paurvô âmayayañta ýatha mazdayasnaêibyascit, ýat paoirîm daêvayasnô kereñtât ava hô miryâite ýat bitîm daêvayasnô kereñtât ava hô miryâite ýat thritîm daêvayasnô kereñtât ava hô miryâite anâmâtô zî aêshô ýavaêca ýavaêtâtaêca.
38: mâca pascaêta mazdayasna vîmâdhascit vîmâdhayañta mâca kereñtu mazdayasna mâca keretu irishyât, ýezi pascaêta mazdayasna vîmâdhascit vîmâdhayåñte ýezi kereñte mazdayasna ýezi keretu irishyât para hê irisheñtô raêshem cikayat baodhô-varshtahe cithaya.
39: ýat paoirîm daêvayasnô kereñtât apa hô jasât ýat bitîm daêvayasnô kereñtât apa hô jasât ýat thritîm daêvayasnô kereñtât apa hô jasât âmâtô zî aêshô ýavaêca ýavaêtâtaêca.
40: vasô pascaêta mazdayasna vîmâdhascit vîmâdhayañta vasô kereñtu mazdayasna vasô keretu bishazyât.
41: âthravanem bishazyât dahmayât parô âfritôit nmânahe nmânô-paitîm bishazyât nitemem staorem arejô vîsô vîspaitîm bishazyât madhemem staorem arejô zañtêush zañtupaitîm bishazyât akhrîm staorem arejô dainghêush dainghupaitîm bishazyât vâshem cathru-ýuxtem arejô.
42: ýat paoirîm nmânahe nmânô- paitîm nâirikãm bishazyât kathwa daênu arejô vîsô vîspaitîm nâirikãm bishazyât gava daênu arejô zañtêush zañtupaitîm nâirikãm bishazyât aspa daênu arejô dainghêush dainghupaitîm nâirikãm bishazyât ushtra daênu arejô.
43: vîsô puthrem bishazyât akhrîm staorem arejô akhrîm staorem bishazyât madhemem staorem arejô madhemem staorem bishazyât nitemem staorem arejô nitemem staorem bishazyât anumaêm arejô anumaêm bishazyât gêush hvarethahe arejô.
44: ýat pouru-baêshaza hañjasåñte spitama zarathushtra karetô-baêshazêsca urvarô-baêshazêsca mãthrô-baêshazêsca tem ithra hañjasåñte ýat mãthrem speñtem baêshazem, aêshô zî asti baêshazanãm baêshazyôtemô ýat mãthrem speñtem baêshazyô ýô narsh ashaonô haca uruthwãn bishazyât!
45: dâtare ... ashâum cvañtem drâjô zrvânem sairi mashya iriste zemê nidhâite raocå aiwi-varena hvare-daresya zemô bavaiñti.
46: âat mraot ahurô mazdå, ýâre-drâjô ashâum zarathushtra sairi mashya iriste zemê nidhâite raocå aiwi-varena hvare-daresya zemô bavaiñti.
47: dâtare ... ashâum cvañtem drâjô zrvânem sairi mashya iriste zemê nikañte havat-zemô bavaiñti.
48: âat mraot ahurô mazdå, pasca pañcâsatem saredhãm spitama zarathushtra sairi mashya iriste zemê nikañte havat-zemô bavaiñti.
49: dâtare ... ashâum cvañtem drâjô zrvânem sairi mashya iriste daxme nidhâite havat-zemô bavaiñti.
50: âat mraot ahurô mazdå, nôit nû para ahmât spitama zarathushtra ýat aêsha pãsnu raêthwât, haxshaêsha spitama zarathushtra kemcit anghêush astvatô aêtaêshva daxmaêshva vî-kañtêe.
51: ýasca mê aêtaêshãm ýat daxmanãm avavañtem mazô vîkânayât ýatha hê tanush anghat patitem hê manô anghat patitem vacô patitem shyaothnem uzvarshtem hê manô anghat uzvarshtem vacô uzvarshtem shyaothnem.
52: nôit zî ahmi paiti nairi dva mainyû rêna ava-stånghat, frasha fraya vahishtem â ahûm, berejayåñti-shê zarathushtra strêshca månghemca hvareca azemca hê berejaêm ýô dadhvå ahurô mazdå, ushta itha tê nare ýô ithyejanghatat haca anghaot aithyejanghem ahûm â frafrå!
53: dâtare ... ashâum kva asti daêvô kva daêvayâzô kva daêvanãm hañdvarenô kva daêvanãm hãm-patanô kva daêva hañdvareñti pañcasakhnâi satakhnâishca satakhnâi hazangrakhnâishca hazangrakhnâi baêvarekhnâishca baêvarekhnâi ahãshtakhnâishca.
54: âat mraot ahurô mazdå, aêtaêshva daxmaêshva spitama zarathushtra ýôi paiti âya zemâ bavaiñti uzdaêza uzdishta ýahmya narô irista nidhayeiñte hâu asti daêvô hâu daêvayâzô hâu daêvanãm hañdvarenô hâu daêvanãm hãm- patanô avat daêva hañdvareñti pañcasakhnâi satakhnâishca satakhnâi hazangrakhnâishca hazangrakhnâi baêvarekhnâishca baêvarekhnâi ahãshtakhnâishca.
55: mãnayen bâ spitama zarathushtra aête ýôi daêva aêtaêshva daxmaêshva gangheñti apâca vaêpeñti ýatha aêtahmi anghvô ýat astvaiñti ýûzhem ýôi mashyâka hvaretha hvâsta huyâresh gãmca hvâstem hvaraiti nâuiti hâ aête ýôi mashyâka hvareñti framanyete.
56: aêshô zî asti daêvanãm rapakô vîspem â ahmât ýat aêsha gañtish upanghacaiti.
57: aêtaêshva daxmaêshva hãm-bavaiñti axtishca garenushca tafnushca naêzasca sârastishca akhôstishca pourushu asti varsô.
58: aêtaêshva daxmaêshva mashya hãm mereñcyãstema bavaiñti pasca hû frâshmô-dâitîm.
59: taêca ýâ kasu-xratush masyô-xrathwãm nôit paitishaiti thrishum aêtaêshãm axtinãm jãnayô dreñjaiti aoshtaca paiti dumnaca thrivataca gaêsush!
60-69: dâtare ... ashâum ýat ahmi nmâne ýat mâzdayasnôish nâirika upas-puthrîm jasât ... apâca nava upa makhem paiti avatha ýaozhdayãn.
70: dâtare ... ashâum ýezica hê hãm tafnô jasât avi tanuye zôishnuye ýezica hê dva ýaska avi acishtô âjasât ýasca shudhô ýasca tarshnô hvarât aêsha nâirika âpem.
71: âat mraot ahurô mazdå, hvarât avat hê asti masyô arethem ýat ushtânem buñjayât para kahmâicit dahmanãm dahmâhu vaêthâhu dahmaca ashavanasca, adha aêsha nâirika zastô-maiti âpem franguharât, âat vô ýûzhem ýôi mazdayasna cithãm frâthweresaêta aoxtô ratush aoxtô sraoshâvarezô cithãm frâthweresaiti.
72: kâ-hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya!
73: dâtare ... ashâum kat tâ tashta ånguharena ýaozhdayãn anghen ashâum ahura mazda ýâ nasâum ava-bereta sûnô vâ para-iristahe mashyehe vâ.
74: âat mraot ahurô mazdå, ýaozhdayãn anghen ashâum zarathushtra, kva aêva, ýezi anghat zarenaênish hakeret frasnâdhayen maêsmana gêush hakeret zemô uzdâthayen hakeret âpô frasnâdhayen atha ýaozhdayãn.
75: âat ýezi anghat erezataênish bish frasnâdhayen maêsmana gêush bish zemô uzdâthayen bish âpô frasnâdhayen atha ýaozhdayãn, âat ýezi anghat ayanghaênish thrish frasnâdhayen maêsmana gêush thrish zemô uzdâthayen thrish âpô frasnâdhayen atha ýaozhdayãn, âat ýezi anghat haosafnaênish cathrush frasnâdhayen maêsmana gêush cathrush zemô uzdâthayen cathrush âpô frasnâdhayen atha ýaozhdayãn, âat ýezi anghat zarshtvaênish xshvash frasnâdhayen maêsmana gêush xshvash zemô uzdâthayen xshvash âpô frasnâdhayen atha ýaozhdayãn, âat ýezi anghat zemaênish drvaênish fravâxshaênish ýavaêtâite ayaozhdya.
76: dâtare ... ashâum kat tâ gêush ýaozhdayãn anghen ashâum ahura mazda ýâ nasâum franguharât sûnô vâ para-iristahe mashyehe vâ.
77: âat mraot ahurô mazdå, ýaozhdayãn anghen ashâum zarathushtra, nôit payô fshuta zaothre nôit gêush zaothre baresmaine paiti-baire añtarât naêmât ýâre-drâjô âat pasca ýâre-drâjô vasô hvarethå anghen nerebyô ashavabyô hamatha ýatha paracit.
78: kô hô anghat ahura mazda ýô ashem mainimnô ashem isemnô ashem aparaodhayeite ashemca mainimnô drujimca vînasti.
79: âat mraot ahurô mazdå, hô bâ anghat ashâum zarathushtra ýô ashem mainimnô ashem isemnô ashem aparaodhayeite ashemca mainimnô drujimca vînasti ýô nasumaitîm âpem vîzaothrãm frabaraiti ýô upa-naxturushu tãthraêshu vîzaothrãm frabaraiti!

Fargard 8.

1: âat ýat dâuru upa-darane vâ nimatô aiwi-varane vâ spâ vâ nâ vâ irithyât kutha tê verezyãn aête ýôi mazdayasna.
2: âat mraot ahurô mazdå, upairi daxma aêshayãn vî daxma caêshayãn, ýezi aêtem iristem upa-berethwôtarem ava-zanãn ava aêtem iristem barayen avatha nmânem herezayen upa aêtem nmânem baodhayãn urvâsnayå vâ vohu-gaonahe vâ vohu-keretôish vâ hadhânaêpatayå vâ kãmcit vâ hubaoidhitemanãm urvaranãm.
3: ýezi aêtem nmânem upa-berethwôtarem ava- zanãn ava aêtem nmânem barayen avatha iristem herezayen upa aêtem nmânem baodhayãn urvâsnayå vâ ... urvaranãm.
4: dâtare ... ashâum ýat ahmi nmâne ýat mâzdayasnôish spâ vâ nâ vâ irithyât vâreñti vâ snaêzhiñti vâ bareñti vâ temanghãm vâ aiwi-gâtô ayãn vâ varetafshô varetô-vîre jaseñti kutha tê verezyãn aête ýôi mazdayasna.
5-7: âat mraot ahurô mazdå, ýat ahmi nmâne ýat mâzdayasnôish fraêshtem ... thrigâim haca nerebyô ashavabyô.
8: aêtadha hê aête mazdayasna ainghå zemô ava-kanem ava-kanayen maidhyôi paitishtâne xrûzhdisme maidhyôi narsh varedusme ava hê gâtûm barayen âtryehe vâ sairyehe vâ ava hê uparât naêmât barayen ishtyehe vâ zarshtvahe vâ hushô-zemanãm vâ pãsnûm.
9: aêtadha hê uzbaodhãm tanûm nidaithyãn bixshaparem vâ thrixshaparem vâ mâzdrâjahîm vâ vîspem â ahmât ýat frâ vayô patãn frâ urvara uxshyãn nyåñcô apa-tacin us vâtô zãm haêcayât.
10: âat ýat hîsh frâ vayô patãn frâ urvara uxshyãn nyåñcô apa-tacin us vâtô zãm haêcayât aêtadha hê aête mazdayasna ahe nmânahe upa-thweresãn upa-thweresayãn, dva dim nara isôithe vîzôishtãm vîzvâreñtãm makhna anaiwi-vastra zemôishtve vâ zarshtve vâ upa-skañbem vîcicaêshva dim paiti ainghå zemô nidaithyãn ýadhôit dim bâidhishtem avazanãn sûnô vâ kerefsh-hvarô vayô vâ kerefsh-hvarô.
11: aêtadha aête nasukasha nishhidhaêta avavat haca iristaêibyô ýatha thrigâim, âat vaocât ratush ashava mazdayasnaêibyô, mazdayasna hãm aête maêsma barayen ýaêibyô aête nasukasha frasnyåñte varesåsca tanûmca.
12: dâtare ... ashâum cayô âat aête maêsma anghen ashâum ahura mazda ýaêibyô aête nasukasha frasnyåñte varesåsca tanûmca pasvãm vâ staorãm vâ narãm vâ nâirinãm vâ.
13: âat mraot ahurô mazdå, pasvãm vâ staorãm vâ nôit narãm nôit nâirinãm paraget dvaêibya ýôi anghen hvaêtvadathasca hvaêtvadaithîshca aête maêsma maêzayañta ýaêibyô aête nasukasha frasnyåñte varesåsca tanûmca.
14: dâtare ... ashâum ýôi patha uzbareñte spânasca irista naraêca irista kat tå pathå frayãn pasvãm vâ staorãm vâ narãm vâ nâirinãm vâ âtrem vâ ahurahe mazdå puthrem baresma vâ ashaya frastaretem.
15: âat mraot ahurô mazdå, nôit tå pathå frayãn pasvãm nôit staorãm nôit narãm nôit nâirinãm nôit âtrem ahurahe mazdå puthrem nôit baresma ashaya frastaretem.
16: spânem zairitem cathru-cashmem spaêtem zairi-gaoshem âthritîm tadha aêtå pathå vîvâdhayañtu, aiwi-niticit spitama zarathushtra spânem zairitem cathru-cashmem spaêtem zairi-gaoshem aêsha druxsh ýâ nasush apa- dvãsaiti apâxedhraêibyô naêmaêibyô.
17: ýezi nôit upa vî spitama zarathushtra spânem zairitem cathru-cashmem nôit spaêtem zairi-gaoshem xshvazhayacit tadha aêtå pathå vîvâdhayañtu, aiwi-niticit spitama zarathushtra spânem zairitem cathru-cashmem spaêtem zairi-gaoshem aêsha druxsh ýâ nasush apa-dvãsaiti apâxedhraêibyô naêmaêibyô.
18: ýezi nôit upa-vî spitama zarathushtra spânem zairitem cathru-cashmem nôit spaêtem zairi-gaoshem nâumayâcit tadha aêtå pathå vîvâdhayañtu, aiwi-niticit spitama zarathushtra spânem zairitem cathru-cashmem spaêtem zairi-gaoshem aêsha druxsh ýâ nasush apa-dvãsaiti apâxedhraêibyô naêmaêibyô.
19: ýezi nôit ... zairi-gaoshem âthrava paoirîm aêtå pathå frayañtu vârethrakhnîsh vacô framrû, ýathâ ahû vairyô ... vâstârem.
20: kêm-nâ mazdâ ... frâvaocâ, kê verethrem jâ ... kahmâicît.
21: pâta-nô tbishyañtat pairi mazdåsca ârmaitishca speñtasca, nase daêvî druxsh nase daêvô-cithre nase daêvô-frakarshte nase daêvô-fradâiti apa druxsh nase apa druxsh dvâra apa druxsh vînase apâxedhre apa-nasyehe mâmereñcainîsh gaêthå astvaitîsh ashahe.
22: vasô pascaêta mazdayasna aêtå pathå frayãn pasvãm vâ staorãm vâ narãm vâ nâirinãm vâ âtrem vâ ahurahe mazdå puthrem baresma vâ ashaya frastaretem, vasô pascaêta mazdayasna ahe nmânahe myazdem daithyâresh gaomeñtem madhumañtem ýaozhdayãn anâsteretem hamatha ýatha paracit!
23: dâtare ... ashâum ýô vastrem upangharezaiti upairi aêtem iristem ubdaênem vâ îzaênem vâ avavat aipi ýatha narsh aothravana kâ hê asti citha, âat mraot ahurô mazdå, cathwârô sata upâzananãm upâzôit aspahe ashtraya cathwârô sata sraoshô-caranaya.
24: dâtare ... ashâum ýô vastrem upangharezaiti upairi aêtem iristem ubdaênem vâ îzaênem vâ avavat aipi ýatha karanem vayô-gravanem kâ hê asti citha, âat mraot ahurô mazdå, xshvash sata upâzananãm upâzôit aspahe ashtraya xshvash sata sraoshô-caranaya.
25: dâtare ... ashâum ýô vastrem upangharezaiti upairi aêtem iristem ubdaênem vâ îzaênem vâ avavat aipi ýatha ôyum vîrô-vastrem kâ hê asti citha, âat mraot ahurô mazdå, hazangrem upâzananãm upâzôit aspahe ashtraya hazangrem sraoshô-caranaya!
26: dâtare ... ashâum ýat anusô vifyeiti vifyeitica kâ hê asti citha, âat mraot ahurô mazdå, ashta sata upâzananãm upâzôit aspahe ashtraya ashta sata sraoshô-caranaya.
27: dâtare ... ashâum ýat usô vifyeiti vifyeitica kâ hê asti citha kâ hê asti âperetish kat hê asti ýaozhdâthrem, âat mraot ahurô mazdå, nava hê asti citha nava hê asti âperetish nôit hê asti ýaozhdâthrem anâperetha haca shyaothna ýavaêca ýavaêtâtaêca.
28-30: kva aêva ... perenâyush cithãm thweresaiti.
31: dâtare ... ashâum kô asti daêvô kô daêvayâzô kô daêvanãm xawzô kô daêvanãm xumbô kô daêvanãm kû-nâirîsh kô havãs daêvô kô vîspô daêvô kô para meretô daêvô kô pasca meretô mainyava daêva frabavaiñti.
32: âat mraot ahurô mazdå, arshaca vîptô arshaca vaêpayô spitama zarathushtra hâu asti daêvô hâu daêvayâzô hâu daêvanãm xawzô hâu daêvanãm xumbô hâu daêvanãm kû-nâirîsh hâu havãs daêvô hâu vîspô daêvô hô para meretô daêvô hô pasca meretô mainyava daêva frabavaiñti ýat mashyô mashîm xshudrå avi frangherezaiti ýat vâ mashyô mashyânãm xshudranãm para-geurvayeiti!
33: dâtare ... ashâum kat tâ nara ýaozhdayãn anghen ashâum ahura mazda ýâ nasâum ava-hishtât hishunãm tarô ýâre meretanãm.
34: âat mraot ahurô mazdå, ýaozhdayãn anghen ashâum zarathushtra, nôit hushô hishvâi sraêshyeiti, ýezi hushô hishvâi sraêshyeiñtîm ånghât ishareshtâitya mê vîspô anghush astvå ishasem jit-ashem xraodat-urva peshô-tanush frêna ånghãm nasunãm ýå paiti âya zemâ irîrithare.
35: dâtare ... ashâum kat tâ nara ýaozhdayãn anghen ashâum ahura mazda ýâ nasâum ava-bereta sûnô vâ para-iristahe mashyehe vâ.
36: âat mraot ahurô mazdå, ýaozhdayãn anghen ashâum zarathushtra, kva aêva, ýezi aêsha nasush aiwi-khnixta sûnô vâ kerefsh-hvarô vayô vâ kerefsh-hvarô âat hvãm tanûm pairi-ýaozhdaithîta gêush maêsmana apâca paiti avatha ýaozhdayãn.
37: âat ýezi nasush anaiwi-khnixta sûnô vâ kerefsh-hvarô vayô vâ kerefsh-hvarô paoirîm tadha dim mazdayasna ainghå zemô thrish makhem ava-kanayen âat hvãm tanûm pairi-ýaozhdaithîta gêush maêsmana nôit âpô, frâ-mê gadhwa zazayãn nizhbereta nôit ainizhbereta nizhberetât haca paourvaêibya.
38: bitîm tadha dim mazdayasna ainghå zemô thrish makhem ava-kanayen âat hvãm tanûm pairi-ýaozhdaithîta gêush maêsmana nôit âpô, frâ-mê gadhwa zazayãn nizhbereta nôit ainizhbereta nizhberetât haca paourvaêibya, vîspem â ahmât upa-mãnayen ýat hê upemem paiti vakhdhanahe upemât varsa hiku bavât.
39: thritîm tadha dim mazdayasna ainghå zemô thrish makhem ava-kanayen avavat haca paourvaêibya ýatha thrigâim, âat hvãm tanûm pairi-ýaozhdaithîta âpô nôit maêsmana.
40: zasta hê paoirîm frasnâdhayen, âat ýat hê zasta nôit frasnâta âat vîspãm hvãm tanûm ayaozhdâta kerenaoiti, âat ýat hê zasta frasnâta âthritîm pasca frasnâtaêibya zastaêibya bareshnûm hê vakhdhanem pourum paiti-hiñcôish.
41: dâtare ... ashâum ýezica âpô vanguhîsh bareshnûm vakhdhanem pourum paiti-jasaiti kva aêshãm aêsha druxsh ýâ nasush upa-dvãsaiti, âat mraot ahurô mazdå, paitisha hê hô-nâ añtarât naêmât brvat-byãm aêshãm aêsha druxsh ýâ nasush upa-dvãsaiti.
42: dâtare ... ýezica âpô vanguhîsh paitisha hê hô-nâ añtarât naêmât brvat-byãm paiti-jasaiti kva aêshãm aêsha druxsh ýâ nasush upa-dvãsaiti, âat mraot ahurô mazdå, pasca hê vakhdhanem aêshãm aêsha druxsh ýâ nasush upa-dvãsaiti.
43: dâtare ... ýezica âpô vanguhîsh pasca vakhdhanem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, paitisha hê paitish-hvarenem aêshãm aêsha druxsh ýâ nasush upa-dvãsaiti.
44: dâtare ... ýezica âpô vanguhîsh paitisha paitish-hvarenem paiti-jasaiti kva aêshãm aêsha druxsh ýâ nasush upa-dvãsaiti, âat mraot ahurô mazdå, dashinem hê gaoshem aêshãm aêsha druxsh ýâ nasush upa-dvãsaiti.
45: dâtare ... ýezica âpô vanguhîsh dashinem gaoshem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê gaoshem aêshãm aêsha druxsh ýâ nasush upa-dvãsaiti.
46: dâtare ... ýezica âpô vanguhîsh hôyum gaoshem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê suptîm aêshãm aêsha druxsh ýâ nasush upa-dvãsaiti.
47: dâtare ... ýezica âpô vanguhîsh dashinem suptîm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, haoyãm hê suptîm aêshãm aêsha druxsh ýâ nasush upa-dvãsaiti.
48: dâtare ... ýezica âpô vanguhîsh haoyãm suptîm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê kashem aêshãm aêsha druxsh ýâ nasush upa-dvãsaiti.
49: dâtare ... ýezica âpô vanguhîsh dashinem kashem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê kashem aêshãm aêsha druxsh ýâ nasush upa-dvãsaiti.
50: dâtare ... ýezica âpô vanguhîsh hôyum kashem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, paitisha hê paitivarem aêshãm aêsha druxsh ýâ nasush upa-dvãsaiti.
51: dâtare ... ýezica âpô vanguhîsh paitisha paitivarem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, parshti hê aêshãm aêsha druxsh ýâ nasush upa-dvãsaiti.
52: dâtare ... ýezica âpô vanguhîsh parshti paiti-jasaiti kva aêshãm aêsha druxsh ýâ nasush upa-dvãsaiti, âat mraot ahurô mazdå, dashinem hê fshtânem aêshãm aêsha druxsh ýâ nasush upa-dvãsaiti.
53: dâtare ... ýezica âpô vanguhîsh dashinem fshtânem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê fshtânem aêshãm aêsha druxsh ýâ nasush upa-dvãsaiti.
54: dâtare ... ýezica âpô vanguhîsh hôyum fshtânem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê peresâum aêshãm aêsha druxsh ýâ nasush upa-dvãsaiti.
55: dâtare ... ýezica âpô vanguhîsh dashinem peresâum paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê peresâum aêshãm aêsha druxsh ýâ nasush upa-dvãsaiti.
56: dâtare ... ýezica âpô vanguhîsh hôyum peresâum paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê sraonîm aêshãm aêsha druxsh ýâ nasush upa-dvãsaiti.
57: dâtare ... ýezica âpô vanguhîsh dashinem sraonîm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, haoyãm hê sraonîm aêshãm aêsha druxsh ýâ nasush upa-dvãsaiti.
58: dâtare ... ýezica âpô vanguhîsh haoyãm sraonîm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, haxti hê aêshãm aêsha druxsh ýâ nasush upa-dvãsaiti, ýezi nairyô anghat pasca hê pourum paiti- hiñcôish paitisha aparem ýezi strî anghat paitisha hê pourum paiti- hiñcôish pasca aparem.
59: dâtare ... ýezica âpô vanguhîsh haxti paiti-jasaiti kva aêshãm aêsha druxsh ýâ nasush upa-dvãsaiti, âat mraot ahurô mazdå, dashinem hê rânem aêshãm aêsha druxsh ýâ nasush upa-dvãsaiti.
60: dâtare ... ýezica âpô vanguhîsh dashinem rânem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê rânem aêshãm aêsha druxsh ýâ nasush upa-dvãsaiti.
61: dâtare ... ýezica âpô vanguhîsh hôyum rânem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê zhnûm aêshãm aêsha druxsh ýâ nasush upa-dvãsaiti.
62: dâtare ... ýezica âpô vanguhîsh dashinem zhnûm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê zhnûm aêshãm aêsha druxsh ýâ nasush upa-dvãsaiti.
63: dâtare ... ýezica âpô vanguhîsh hôyum zhnûm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê ascûm aêshãm aêsha druxsh ýâ nasush upa-dvãsaiti.
64: dâtare ... ýezica âpô vanguhîsh dashinem ascûm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê ascûm aêshãm aêsha druxsh ýâ nasush upa-dvãsaiti.
65: dâtare ... ýezica âpô vanguhîsh hôyum ascûm paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê zañgem aêshãm aêsha druxsh ýâ nasush upa-dvãsaiti.
66: dâtare ... ýezica âpô vanguhîsh dashinem zañgem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê zañgem aêshãm aêsha druxsh ýâ nasush upa-dvãsaiti.
67: dâtare ... ýezica âpô vanguhîsh hôyum zañgem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, dashinem hê frabdem aêshãm aêsha druxsh ýâ nasush upa-dvãsaiti.
68: dâtare ... ýezica âpô vanguhîsh dashinem frabdem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, hôyum hê frabdem aêshãm aêsha druxsh ýâ nasush upa-dvãsaiti.
69: dâtare ... ýezica âpô vanguhîsh hôyum frabdem paiti-jasaiti kva aêshãm aêsha druxsh ýâ nasush upa- dvãsaiti, âat mraot ahurô mazdå, adhairi haxem nivôiryete mãnayen ahe ýatha maxshyå parenem.
70: hakat nigereptaêibya añgushtaêibya uzgereptaêibya pâshnaêibya dashinem hê haxem paiti-hiñcôish âat hâ druxsh ýâ nasush hôyum haxem upa-dvãsaiti, hôyum hê haxem paiti-hiñcôish âat hâ druxsh ýâ nasush adhairi añgushta nivôiryete mãnayen ahe ýatha maxshyå parenem.
71: hakat nigereptaêibya pâshnaêibya uzgereptaêibya añgushtaêibya dashinãm hê añgushtãm paiti-hiñcôish, âat hâ druxsh ýâ nasush haoyãm añgushtãm upa-dvãsaiti, haoyãm hê añgushtãm paiti-hiñcôish
72: âat hâ druxsh ýâ nasush nivôiryete...!
73: dâtare ... ashâum ýat aête ýôi mazdayasna pâdha ayañtem vâ taciñtem vâ baremnem vâ vazemnem vâ âtrem nasupâkem frajasãn nasûm hãm-pacãn nasûm hâvayãn kutha tê verezyãn aête ýôi mazdayasna.
74: âat mraot ahurô mazdå, ava aêtem nasupâkem janaêta ava hê janayen apa aêtãm dishtãm barayen apa aêtem uzdânem barayen.
75: âthrat haca bânuwe aêsmã frasaocayâhi ýat vâ aêtanghãm urvaranãm ýat âtre-cithranãm ýat vâ aêtem âtrem uzdareza aêtayå urvarayå âtarecaresh vîca barôit vîca shâvayôit ýatha âsishtem frâvayôit.
76: ýatha tadha paoirîm hañdareza zemê aêtat paiti nidaithîta avavat haca âthrat nasupakât ýatha fratare-vîtastish vîca barôit vîca shâvayôit ýatha âsishtem frâvayôit.
77: ýatha tadha bitîm hañdareza ... ýatha tadha thritîm hañdareza ... ýatha tadha tûirîm hañdareza ... ýatha tadha puxdhem hañdareza ... ýatha tadha xshtûm hañdareza ... ýatha tadha haptathem hañdareza ... ýatha tadha ashtemem hañdareza....
78: ýatha tadha nâumem hañdareza zemê aêtat paiti nidaithîta avavat haca âthrat nasupakât ýatha fratare-vîtastish,
79: ýô aêsmô ashaya barat spitama zarathushtra urvâsnayå vâ vohu-gaonahe vâ vohu-keretôish vâ hadhânaêpatayå vâ kãmcit vâ hubaoidhitemanãm urvaranãm
80: ýahmât kahmâicit naêmanãm vâtô âthrô baoidhîm vîbaraiti ahmât kahmâicit naêmanãm hazangrakhna paiti-jasaiti âtarsh mazdå ahurahe daêvanãm mainyavanãm temascithranãm drvatãm bizhvat ýâtunãmca pairikanãmca.
81: dâtare ... ashâum ýô âtrem nasupâkem dâitîm gâtûm avi ava-baraiti cvat ahmâi naire mizhdem anghat pasca astasca baodhanghasca vî-urvîshtîm, âat mraot ahurô mazdå, ýatha aêtahmi anghvô ýat astvaiñti baêvare âtre-saokanãm dâitîm gâtûm avi ava-baraiti.
82: dâtare ... ýô âtrem uruzdipâkem ... cvat ahmâi naire mizhdem anghat pasca astasca baodhanghasca vî-urvîshtîm, âat mraot ahurô mazdå, ýatha aêtahmi anghvô ýat astvaiñti hazangrem âtre-saokanãm dâitîm gâtûm avi ava-baraiti.
83: ... ýô âtrem saire-hyat haca ... ýatha aêtahmi anghvô ýat astvaiñti pañca sata âtre-saokanãm....
84: ... ýô âtrem xumbat haca zemaini-pacikât ... cathwârô sata âtre-saokanãm dâitîm gâtûm....
85: ... ýô âtrem xumbat haca ýâmô-pacikât ... âat mraot ahurô mazdå, ýavat ahmâi ýamanãm paitinãm sairinãm aêtavat âtre-saokanãm hãm-bereta dâitîm gâtûm avi ava-baraiti.
86: ... ýô âtrem aonyat haca parô- berejyât ... âat mraot ahurô mazdå, ýavat ahmâi paitinãm urvaranãm aêtavat âtre-saokanãm hãm-bereta dâitîm gâtûm avi ava-baraiti.
87: ... ýô âtrem pisrat haca zaranyô- saêpât ... satem âtre-saokanãm....
88: ... ýô âtrem pisrat haca erezatô- saêpât ... navaitîm âtre-saokanãm....
89: ... ýô âtrem pisrat haca ayô- saêpât ... ashtâitîm âtre-saokanãm....
90: ... ýô âtrem pisrat haca haosafnaênô-saêpât ... haptâitîm âtre-saokanãm....
91-94: ýô âtrem tanurat haca ... xshvashtîm âtre-saokanãm.... ... ýô âtrem dishtat haca ... pañcâsatem âtre-saokanãm.... ... ýô âtrem aonyat haca taxairyât ... cathwaresatem âtre-saokanãm.... ... ýô âtrem pañtat haca staorô-payât ... thrisatem âtre-saokanãm....
95-96: ýô âtrem skairyat haca ... vîsaiti âtre-saokanãm.... ... ýô âtrem nazdishtat haca ... âat mraot ahurô mazdå, ýatha aêtahmi anghvô ýat astvaiñti dasa âtre-saokanãm dâitîm gâtûm avi ava-baraiti!
97: dâtare ... ashâum kat tâ nara ýaozhdayãn anghen ashâum ahura mazda ýâ nasâum ava-hishta
dûire asahi razanghãm.
98: âat mraot ahurô mazdå, ýaozhdayãn anghen ashâum zarathushtra, kva aêva, ýezi aêsha nasush aiwi-khnixta sûnô vâ kerefsh-hvarô vayô vâ kerefsh-hvarô âat hvãm tanûm pairi- ýaozhdaithîta gêush maêsmana thrisatathwem frasnâtêe thrisatathwem upa-snâtêe akhryãm paiti usnâitîm.
99: âat ýezi nasush anaiwi-khnixta sûnô vâ kerefsh-hvarô vayô vâ kerefsh-hvarô pañca-dasa frasnâtêe pañca-dasa upasnâtêe.
100: tacat paoirîm hâthrem frasha adhât tacôit ýat dim kascit anghêush astvatô aêtadha paiti ava-hishtêe berezyaoget vacô râzayãn, idha iristahe tanûm ava-hishta anaêshem manô anaêshem vacô anaêshem shyaothnem isaêta mê ýaozhdâitîm, tacat paoirîm upâiti ýezi dim nôit ýaozhdatheñte thrishûm aêtahe shyaothnahe baxsheñti.
101: tacat bitîm hâthrem ... bitîm upâiti, ýezi dim nôit ýaozhdatheñte naêmem aêtahe shyaothnahe baxsheñti.
102: tacat thritîm hâthrem ... thritîm upâiti, ýezi dim nôit ýaozhdatheñte vîspem aêtahe shyaothnahe baxsheñti.
103: frasha adhât tacôit ýat dim nazdishtem avi nmânemca vîsemca zañtûmca dah'yûmca aêtadha paiti ava-hishtêe berezyaoget vacô râzayãn, idha iristahe tanûm ava-hishta anaêshem manô anaêshem vacô anaêshem shyaothnem isaêta mê ýaozhdâitîm, ýezi dim nôit ýaozhdatheñte âat hvãm tanûm pairi-ýaozhdaithîta gêush maêsmana apâca paiti avatha ýaozhdayãn.
104: dâtare ... âat ýezi anghat âfsh añtarât naêmât aête patha âfsh cithãm fraorisaiti kâ hê asti citha.
105: âat mraot ahurô mazdå, cathwârô sata upâzananãm upâzôit aspahe ashtraya cathwârô sata sraoshô-caranaya.
106: dâtare ... âat ýezi anghat urvara añtarât naêmât aête patha âtarsh cithãm fraorisaiti kâ hê asti citha.
107: âat mraot ahurô mazdå, cathwârô ... sraoshô-caranaya, hâ hê asti citha hâ hê asti âperetish aipi- pâremnâi idha ashaone nôit anaipi-pâremnâi drujô nmâne haithyâ anghen astayô!
ashem vohû...!!

Fargard 9.

1: peresat zarathushtrô ahurem mazdãm, ahura mazda mainyô spênishta dâtare gaêthanãm astvaitinãm ashâum kutha aêtadha anghava astvaiñti mashyâka hãm- vaênåñte tê ýôi hãm-nasûm paiti-iristem tanûm ýaozhdaithyãn.
2: âat mraot ahurô mazdå, narem ashavanem spitama zarathushtra ýô anghat vacô arsh- vacô mãthrem peresô ashava ýô fraêshtem apivatâite daênayå mâzdayasnôish ýaozhdâthryât haca, hô perethwe ainghå zemô upa-thwarshti urvaranãm nava vî-bâzva drâjô kemcit paiti cathrushanãm
3-5: ýat anghat ainghå zemô vî-âpô- tememca vî-urvarô-tememca ... thrigâim haca nerebyô ashavabyô.
6: paoirîm upa makhem nithweresôish pasca hamô aiwi- gaitîm dva erezu nismahe pasca zemô isaosh aiwi-gaitîm ýatha cathwârô erezvô.
7: bitîm upa makhem ... thritîm upa makhem ... tûirîm upa makhem ... puxdhem ... xshtûm....
8: cvat haca anyô-anyaêibyô, ýatha aêvô-gâim, katha aêvô-gâim, ýatha thripadhem.
9: thrâyô anya makha nithweresôish pasca hamô aiwi-gaitîm dva erezu nismahe pasca zemô isaosh aiwi-gaitîm ýatha cathwârô erezvô, cvat haca paourvaêibya, ýatha thrigâim, katha thrigâim, ýatha gâmãn hañcayata, katha gâmãn hañcayata, ýatha nava-padhem.
10: karshascit frakârayôish tikhra xshathra vairyô, cvat haca makhaêibya, ýatha thrigâim, katha thrigâim, ýatha gâmãn hañcayata, katha gâmãn hañcayata, ýatha nava-padhem.
11: âat pasca dva-dasa karsha frakârayôish thrâyô ýim añtare vîta añtare thrâyô makha frakârayôish thrâyô ýim añtare vîta añtare xshvash makha frakârayôish thrâyô ýim añtare vîta añtare nava makha frakârayôish thrâyô añtareca avañtare pâreñtare makha frakârayôish thrâyô upa nava-padhem asânô âiti makha âiti barôish safem vâ dâdrum vâ zem-varetem vâ kãmcit vâ xrûzhdismanãm.
12: pascaêta ava tâ âiti makha âiti jasôit aêsha ýâ paiti-irista, âat tûm zarathushtra ava-hishtôish ava nishtarem karshayå atha imã vacô dreñjayôish, nemascâ ýâ ârmaitish îzhâcâ, paiti-shê âdhayôit aêsha ýâ paiti-irista, nemascâ ýâ ârmaitish îzhâcâ.
13: âat hâ druxsh avâstryeite kãmcit vâ vacanghãm snathâi angrahe manyêush drvatô snathâi aêshmahe xrvîm-draosh snathâi mâzainyanãm daêvanãm snathâi vîspanãm daêvanãm.
14: gaomaêzem pascaêta upangherezem ayanghaênem vâ srum vâ, ýezi srum paiti-hiñcâi graom ayasôish zarathushtra nava-pixem âdreñjayôish aom srum paurva-naêmât ahe gravahe.
15: zasta hê paoirîm frasnâdhayen, âat ýat hê zasta nôit frasnâta âat vîspãm hvãm tanûm ayaozhdâta kerenaoiti, âat ýat hê zasta frasnâta âthritîm pasca frasnâtaêibya zastaêibya barshnûm hê vakhdhanem paourum paiti-hiñcôish âat hâ druxsh ýâ nasush paitisha hê hô-nâ añtarât naêmât brvat-byãm upa-dvãsaiti.
16: paitisha hê hô-nâ añtarât naêmât brvat-byãm paiti-hiñcôish âat hâ druxsh ýâ nasush pasca vakhdhanem upa-dvãsaiti, pasca hê vakhdhanem paiti-hiñcôish âat hâ druxsh ýâ nasush paitisha paitishhvarenem upa-dvãsaiti, paitisha hê paitish-hvarenem paiti-hiñcôish âat hâ druxsh ýâ nasush dashinem gaoshem upa-dvãsaiti.
17: dashinem hê gaoshem paiti-hiñcôish âat hâ druxsh ýâ nasush hôyum gaoshem upa-dvãsaiti, hôyum hê gaoshem paiti-hiñcôish âat hâ druxsh ýâ nasush dashinem suptîm upa-dvãsaiti, dashinem hê suptîm paiti-hiñcôish âat hâ druxsh ýâ nasush haoyãm suptîm upa-dvãsaiti, haoyãm hê suptîm paiti-hiñcôish âat hâ druxsh ýâ nasush dashinem kashem upa-dvãsaiti.
18: dashinem hê kashem paiti-hiñcôish âat hâ druxsh ýâ nasush hôyum kashem upa-dvãsaiti, hôyum hê kashem paiti-hiñcôish âat hâ druxsh ýâ nasush paitisha paitivarem upa-dvãsaiti, paitisha hê paitivarem paiti-hiñcôish âat hâ druxsh ýâ nasush parshti upa-dvãsaiti.
19: parshti hê paiti-hiñcôish âat hâ druxsh ýâ nasush dashinem fshtânem upa-dvãsaiti, dashinem hê fshtânem paiti-hiñcôish âat hâ druxsh ýâ nasush hôyum fshtânem upa-dvãsaiti, hôyum hê fshtânem paiti-hiñcôish âat hâ druxsh ýâ nasush dashinem peresâum upa-dvãsaiti.
20: dashinem hê peresâum paiti-hiñcôish âat hâ druxsh ýâ nasush hôyum peresâum upa-dvãsaiti, hôyum hê peresâum paiti-hiñcôish âat hâ druxsh ýâ nasush dashinem sraonîm upa-dvãsaiti, dashinem hê sraonîm paiti-hiñcôish âat hâ druxsh ýâ nasush haoyãm sraonîm upa-dvãsaiti.
21: haoyãm hê sraonîm paiti-hiñcôish âat hâ druxsh ýâ nasush haxti upa-dvãsaiti, haxti hê paiti-hiñcôish ýezi nairyô anghat pasca hê pourum paiti-hiñcôish paitisha aparem ýezi strî anghat paitisha hê pourum paiti-hiñcôish pasca aparem âat hâ druxsh ýâ nasush dashinem rânem upa-dvãsaiti.
22: dashinem hê rânem paiti-hiñcôish âat hâ druxsh ýâ nasush hôyum rânem upa-dvãsaiti, hôyum hê rânem paiti-hiñcôish âat hâ druxsh ýâ nasush dashinem zhnûm upa-dvãsaiti, dashinem hê zhnûm paiti-hiñcôish âat hâ druxsh ýâ nasush hôyum zhnûm upa-dvãsaiti.
23: hôyum hê zhnûm paiti-hiñcôish âat hâ druxsh ýâ nasush dashinem ascûm upa-dvãsaiti, dashinem hê ascûm paiti-hiñcôish âat hâ druxsh ýâ nasush hôyum ascûm upa-dvãsaiti, hôyum hê ascûm paiti-hiñcôish âat hâ druxsh ýâ nasush dashinem zañgem upa-dvãsaiti, dashinem hê zañgem paiti-hiñcôish âat hâ druxsh ýâ nasush hôyum zañgem upa-dvãsaiti.
24: hôyum hê zañgem paiti-hiñcôish âat hâ druxsh ýâ nasush dashinem frabdem upa-dvãsaiti, dashinem hê frabdem paiti-hiñcôish âat hâ druxsh ýâ nasush hôyum frabdem upa-dvãsaiti, hôyum hê frabdem paiti-hiñcôish âat hâ druxsh ýâ nasush adhairi haxem nivôiryete mãnayen ahe ýatha maxshyå parenem.
25: hakat nigereptaêibya añgushtaêibya uzgereptaêibya pâshnaêibya dashinem hê haxem paiti-hiñcôish âat hâ druxsh ýâ nasush hôyum haxem upa-dvãsaiti, hôyum hê haxem paiti-hiñcôish âat hâ druxsh ýâ nasush adhairi añgushta nivôiryete mãnayen ahe ýatha maxshyå parenem.
26: hakat nigereptaêibya pâshnaêibya uzgereptaêibya añgushtaêibya dashinãm hê añgushtãm paiti-hiñcôish âat hâ druxsh ýâ nasush haoyãm añgushtãm upa-dvãsaiti, haoyãm hê añgushtãm paiti-hiñcôish âat hâ druxsh ýâ nasush nivôiryeite apâxedhraêibyô naêmaêibyô maxshi kehrpa erekhaitya frashnaosh apa-zadhanghô akaranem driwyå ýatha zôizhdishtâish xrafstrâish.
27: atha imã vacô dreñjayôish ýôi anghen vârethrakhnyôtememca baêshazyôtememca, ýathâ ahû vairyô athâ ratush ... mâmereñcainîsh gaêthå astvaitîsh ashahe.
28: paoirîm upa makhem frâ-nasush narem bavaiti atha imã vacô dreñjayôish ... bitîm ... thritîm ... tûirîm ... puxdhem ... xshtûm....
29: pascaêta ava tâ nishhidhôit aêsha ýâ paiti-irista añtare aredhem makhahe pâreñtare haca anyaêibyô makhaêibyô avavat tadha ýatha cathwârô erezavô aêtaêshãmca zemô perethu-fravâish fradhavata.
30: pañca-dasa zemô hañkanayen vîspem â ahmât upa-mãnayen ýat hê upemem paiti vakhdhanahe upemât varsa hiku bavât.
31: ýat hê tanush hishvi hikhnvi pãsnu bavât pascaêta ava tâ anya makha âiti jasôit aêsha ýâ paiti-irista, paoirîm upa makhem hakeret âpô âat hvãm tanûm pairi-ýaozhdaithîta bitîm upa makhem bizhvat âpô âat hvãm tanûm pairi-ýaozhdaithîta thritîm upa makhem thrizhvat âpô âat hvãm tanûm pairi-ýaozhdaithîta.
32: pascaêta dim â-baodhayaêta urvâsnayå vâ vohu-gaonahe vâ vohu-keretôish vâ hadhânaêpatayå vâ kãmcit vâ hubaoidhitemanãm urvaranãm vastrå pascaêta aiwyånghayaêta pascaêta ava tâ âiti nmâna âiti jasôit aêsha ýâ paiti-irista.
33: airime gâtûm hê nishhidhaêta añtare aredhem nmânahe pâreñtare haca anyaêibyô mazdayasnaêibyô mâ xshayamna jasôit âtrem mâ âpem mâ zãm mâ gãm mâ urvarãm mâ narem ashavanem mâ nâirikãm ashaonîm vîspem â ahmât ýat hê thrâyô xshafna sacåñte, âat pasca thrixshaparât us tanûm snayaêta us vastrât gêush maêsmana apâca paiti avatha ýaozhdayãn.
34: airime gâtûm hê nishhidhaêta añtare aredhem nmânahe pâreñtare haca anyaêibyô mazdayasnaêibyô mâ xshayamna jasôit âtrem mâ âpem mâ zãm ... ýat hê xshvash xshafna sacåñte, âat pasca xshvash-xshaparât us tanûm snayaêta us vastrât gêush maêsmana apâca paiti avatha ýaozhdayãn.
35: airime gâtûm hê nishhidhaêta añtare ... ýat hê nava xshafna sacåñte, âat pasca nava-xshaparât us tanûm snayaêta us ... ýaozhdayãn.
36: pascaêta xshayamna jasôit avi âtrem avi âpem avi zãm avi gãm avi urvarãm avi narem ashavanem avi nâirikãm ashaonîm!
37: âthravanem ýaozhdathô dahmayât parô âfritôit dainghêush dainghu-paitîm ýaozhdathô ushtrahe paiti arshnô akhryehe zañtêush zañtu-paitîm ýaozhdathô aspahe paiti arshnô akhryehe vîsô vîspaitîm ýaozhdathô gêush paiti uxshnô akhryehe nmânahe nmânô-paitîm ýaozhdathô gêush paiti azyå.
38: nmânahe nmânô-paitîm nâirikãm ýaozhdathô gêush paiti fravaityå vaêsêsca pairyaêtrêshca ýaozhdathô gêush paiti vazyå nitememcit aperenâyûkem ýaozhdathô pasêush garebush anumayehe.
39: ýezi tavãn aête mazdayasna aête pasvô staorâca aêtahmâi naire frabârayen, ýezi nôit tavãn aête mazdayasna aête pasvô staorâca anyãm hê avaretãm aêtahmâi naire frabârayen vîspem â ahmât ýat aêshô nâ ýô ýaozhdâthryô haca aêibyô nmânaêibyô xshnûtô adhbishtô pârayât.
40: ýezica aêshô nâ ýô ýaozhdâthryô haca aêibyô nmânaêibyô tbishtô axshnûtô parâiti apa hê paskât fraoirisaite spitama zarathushtra aêsha druxsh ýâ nasush nånghanat haca cashmanat haca hizumat haca paitishhvarenâdha fravâxshat haca frashumakat haca tê,
41: aêshãm paiti sraoe aêsha druxsh ýâ nasush upa-dvãsaiti ayaozhdya pascaêta bavaiñti ýavaêca ýavaêtâtaêca, anusô zî spitama zarathushtra aêsha ýâ paiti- irista avat hvare â-tâpaite anusô hâu må anusô ave stârô.
42: xshnâvayeiti zî spitama zarathushtra aêshô nâ ýô ýaozhdâthryô ýat aêtem paiti-iristem frâ-nasûm kerenaoiti xshnâvayeiti âtrem xshnâvayeiti âpem xshnâvayeiti zãm xshnâvayeiti gãm xshnâvayeiti urvarãm xshnâvayeiti narem ashavanem xshnâvayeiti nâirikãm ashaonîm!
43: paiti dim peresata zarathushtrô, dâtare gaêthanãm astvaitinãm ashâum cvat ahmâi naire mizhdem anghat pasca astasca baodhanghasca vî-urvîshtîm ýat aêtem paiti-iristem frâ-nasûm kerenaoiti.
44: âat mraot ahurô mazdå, disyât ahmâi naire avat mizhdem parô-asnâi anguhe vazdvare vahishtahe anghêush.
45: paiti dim peresata zarathushtrô, dâtare ... ashâum kutha aêtat druxsh perenâne ýâ haca irista upa jvañtem upa-dvãsaiti kutha aêtat nasu perenâne ýâ haca irista upa jvañtem upa-raêthwayeiti.
46: âat mraot ahurô mazdå, ime vaca framrva ýôi heñti gâthâhva bishâmrûta ime vaca framrva ýôi heñti gâthâhva thrishâmrûta ime vâca framrva ýôi heñti gâthâhva cathrushâmrûta, mãnayen bâ spitama zarathushtra aipi tâ nasush zgathaite ýatha ishush hvâthaxtô ýatha vâ nematô tarô ýâre ýatha vâ rathwya varena.
47: dâtare ... ýezica hô nâ paiti- hiñcôit ýô nôit apivatâite daênayå mâzdayasnôish ýaozhdâthryât haca kutha aêtat druxsh perenâite ýâ haca irista upa jvañtem upa-dvãsaiti kutha aêtat nasu perenâite ýâ haca irista upa jvañtem upa-raêthwayeiti.
48: âat mraot ahurô mazdå, mãnayen bâ spitama zarathushtra aêsha druxsh ýâ nasush ash-aojastara varedhayete ýatha para ahmât as, hâ aête ýaska hâ aête mahrka hâ aête paityâra hamatha ýatha paracit.
49: dâtare ... kâ hê asti citha, âat mraot ahurô mazdå, hañdarezacit hañdarezayen aête ýôi mazdayasna zasta hê paoirîm hañdarezayañta apa hê vastrå barayen pãstô-frathanghem hê kameredhem vînâthayen ash-hvaretemaêibyô speñtô- mainyavanãm dâmanãm kerefsh-hvârãm kerefsh paiti-nisirinuyât vayãm kahrkâsãm uityaojanô, avå hîm paiti-mithnâiti vîspem dushmatemca duzhûxtemca duzhvarshtemca.
50: ýezica hê anya akha shyaothna fravarshta patita hê citha, âat ýezi-shê anya akha shyaothna nôit fravarshta patitem ahe narsh ýavaêca ýavaêtâtaêca!
51: cish hâu as ahura mazda ýô mê asadayat fradathem apa-barat varedathem apa-barat ýaskem upa-barat mahrkem upa-barat.
52: âat mraot ahurô mazdå, hô bâ aêshô âs ashâum zarathushtra ashemaokhô anashava ýô aêtahmi anghvô ýat astvaiñti paiti-hiñcaiti â-dim nôit apivatâite daênayå mâzdayasnôish ýaozhdâthryât haca.
53: para nû ahmât haca asanghatca shôithrâatca axshtat spitama zarathushtra izhâca âzûitishca para dasvareca baêshazemca para fradathemca varedathemca vaxshathemca para ýavanãmca vâstranãmca uruthem.
54: dâtare ... kadha nô ahmâi asanghaêca shôithraêca paiti-jasâtô izhâca âzûitishca kadha dasvareca baêshazemca kadha fradathemca varedathemca vaxshathemca kadha ýavanãmca vâstranãmca uruthem.
55: âat mraot ahurô mazdå, nôit nû para ahmât spitama zarathushtra asanghaêca shôithraêca paiti-jasâtô izhâca âzûitishca nôit dasvareca baêshazemca nôit fradathemca varedathemca vaxshathemca nôit ýavanãmca vâstranãmca uruthem.
56: para ahmât ýat idha ashemaokhô anashava hathra jatô nijanâite ýat vâ aêtanghå dainghêush sraoshô ashyô frâyazåñte thri-ayarem thri-xshaparem saociñtat paiti âthrat frasteretât paiti baresmen uzdâtât paiti haomât.
57: pascaêta ahmâi asanghaêca shôithraêca paiti-jasâtô izhâca âzûitishca pascaêta dasvareca baêshazemca pascaêta fradathemca varedathemca vaxshathemca pascaêta ýavanãmca vâstranãmca uruthem! ashem vohû...!!

Fargard 10.

1: peresat zarathushtrô ahurem mazdãm, ahura mazda mainyô spênishta dâtare gaêthanãm astvaitinãm ashâum kutha aêtat druxsh perenâne ýâ haca irista upa jvañtem upa-dvãsaiti kutha aêtat nasush perenâne ýâ haca irista upa jvañtem upa-raêthwaiti.
2: âat mraot ahurô mazdå, ime vaca framrva ýôi heñti gâthâhva bishâmrûta ime vaca framrva ýôi heñti gâthâhva thrishâmrûta ime vaca framrva ýôi heñti gâthâhva cathrushâmrûta ime vaca framrva ýôi heñti gâthâhva bishâmrûtaca thrishâmrûtaca cathrushâmrûtaca.
3: dâtare ... kaya aête vaca ýôi heñti gâthâhva bishâmrûta, âat mraot ahurô mazdå, ime aête vaca ýôi heñti gâthâhva bishâmrûta ime vaca âdhbitîm framrva,
4: ahyâ ýâsâ ... humatanãm ... ashahyâ âat sairî ... ýathâ tû-î ... humâîm thwâ îzhîm ... thwôi staotarascâ ... ushtâ ahmâi ... speñtâ mainyû ... vohû xshathrem ... vahishtâ îshtish....
5: âat pasca bishâmrûta vaca ime vaca framrva vârethrakhne baêshazya, paiti-perene angrem mainyûm haca nmâna haca vîsa haca zañtu haca dainghu haca havayåse-tanvô haca nâ paiti-iristô haca nâirika paiti-iriste haca nmânahe nmânô-patôish haca vîsô vîspatôish haca zañtêush zañtupatôish haca dainghêush dainghupatôish haca vîspayå ashaonô stôish.
6: paiti-perene nasûm paiti-perene hãm-raêthwem paiti-perene paiti-raêthwem haca nmâna haca vîsa haca zañtu haca dainghu haca havayåse-tanvô haca nâ paiti-iristô haca nâirika paiti-iriste haca nmânahe nmânô-patôish haca vîsô vîspatôish haca zañtêush zañtupatôish haca dainghêush dainghupatôish haca vîspayå ashaonô stôish.
7: dâtare ... kaya aête vaca ýôi heñti gâthâhva thrishâmrûta, âat mraot ahurô mazdå, ime aête vaca ýôi heñti gâthâhva thrishâmrûta ime vaca âthritîm framrva,
8: ashem vohû ... ýê sevishtô ... huxshathrôtemâi ... duzhvarenâish....
9: âat pasca thrishâmrûta vaca ime vaca framrva vârethrakhne baêshazya, paiti-perene iñdrem paiti-perene saurum paiti-perene nånghaithîm daêum haca nmâna haca vîsa haca zañtu haca dainghu.
10: paiti-perene tauru paiti-perene zairica haca nmâna haca vîsa haca zañtu haca dainghu.
11: dâtare ... kaya aête vaca ýôi heñti gâthâhva cathrushâmrûta, âat mraot ahurô mazdå, ime aête vaca ýôi heñti gâthâhva cathrushâmrûta ime vaca âxtûirîm framrva,
12: ýathâ ahû vairyô ... mazdâ at môi ... â airyêmâ ishyô....
13: âat pasca cathrushâmrûta vaca ime vaca framrva vârethrakhne baêshazya, paiti-perene aêshmem xrvîm-drûm paiti-perene akatashem daêum haca nmâna haca vîsa haca zañtu haca dainghu.
14: paiti-perene varenya daêvô paiti-perene vâtîm daêvô haca nmâna haca vîsa haca zañtu haca dainghu.
15: ime aête vaca ýôi heñti gâthâhva bishâmrûta ime aête vaca ýôi heñti gâthâhva thrishâmrûta ime aête vaca ýôi heñti gâthâhva cathrushâmrûta.
16: ime aête vaca ýôi heñti angrahe mainyêush snathem ime aête vaca ýôi heñti aêshmahe xrvîm-draosh snathem ime aête vaca ýôi heñti mâzainyanãm daêvanãm snathem ime aête vaca ýôi heñti vîspanãm daêvanãm snathem.
17: ime aête vaca ýôi heñti avainghå drujô avainghå nasâvô hamaêstârem ýâ haca irista upa jvañtem upa- dvãsaiti ime aête vaca ýôi heñti avainghå drujô avainghå nasâvô hamaêstârem ýâ haca irista upa jvañtem upa-raêthwaiti.
18: âat tûm zarathushtra nava makha nithweresôish ýat anghat ainghå zemô vî-âpôtememca vî-urvarô-tememca ana- hvaretha pasu-vîra, ýaozhdå mashyâi aipi zãthem vahishta hâ ýaozhdå zarathushtra ýâ daêna mâzdayasnish ýô hvãm daênãm ýaozhdâite humatâishca hûxtâishca hvarshtâishca.
19: daênãm erezvô ýaozhdaithîsha atha zî ainghå asti ýaozhdâitish kahmâicit anghêush astvatô havayå erezvô daênayå ýô hvãm daênãm ýaozhdâite humatâishca hûxtâishca hvarshtâishca.
20: ýathâ ahû vairyô ... kêm-nâ mazdâ ... mâmereñcainîsh gaêthå astvaitîsh ashahe! ashem vohû...!!

Fargard 11.

1: peresat zarathushtrô ahurem mazdãm, ahura mazda ... ashâum kutha nmânem ýaozhdathâni kutha âtrem kutha âpem kutha zãm kutha gãm kutha urvarãm kutha narem ashavanem kutha nâirikãm ashaonîm kutha strêsh kutha månghem kutha hvare kutha anakhra raocå kutha vîspa vohu mazdadhâta ashacithra.
2: âat mraot ahurô mazdå, ýaozhdâthrem srâvayôish zarathushtra ýaozhdâta pascaêta bun nmâna ýaozhdâta âtrem ýaozhdâta âpem ýaozhdâta zãm ýaozhdâta gãm ýaozhdâta urvarãm ýaozhdâta narem ashavanem ýaozhdâta nâirikãm ashaonîm ýaozhdâta strêsh ýaozhdâta månghem ýaozhdâta hvare ýaozhdâta anakhra raocå ýaozhdâta vîspa vohu mazdadhâta ashacithra.
3: atha imã vacô dreñjayôish ýôi anghen vârethrakhnyôtememca baêshazyôtememca pañca ahuna vairya frasrâvayôish, ýathâ ahû vairyô...(5), ahunem vairîm tanûm pâiti, ýathâ ahû vairyô ... kêm-nâ mazdâ ... ashahe.
4: imat nmânem ýaozhdathâne imã adha vacô framrva, at mâ ýavâ beñdvô pafre mazishtô, imat âtrem ýaozhdathâne imã adha vacô framrva, ahe thwâ âthrô verezâna paoirye pairijasâmaide mazda ahurâ.
5: imat âpem ýaozhdathâne imã adha vacô framrva, apô at ýazamaide maêkaiñtîshcâ hêbvañtîshcâ fravazanghô, imat zãm ýaozhdathâne imã adha vacô framrva, imãm âat zãm genâbîsh hathrâ ýazamaide.
6: imãm gãm ýaozhdathâne imã adha vacô framrva, gave adhâish tâish shyaothnâish ýâish vahishtâish fraêshyâmahî, imat urvarãm ýaozhdathâne imã adha vacô framrva, at ah'yâi ashâ mazdå urvarå vaxshat.
7: imat narem ashavanem ýaozhdathâne imat nâirikãm ashaonîm ýaozhdathâne imã adha vacô framrva, â airyêmâ ishyô rafedhrâi jañtû nerebyascâ nâiribyascâ zarathushtrahe vanghêush rafedhrâi mananghô ýâ daênâ vairîm hanât mîzhdem ashahyâ ýâsâ ashîm ýãm ishyãm ahurô masatâ mazdå.
8: atha imã vacô ... ashta ahuna vairya frasrâvayôish, ýathâ ahû vairyô...(8). kêm-nâ mazdâ ... ashahe.
9: perene aêshmem perene nasûm perene hãm- raêthwem perene paiti-raêthwem perene xrû perene xrvikhni perene bûidhi perene bûidhizha perene kuñdi perene kuñdizha perene bûshyãsta ýâ zairina perene bûshyãsta ýâ darekhô-gava perene mûidhi perene kapastish perene pairikãm ýâ âiti âtrem âpem zãm gãm urvarãm perene âhitîm ýâ âiti âtrem âpem zãm gãm urvarå.
10: perene thwâ duzhda angra mainyô haca nmânat haca âthrat haca apat haca zemat haca gaot haca urvarayât haca narem ashavanem haca nâirikãm ashaonîm haca strêsh haca månghem haca hvare haca anakhra raocå haca vîspa vohu mazdadhâta ashacithra.
11: atha imã vacô ... cathwârô ahuna vairya frasrâvayôish, ýathâ ahû vairyô...(4), kêm-nâ mazdâ ... ashahe.
12: parshta aêshmem parshta nasûm parshta hãm- raêthwem parshta paiti-raêthwem parshta xrû parshta xrvikhni parshta bûidhi parshta bûidhizha parshta kuñdi parshta kuñdizha parshta bûshyãsta ýâ zairina parshta bûshyãsta ýâ darekhô-gava parshta mûidhi parshta kapastish parshta pairikãm ýâ âiti âtrem âpem zãm gãm urvarãm parshta âhitîm ýâ âiti âtrem âpem zãm gãm urvarå
13: parshta thwâ duzhda angra mainyô haca nmânat haca âthrat haca apat haca zemat haca gaot haca urvarayât haca narem ashavanem haca nâirikãm ashaonîm haca strêsh haca månghem haca hvare haca anakhra raocå haca vîspa vohu mazdadhâta ashacithra.
14: atha imã vacô ... cathwârô mazdâ at môi frasrâvayôish, mazdâ at môi...(4).
15-16: perene aêshmem....
17: atha imã vacô ... pañca ahuna vairya frasrâvayôish, ýathâ ahû vairyô...(5), kêm-nâ mazdâ ... ashahe! ashem vohû...!!

Fargard 12.

1: [âat ýat pitô para-irithyeiti mâta vâ para-irithyeiti cvat aêshãm upa-mãnayen puthrô haca pitarem dukhdha haca mâtarem cvat dahmanãm cvat tanu-perethanãm, âat mraot ahurô mazdå, thrisatem dahmanãm xshvashtîm tanu-perethanãm.
2: dâtare ... kutha nmânem ýaozhdathâmi kutha bun ýaozhdâta, âat mraot ahurô mazdå, thrish frasnâiti tanunãm thrish frasnâiti vastranãm thrish frasrûiti gâthanãm imå nô âtrem ýazaêta baresma sterenaêta aiwyô vanguhibyô zaothrå baraêta, ýaozhdâta pascaêta bun nmâna vasô upâiti apãm vasô upâiti urvaranãm vasô upâiti ameshanãm speñtanãm spitama zarathushtra.
3-4: âat ýat puthrô para-irithyeiti dukhdha vâ para- irithyeiti cvat aêshãm upa-mãnayen pita haca puthrem mâta haca dukhdharem cvat dahmanãm cvat tanu-perethanãm, âat mraot ahurô mazdå, thrisatem dahmanãm xshvashtîm tanu-perethanãm. dâtare....
5-6: âat ýat brâta para-irithyeiti hvangha vâ para- irithyeiti cvat aêshãm upa-mãnayen brâta haca hvangharem hvangha haca brâtarem cvat dahmanãm cvat tanu-perethanãm, âat mraot ahurô mazdå, thrisatem dahmanãm xshvashtîm tanu-perethanãm. dâtare....
7-8: âat ýat nmânô-paitish para-irithyeiti nmânô-pathni vâ para-irithyeiti cvat aêshãm upa-mãnayen cvat dahmanãm cvat tanu-perethanãm, âat mraot ahurô mazdå, xshvash månghô dahmanãm dvadasa tanu-perethanãm kainînô hvatô puthrem. dâtare....
9-10: âat ýat nyâkô para-irithyeiti nyâke vâ para-irithyeiti cvat aêshãm upa-mãnayen napô haca nyâkô napti haca nyâke cvat dahmanãm cvat tanu-perethanãm, âat mraot ahurô mazdå, pañcâca vîsatica dahmanãm pañcâsatem tanu-perethanãm. dâtare....
11-12: âat ýat napô para-irithyeiti napti vâ para- irithyeiti cvat aêshãm upa-mãnayen nyâkô haca naptô nyâke haca napti cvat dahmanãm cvat tanu-perethanãm, âat mraot ahurô mazdå, pañcâca vîsatica dahmanãm pañcâsatem tanu-perethanãm. dâtare....
13-14: âat ýat brâtruyô para-irithyeiti brâtruye vâ para-irithyeiti cvat aêshãm upa-mãnayen cvat dahmanãm cvat tanu- perethanãm, âat mraot ahurô mazdå, vîsaiti dahmanãm cathwaresatem tanu-perethanãm. dâtare....
15-16: âat ýat tûiryô para-irithyeiti tûirya vâ para-irithyeiti cvat aêshãm upa-mãnayen cvat dahmanãm cvat tanu- perethanãm, âat mraot ahurô mazdå, pañca-dasa dahmanãm thrisatem tanu-perethanãm. dâtare....
17-18: âat ýat tûiryô puthrô para-irithyeiti tûirya dukhdha vâ para-irithyeiti cvat aêshãm upa-mãnayen cvat dahmanãm cvat tanu-perethanãm, âat mraot ahurô mazdå, dasa dahmanãm vîsaiti tanu-perethanãm. dâtare....
19-20: âat ýat tûirya puthrô vâ puthrô para-irithyeiti tûirya dukhdhairi cvat aêshãm upa-mãnayen cvat dahmanãm cvat tanu-perethanãm, âat mraot ahurô mazdå, pañca dahmanãm dasa tanu-perethanãm. dâtare....
21: âat ýat kãmcit vâ taoxmanãm para- irithyeiti ýatha ainyô-varena ainyô-tkaêsha cvat speñtahe mainyêush dâmanãm hãm-raêthwayeiti cvat paiti-raêthwayeiti.
22-24: âat mraot ahurô mazdå, ýatha vazakhacit ... nôit avatha meretô!
ashem vohû...!!]

Fargard 13.

1: kat tat dãma speñtô-mainyava aêtanghãm dâmanãm ýôi heñti speñtahe mainyêush dãma dâtem vîspem paiti ushånghem â hû vaxshat hazangraja angrô mainyush paiti-jasaiti.
2: âat mraot ahurô mazdå spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite, aêtat tat dãma speñtô-mainyava aêtanghãm dâmanãm ýôi heñti speñtahe mainyêush dãma dâtem vîspem paiti ushånghem â hû vaxshat hazangraja angrô-mainyush paiti-jasaiti.
3: ýasca dim janat spitama zarathushtra spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite nava-naptyaêcit hê urvânem para-mereñcaite ýaêshãm anghat duzhâpîm cinvat-peretûm ýô nôit jvô sraoshyãm uzverezyeiti.
4: dâtare ... ýô janat spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite kâ hê asti citha, âat mraot ahurô mazdå, hazangrem upâzananãm upâzôit aspahe ashtraya hazangrem sraoshô-caranaya.
5: kat tat dãma angrô-mainyava aêtanghãm dâmanãm ýôi heñti angrahe mainyêush dãma dâtem vîspem paiti ushånghem â hû vaxshat hazangraja speñtô-mainyûm paiti-jasaiti.
6: âat mraot ahurô mazdå, daêum ýim zairimyangurem nãma spitama zarathushtra ýim mashyâka avi duzhvacanghô zairimyâkem nãma aojaite, aêtat tat dãma angrô-mainyava aêtanghãm dâmanãm ýôi heñti angrahe mainyêush dãma dâtem vîspem paiti ushånghem â hû vaxshat hazangraja speñtô-mainyûm paiti-jasaiti.
7: ýasca dim janat spitama zarathushtra daêum ýim zairimyangurem ýim mashyâka avi duzhvacanghô zairimyâkem nãma aojaite patitem hê manô anghat patitem vacô patitem shyaothnem uzvarshtem hê manô anghat uzvarshtem vacô uzvarshtem shyaothnem!
8: ýô aêtaêshãm sûnãm jaiñti ýim pasush-haurvãmca vishhaurvãmca vohunazgãmca draxtô-hunaranãmca xraosyô-taraca nô ahmât voyô-taraca hvô urva parâiti parô-asnâi anguhe
ýatha vehrkô vayôi tûite
dramne barezishte razûire.
9: nôit hê anyô urva haom urvânem paiti irista bãzaiti xraosyâca voyaca anguhe naêdha spâna peshu-pâna paiti irista bãzaiti xraosyâca voyaca anguhe.
10: ýô sûne pishtrem jaiñti ýim pasush-haurve us vâ hê gaoshem thweresaiti apa vâ hê paidhyãm kereñtaiti ýase-tat paiti avå gaêthå tâyush vâ vehrkô vâ apaiti-busti haca gaêthâbyô para-baraiti dasa adhât paiti afshê cikayat, cikayat sûnahe raêshô baodhô-varshtahe cithaya.
11: ýô sûne pishtrem jaiñti ýim vîsh-haurve us vâ hê gaoshem thweresaiti apa vâ hê paidhyãm kereñtaiti ýase-tat paiti avå vîsô tâyush vâ vehrkô vâ apaiti-busti haca vîzhibyô para-baraiti dasa adhât paiti afshê cikayat, cikayat sûnahe raêshô baodhô-varshtahe cithaya.
12: dâtare ... ýô spânem jaiñti ýim pasush-haurum frazâbaodhanghem snathem vîkeret-ushtânem kâ hê asti citha, âat mraot ahurô mazdå, ashta sata upâzananãm upâzôit aspahe ashtraya ashta sata sraoshô-caranaya.
13: dâtare ... ýô spânem jaiñti ýim vish-haurum frazâbaodhanghem snathem vîkeret-ushtânem kâ hê asti citha, âat mraot ahurô mazdå, hapta sata upâzananãm upâzôit aspahe ashtraya hapta sata sraoshô-caranaya.
14: dâtare ... ýô spânem jaiñti ýim vohunazgem frazâbaodhanghem snathem vîkeret-ushtânem kâ hê asti citha, âat mraot ahurô mazdå, xshvash sata....
15: dâtare ... ýô spânem jaiñti ýim taurunem frazâbaodhanghem snathem vîkeret-ushtânem kâ hê asti citha, âat mraot ahurô mazdå, pañca sata....
16: hâu jazhâush hâu vîzâush hâu sukurenahe hâu urupish tizhi-dâtahe hâu raopish ýaonô-hvatahe hâu vîspanãm speñtô-mainyavanãm spacithranãm anya udra upâpa!
17: dâtare ... dva asti spâ pasush-haurvô dâityô-gâtush, âat mraot ahurô mazdå, ýô ýûjyastîm haca gaêthâbyô parâiti sraêshemnô tâyûsh vehrkemca.
18: dâtare ... kva asti spâ vish-haurvô dâityô-gâtush, âat mraot ahurô mazdå, ýô hâthrô-masanghem adhwanem haca vîzhibyô parâiti sraêshemnô tâyûsh vehrkemca.
19: dâtare ... kva asti spâ vohunazgô dâityô-gâtush, âat mraot ahurô mazdå, ýô naêcim isaiti hunaranãm tanuye isaite thrâthrem!
20: dâtare ... ýô spânem tarô-pithwem daste ýim pasush-haurum cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti fratemô-nmânahe nmânô-paitîm paiti tarô-pithwem daithyât atha âstryeiti.
21: dâtare ... ýô spânem tarô-pithwem daste ýim vishhaurum cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti madhemô-nmânahe nmânô-paitîm paiti tarô-pithwem daithyât atha âstryeiti.
22: dâtare ... ýô spânem tarô-pithwem daste ýim vohunazgem cvat aêtaêshãm shyaothnanãm âstâraiti, âat mraot ahurô mazdå, narem bôit idha ashavanem jaseñti ahmya nmâne mat avabyô daxshtâbyô ýatha âthrava paiti tarô-pithwem daithyât atha âstryeiti.
23: dâtare ... ýô spânem tarô-pithwem daste ýim taurunem cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti aperenâyûkem dahmô-keretem shyaothnâvarezem verezyât shyaothnem paiti tarô-pithwem daithyât atha âstryeiti.
24: dâtare ... ýô spânem tarô-pithwem daste ýim pasush-haurum kâ hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
25: dâtare ... ýô spânem tarô-pithwem daste ýim vishhaurum kâ hê asti citha, âat mraot ahurô mazdå, navaitîm upâzananãm upâzôit aspahe ashtraya navaitîm sraoshô-caranaya.
26: dâtare ... ýô spânem tarô-pithwem daste ýim vohunazgem kâ hê asti citha, âat mraot ahurô mazdå, haptâitîm upâzananãm....
27: dâtare ... ýô spânem tarô-pithwem daste ýim taurunem kâ hê asti citha, âat mraot ahurô mazdå, pañcâsatem upâzananãm....
28: aêtem zî aêtahmi anghvô ýat astvaiñti spitama zarathushtra speñtahe mainyêush dâmanãm âsishtem zaurvânem upâiti ýat spânô ýôi hishteñte ahvarô upa hvareñtem parô spasânô eviñdânô parô xshvisca âzûitishca gêush mat baratu hvarethanãm sûnahe aêvahe dâityô-pithwem.
29: dâtare ... ýat ahmi nmâne ýat mâzdayasnôish spâ avacå vâ bavat adhâityô-xratush kutha tê verezyãn aête ýôi mazdayasna.
30: âat mraot ahurô mazdå, ava hê barayen tâshtem dâuru upa-tãm manaothrîm stamanem hê adhât nyâzayen ishti-masô xraozhdvahe bish aêtavatô varedvahe.
31: aêtahmâtcit nidarezayen frâ-hîmcit nidarezayen ýezi nôit spâ avacå vâ adhâityô-xratush pasûm vâ narem vâ raêshyât para hê irishiñtô raêshem cikayat baodhô-varshtahe cithaya.
32: paoirîm pasûm avakhnât paoirîm narem raêshyât dashinem hê gaoshem upa-thweresayen bitîm pasûm avakhnât bitîm narem raêshyât hôyum hê gaoshem upa-thweresayen.
33: thritîm pasûm avakhnât thritîm narem raêshyât dashinem hê paidhyãm upa-kereñtayen tûirîm pasûm avakhnât tûirîm narem raêshyât haoyãm hê paidhyãm upa-kereñtayen.
34: puxdhem pasûm avakhnât puxdhem narem raêshyât dumemcit hê upa-thweresayen, aêtahmâtcit nidarezayen ... cithaya.
35: dâtare ... ýat ahmi nmâne ýat mâzdayasnôish spâ ahãm-baodhemnô vâ bavat adhâityô-xratush kutha tê verezyãn aête ýôi mazdayasna, âat mraot ahurô mazdå, avatha hê baêshazem upôisayen ýatha dahmâicit ashaone.
36: dâtare ... ýezi isemnô nôit viñdâite kutha tê verezyãn aête ýôi mazdayasna.
37: âat mraot ahurô mazdå, ava hê barayen ... frâ-hîmcit nidarezayen ýezi nôit spâ ahãm-baodhemnô maêkhe vâ câiti vâ vaêmi vâ urûidhi vâ apô vâ nâvayå paidhyâite ahmat haca irishyât,
38: ýezi tat paiti irishyeiti ainghat haca shyaothnâvareza atha bavaiñti peshô-tanvô!
39: spânem dathem zarathushtra
azem ýô ahurô mazdå
hvâvastrem hvâ-aothrem
zaêni-budhrem tizhi-dãsurem vîrô-draonanghem gaêthanãm harethrâi, adha azem ýô ahurô mazdå spânem nidathem ýat dim mazaosh kehrpô tûrahe ýezi asta asha xrathwa ýezi asta gaêthâbyô.
40: ýasca hê spitama zarathushtra vâcim paiti zaênish anghat nôit hê tå vîspô tâyush vâ vehrkô vâ apaiti-busti haca vîzhibyô para-baraiti, jãthwa vehrka scãthwa vehrka pôithwa vehrka snaêzhana!
41: dâtare ... katârô zî ayå vehrkayå jãthwô-tarô anghen ashâum ahura mazda ýatha spâ vehrkahe kerenaoiti ýatha ýat vehrkô spâ, âat mraot ahurô mazdå, aêshô zî aêtayå vehrkayå jãthwô-tarô anghen ashâum zarathushtra ýatha spâ vehrkahe kerenaoiti ýatha ýat vehrkô spâ.
42: ustâcit spâna pateñti pasush-haurvãmca vish-haurvãmca vohunazgãmca draxtô-hunaranãmca ýatha-khnyô gaêthâbyô taêcit ýå bavaiñti aoshô-tarasca duzhitô-tarasca gaêthô- jatarasca ýatha anya spâ.
43: ustâcit vehrka pateñti khnyô gaêthâbyô taêcit ýå bavaiñti aoshô-tarasca duzhitô-tarasca gaêthô-jatarasca ýatha anya vehrka!
44: sûnahe aêvahe ashtâ bifrem, asti shê haêm ýatha athaurune asti-shê haêm ýatha rathaêshtârahe asti-shê haêm ýatha vâstryehe fshuyañtô asti-shê haêm ýatha vaêsâush asti shê haêm ýatha tâyaosh asti-shê haêm ýatha disaosh asti-shê haêm ýatha jahikayå asti-shê haêm ýatha aperenâyûkahe.
45: paiti hvaretha hvaraiti ýatha âthrava huxshnaothrô ýatha âthrava hvâzârô ýatha âthrava aêshô kasu draonô ýatha âthrava aiti-shê haêm ýatha athaurune, raptô paurvaêibya ýatha rathaêshtå aipi- jatô gãm hudhånghem ýatha rathaêshtå parô pasca nmânahe ýatha rathaêshtå aiti shê haêm ýatha rathaêshtârahe.
46: zaênangha evîspô-hvafna ýatha vâstryô fshuyãs parô pasca nmânahe ýatha vâstryô fshuyãs pasca parô nmânahe ýatha vâstryô fshuyãs aiti-shê haêm ýatha vâstryehe fshuyañtô, hvañdrakarô ýatha vaêsô asnaêraêshô ýatha vaêsô zairimyafsma thryafsma ýatha vaêsô aiti shê haêm ýatha vaêsâush.
47: tãthrô-cinô ýatha tâyush xshapâyaonô ýatha tâyush apishma-hvarô ýatha tâyush athaca duzhnidhâtô ýatha tâyush aiti- shê haêm ýatha tâyaosh, tãthrô-cinô ýatha disush xshapâyaonô ýatha disush apishma-hvarô ýatha disush athaca duzhnidhâtô ýatha disush aiti-shê haêm ýatha disâush.
48: hvañdrakarô ýatha jahika asnaêraêshô ýatha jahika airitô pañtânem ýatha jahika zairimyafsma thryafsma ýatha jahika aiti-shê haêm ýatha jahikayå, hvafnô ýatha aperenâyush snaêzhanô ýatha aperenâyush hizu-drâjô ýatha aperenâyush pairi-taxtô paurvaêibya ýatha aperenâyush aiti-shê haêm ýatha aperenâyûkahe.
49: ýat mê aêshãmcit nmânanãmca caratô dva mâ apa-raodhayaêta ýasca spâ pasush-haurvô ýasca spâ vish- haurvô, nôit mê nmânem vîdhâtô hishteñti zãm paiti ahuradhâtãm ýezi mê nôit ånghât spâ pasush-haurvô vâ vishhaurvô vâ!
50: dâtare ... ýat sûnîsh para-irithyeiti nishtâ-zemanasca pairishtâ-xshudrasca kutha aêshãm baodhô jasaiti.
51: âat mraot ahurô mazdå, xå paiti apãm parâiti spitama zarathushtra athra ånghãm hãm-bavaiñti dva udra upâpa hazangrâish sûnîsh strî- nâmanô hazangrâish sûnîsh nairyô-nâmanô mithwana strica nairyasca, udrahe avakhnânô haêcô kerenaoiti ýat avâstrem.
52: para nû ahmât haca asanghatca shôithrâatca axshtat spitama zarathushtra izhâca âzûitishca para dasvareca baêshazemca para fradathemca varedathemca vaxshathemca para ýavanãmca vâstranãmca uruthem.
53: dâtare ... kadha-nô ahmâi asanghaêca shôithraêca paiti-jasâtô izhâca âzûitishca kadha dasvareca baêshazemca kadha fradathemca varedathemca vaxshathemca kadha ýavanãmca vâstranãmca uruthem.
54: âat mraot ahurô mazdå, nôit nû para ahmât spitama zarathushtra asanghaêca shôithrâica paiti-jasâtô izhâca âzûitishca nôit dasvareca baêshazemca nôit fradathemca varedathemca vaxshathemca nôit ýavanãmca vâstranãmca uruthem.
55: para ahmât ýat idha udra-janô hathra jatô nijanâite ýat vâ aêtahe udrahe upa dahmem urvânem frâyazåñte thri-ayarem thri-xshaparem saociñtat paiti âthrat frasteretât paiti baresmen uzdâtât paiti haomât.
56: pascaêta ahmâi asanghaêca shôithraêca paiti-jasâtô izhâca âzûitishca pascaêta dasvareca baêshazemca pascaêta fradathemca varedathemca vaxshathemca pascaêta ýavanãmca vâstranãmca uruthem! ashem vohû...!!

Fargard 14.

1: peresat zarathushtrô ahurem mazdãm, ahura mazda mainyô spênishta dâtare gaêthanãm astvaitinãm ashâum ýô udrem jaiñti ýim upâpem hazangrâishsûnîsh strî-nâmanô hazangrâish sûnîsh nairyô-nâmanô frazâbaodhanghem snathem vîkeret-ushtânem kâ hê asti citha.
2: âat mraot ahurô mazdå, baêvare upâzananãm upâzôit aspahe ashtraya baêvare sraoshô-caranaya baêvare vazyanãm aêsmanãm xraozhdvanãm hushatãm pairîshtanãm âthre ahurahe mazdå ashaya vanghuya urune cithîm nisirinuyât.
3: baêvare vazyanãm aêsmanãm varedvanãm urvâsnayå vâ vohu-gaonahe vâ vohu-keretôish vâ hadhânaêpatayå vâ kãmcit vâ hubaoidhitemanãm urvaranãm âthre ahurahe mazdå ashaya vanghuya urune cithîm nisirinuyât.
4: baêvare frasteretanãm baresmaine frastairyât baêvare zaothranãm haomavaitinãm gaomavaitinãm ýaozhdâtanãm pairi-angharshtanãm dahmô-ýaozhdâtanãm dahmô-pairi-angharshtanãm hãm-irista aêtayå urvarayå ýâ vaoce hadhânaêpâta aiwyô vanguhibyô ashaya vanghuya urune cithîm nisirinuyât.
5: baêvare azhinãm udarô-thrãsanãm ava-janyât baêvare azhinãm spakanãm kahrpunanãm ava-janyât baêvare kasyapanãm ava-janyât baêvare vazakhanãm dâdhmainyanãm ava-janyât baêvare vazakhanãm upâpanãm ava-janyât baêvare maoirinãm dânô-karshanãm ava-janyât baêvare maoirinãm araêkanãm kutakanãm duzhaininãm ava-janyât.
6: baêvare pazdunãm gûthô-varetanãm ava-janyât baêvare maxshinãm erekhaitinãm ava-janyât baêvare makhanãm irimaitinãm ainghå zemô aipi-kanyât bish hapta âthrô daxshtem nerebyô ashavabyô ashaya vanghuya urune cithîm nisirinuyât.
7: âtre-carana pairish-hanâna ýaozhdâni garemô-skarana âtre-vazanem hikaranem vîkusrem adharât naêmât hañkusrem uparât naêmât tashem tizhi-dârem tizhi-zhnûtem vadem tizhi- bârem tizhi-zhnûtem nerebyô ashavabyô ashaya vanghuya urune cithîm nisirinuyât ýaêibyô aête mazdayasna âthre ahurahe mazdå aêsmã pairisheñte.
8: vîspe zaya athaurune nerebyô ashavabyô ashaya vanghuya urune cithîm nisirinuyât ýaêshãm zayanãm athaurune ashtra gaoidhi paiti-dânô xrafstrakhnem sraoshô-caranaya urunya raêthwish-bajina havana dâityô-kereta tashta haomya baresmaca.
9: vîspe zaya rathôishti nerebyô ashavabyô ashaya vanghuya urune cithîm nisirinuyât ýaêshãm zayanãm rathôishti paoiryô arshtish bityô karetô thrityô vazrô tûirya thanvare puxdha zaênâush mat akana mat thrisãs ayô-akhrâish xshtvî fradaxshana snâvare-bâzura mat thrisãs fradaxshanyâish haptathô zrâdhô ashtemô kûiris nâumô paiti-dânô dasemô sâravârô aêvañdasô kamara dvadasô rânapô.
10: vîspe zaya vâstryô fshuyãs nerebyô ashavabyô ashaya vanghuya urune cithîm nisirinuyât ýaêshãm zayanãm vâstryehe fshuyañtô aêsha ýuyô-semi ayazhâna paiti-darezâna gavâzishta gavâzô asmana hâvana ýâvarenem zgeresnô-vakhdhanem
11: kãstrem paitish-herezem verezayañtem hakeret erezatem hakeret zaranim, dâtare ... cvat ýavat erezatem, âat mraot ahurô mazdå, ýatha aspahe arshnô pereska, dâtare ... cvat ýavat zaranim, âat mraot ahurô mazdå, ýatha ushtrahe arshnô pereska.
12: vaidhîm taci-apãm nerebyô ashavabyô ashaya vanghuya urune cithîm nisirinuyât, dâtare ... cvat ýavat vaidhîm, âat mraot ahurô mazdå, spâ-barezem spâ-frathem.
13: zãm karshyãm raodhayãm nerebyô ashavabyô ashaya vanghuya urune cithîm nisirinuyât, dâtare ... cvat ýavat zå, âat mraot ahurô mazdå, ýavat aêsha âfsh byârixti upa-thwarshti frabavât.
14: nmânem gâvayanem nava-hâthrem nava-nematem nerebyô ashavabyô ashaya vanghuya urune cithîm nisirinuyât, dâtare ... cvat ýavat nmânem, âat mraot ahurô mazdå, dvadasa vîtâra upema nava vîtâra madhema xshvash vîtâra nitema gâtu hvaini staretu mat barezisha nerebyô ashavabyô ashaya vanghuya urune cithîm nisirinuyât.
15: kanyãm askeñdãm anupayatãm nerebyô ashavabyô ashaya vanghuya urune cithîm nisirinuyât, dâtare ... kâ ýâ kaine, âat mraot ahurô mazdå, hvangha vâ dukhdha vâ nâmêni mat gaoshâvare pasca pañca-dasîm saredhem nerebyô ashavabyô nâirithwana upa-vâdhayaêta.
16: bish hapta pasvô anumaya nerebyô ashavabyô ashaya vanghuya urune cithîm nisirinuyât, bish hapta puthrãm gadhwãm uzjâmôit bish hapta peshavô fraoirisyôit tarasca âpô nâvayå.
17: duye navaiti astanãm adhâityô- angharethranãm dâitîm ahmâicit harethrem kerenuyât duye navaiti gadhwãm pairi- ýaozhdaithîta stiptibyasca anâiritibyasca vyanguraêibyasca vîspaêibyasca pairi acishtaêibyô ýôi gadhwãm pairi-bavaiti, duye navaiti narãm ashaonãm vâstryaêta gêush vâ hvarethahe vâ hurayå vâ madhush vâ.
18: hâ hê asti citha hâ hê asti âperetish aipi-pâremnâi idha ashaone nôit anaipi-pâremnâi drujô nmâne haithyâ anghen astayô! ashem vohû...!!

Fargard 15.

1: caiti tâ shyaothna varshta ýâ anghush astvå verezyeiti fraêta apatita anuzvarshta ainghat haca shyaothnâvareza atha bavaiñti peshô-tanva.
2: âat mraot ahurô mazdå, pañca ashâum zarathushtra, paoirîm aêtaêshãm shyaothnanãm ýôi vereziñti mashyâka ýô narem ashavanem anyô-varenâi vâ anyô-tkaêshâi vâ kasyanghe sanghâi dadhâiti vîdhvå avat hava xrathwa parâiti ainghat haca shyaothnâvareza atha bavaiñti peshô-tanva.
3: bitîm aêtaêshãm shyaothnanãm ýôi vereziñti mashyâka ýô sûne ýim pasush-haurve vâ vish-haurve vâ astanãm ahmarshtanãm dadhâiti garemanãm vâ hvarethanãm,
4: ýezica aête asti dâtâhva aråñte garemôhva vîdhåñte ýat vâ aête garema hvaretha stamanem vâ hizvãm vâ apa-dazhat ahmat haca irishyât ýezi tat paiti irishyeiti ainghat haca shyaothnâvareza atha bavaiñti peshô-tanva.
5: thritîm aêtaêshãm shyaothnanãm ýôi vereziñti mashyâka ýô gadhwãm ýãm aputhrãm janaiti vâ vayeiti vâ xraosyeiti vâ pazdayeiti vâ.
6: ýezica aêsha gadhwa maêkhe vâ câiti vâ vaêmi vâ urûidhi vâ apô vâ nâvayå paidhyâite ahmat haca irishyât ýezi tat paiti irishyeiti ainghat haca shyaothnâvareza atha bavaiñti peshô-tanva.
7: tûirîm aêtaêshãm shyaothnanãm ýôi vereziñti mashyâka ýô nâirikãm cithravaitîm daxshtavaitîm vohunavaitîm xshudrå avi frangherezaiti ainghat haca shyaothnâvareza atha bavaiñti peshô-tanva.
8: puxdhem aêtaêshãm shyaothnanãm ýôi vereziñti mashyâka ýô nâirikãm ýãm aputhrãm pipyûshîm vâ apipyûshîm vâ anasaxtãm para xshudrå avi frangherezaiti ahmat haca irishyât ýezi tat paiti irishyeiti ainghat haca shyaothnâvareza atha bavaiñti peshô-tanva!
9: ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti mâ-nô aêsha ýâ kaine mashyânãm parô fsharemât tarô daxshtem pârayât tarô apemca urvarãmca.
10: ýezica aêsha ýâ kaine mashyânãm parô fsharemât tarô daxshtem parâiti tarô apemca urvarãmca aêtahmâyush paiti varshta shyaothna.
11: ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti mâ-nô aêsha ýâ kaine mashyânãm parô fsharemât hvatô garewem raêshayât.
12: ýezica aêsha ýâ kaine mashyânãm parô fsharemât hvatô garewem irishyeiti pterebyô âstryeiti pterebyô irishyeiti pterebyô irishiñtãm raêshê cikaên baodhô- varshtahe cithaya.
13: ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti ýezica vaocât aêsha ýâ kaine, puthrem aêm narô varshta ýezica vaocât aêshô nâ hanãm aêtaêshãm jîjishanguha peresanguha
14: aêtadha aêsha ýâ kaine hanãm aêtaêshãm jîjishâiti peresâiti aêsha hana frabaraiti banghem vâ shaêtem vâ khnânem vâ fraspâtem vâ kãmcit vâ vîtâcinanãm urvaranãm, aêtahmât puthrât mimarexshanguha aêtadha aêsha ýâ kaine aêtahmât puthrât mimarxshâite havañta aêtahe shyaothnahe verezyãn nâca kainica hanâca.
15: ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti vîspem â ahmât thrâthrem kerenavât ýat aêsha ýô aperenâyûkô uzjasât.
16: ýezi nôit harethrem baraiti aêtadha aêsha ýô aperenâyûkô adhâityô-angharethrem irishyât para hê irishiñtô raêshem cikayat baodhô-varshtahe cithaya.
17: dâtare ... ýezi tat frajasât añtare sairi varezâne kahmât mazdayasnanãm harethrem barât,
18: âat mraot ahurô mazdå, ýô kainînem upâiti stâtô-ratûm vâ astâtô-ratûm vâ paradâtãm vâ aparadâtãm vâ vîspem â ahmât thrâthrem kerenavât ýat aêsha ýô aperenâyûkô uzjasât.
19: ýezi nôit harethrem baraiti aêtadha hê vîspå hâirishîsh frâshnaoiti bipaitishtanaca cathware-paitishtanaca [aêsha bipaitishtâna ýâ kaine aêsha cathware- paitishtâna ýâ gadhwa.]
20: dâtare ... ýezi tat frajasât añtare sairi varezâne kahmât mazdayasnanãm harethrem barât.
21: âat mraot ahurô mazdå, ýô hê anghat nazdishtem nmânem uzdasta aêtahmâyush paiti harethrem vîspem â ahmât thrâthrem kerenavât ýat aête ýôi spâna uzjasãn.
22: ýezi nôit harethrem baraiti aêtadha aête ýôi spâna adhâityô-angharethrem irishyãn para aêshãm irishiñtãm raêshê cikaên baodhô-varshtahe cithaya.
23: dâtare ... ýezica aêsha gadhwa ushtrô- stânaêshva frajasât kahmât mazdayasnanãm harethrem barât.
24-25: âat mraot ahurô mazdå, ýô aêtem ushtrô-stânem uzdasta ýenghå vô aêshô ushtrô-stânish anghat aêtahmâyush paiti harethrem vîspem â ahmât....
26: dâtare ... ýezica aêsha gadhwa aspô- stânaêshva frajasât kahmât mazdayasnanãm harethrem barât.
27-28: âat mraot ahurô mazdå, ýô aêtem aspô-stânem uzdasta ýenghå vô aêshô aspô-stânish anghat aêtahmâyush paiti harethrem vîspem â ahmât....
29: dâtare ... ýezica aêsha gadhwa gavô- stânaêshva frajasât kahmât mazdayasnanãm harethrem barât.
30-31: âat mraot ahurô mazdå, ýô aêtem gavô-stânem uzdasta ýenghå vô aêshô gavô-stânish anghat aêtahmâyush paiti harethrem vîspem â ahmât....
32: dâtare ... ýezica aêsha gadhwa pasush- hastaêshva frajasât kahmât mazdayasnanãm harethrem barât.
33-34: âat mraot ahurô mazdå, ýô aêtem pasush-hastem uzdasta ýenghå vô aêshô pasush-hastish anghat aêtahmâyush paiti harethrem vîspem â ahmât....
35: dâtare ... ýezica aêsha gadhwa uzdaêzaêshva frajasât kahmât mazdayasnanãm harethrem barât.
36-37: âat mraot ahurô mazdå, ýô aêtem uzdaêzem uzdishta ýenghå vô aêshô uzdaêzish anghat aêtahmâyush paiti harethrem vîspem â ahmât....
38: dâtare ... ýezica aêsha gadhwa avakañtaêshva frajasât kahmât mazdayasnanãm harethrem barât.
39: âat mraot ahurô mazdå, ýô aêtem avakanem avakañta ýenghå vô aêshô avakanish anghat aêtahmâyush paiti harethrem vîspem â ahmât thrâthrem kerenavât ýat aête ýôi spâna uzjasãn.
40: ýezi nôit harethrem baraiti aêtadha aête ýôi spâna adhâityô-angharethrem irishyãn para aêshãm irishiñtãm raêshê cikaên baodhô-varshtahe cithaya.
41: dâtare ... ýezica aêsha gadhwa avi madheme vâ vâstre vâ frajasât kahmât mazdayasnanãm harethrem barât.
42: âat mraot ahurô mazdå, ýô aêtem vâstri uzdasta ýenghå vô aêshô vâstrish anghat aêtahmâyush paiti harethrem,
43: upâca hê gâtûm barayen nemô vañtâhva kãmcit vâ staretaêshinãm vîspem â ahmât thrâthrem kerenavât ýat aête ýôi spâna hvâ-zaênem hvâ-draonem bavãn.
44: dâtare ... katha aête spâna hvâ-zaênem hvâ-draonem bavãn.
45: âat mraot ahurô mazdå, ýavat aête spâna bish hapta nmâna pairi tacahi bavãn, vasô pascaêta fraxshtâite aiwi-gâme itha hama, xshvash månghô sûnô thrâthrem hapta saredha aperenâyûkahe âthrô ahurahe mazdå puthrem avatha nâirikayâi!
46: dâtare ... ashâum ýezi vasen mazdayasna jvô-daxshtem maêthmanem kutha tê verezyãn aête ýôi mazdayasna.
47: âat mraot ahurô mazdå, aêtadha hê aête mazdayasna ainghå zemô ava-kanem ava-kanayen maidhyôi pasush-hastaêshva maidhyôi paitishtâne xrûzhdisme maidhyôi narsh varedusme.
48: paoiryâi nidarezayen aperenâyûkem avatha âtrem ahurahe mazdå puthrem vîspem â ahmât thrâthrem kerenavât ýavat aêshô spâ anya jasô aiwica aparem patica aparem apâca paurvaêibya nôit dim avatha irishyãn.
49: ýô gadhwãm ýãm aputhrãm thrayãm bâuzdri barethrica puthrâca paêmainica ayatâca taêca aêtadhaca puthrem baraiti sûnãm bâuzdri.
50: dâtare ... ýô gadhwãm jaiñti ýãm aputhrãm thrayãm bâuzdri barethrica puthrâca paêmainica ayatâca taêca aêtadhaca puthrem baraiti sûnãm bâuzdri kâ hê asti citha.
51: âat mraot ahurô mazdå, hapta sata upâzananãm upâzôit aspahe ashtraya hapta sata sraoshô-caranaya!
ashem vohû...!!

Fargard 16.

1: dâtare gaêthanãm astvaitinãm ashâum ýat ahmi nmâne ýat mâzdayasnôish nâirika cithravaiti daxshtavaiti vohunavaiti nishhidhât kutha tê verezyãn aête ýôi mazdayasna.
2: âat mraot ahurô mazdå, aêtadha hê aête mazdayasna pañta vîcinaêta pairi urvarâbyasca varedhâbyasca aêsmaêibyô hiku pãsnu gâtu nidhayaêta fratara haca nmâna verezyãn ýat vâ naêmem ýat vâ thrishum ýat vâ cathrushum ýat vâ pangtanghum ýezi nôit nâirika âtrem aiwi- vaênât ýezi nôit nâirika âthre raoxshnãn paiti-didhyât.
3: dâtare ... cvat drâjô haca âthrat cvat drâjô haca apat cvat drâjô haca baresmen frastairyât cvat drâjô haca nerebyô ashavabyô.
4: âat mraot ahurô mazdå, pañca-dasa-gâim haca âthrat pañca-dasa-gâim haca apat pañca-dasa-gâim haca baresmen frastairyât thrigâim haca nerebyô ashavabyô.
5: dâtare ... cvat drâjô ava-hishtât aêsha ýô nâirikayå cithravaityå daxshtavaityå vohunavaityå hvarethem frabarât.
6: âat mraot ahurô mazdå, thrigâim ava-hishtât aêsha ýô nâirikayå cithravaityå daxshtavaityå vohunavaityå hvarethem frabarât cinem hvarethem frabarât cinem ýaom frabarât ayanghaênem vâ srum vâ nitema xshathra vairya.
7: cvat hvarethem frabarât cvat ýaom frabarât, dva danare tâyûirinãm aêva danare xshaodrinãm ýezi nôit nâirika niuruidhyât, ýezi aperenâyûkô frâshnavât zasta hê paoirîm frasnâdhayen aêtahe ýat aperenâyûkahe ahe havayåse tanvô.
8: ýezi nâirika vohunîsh aiwi-vaênât ýat hê thrâyô xshafna sacåñte airime gâtûm hê nishhidhaêta vîspem â ahmât ýat hê cathwârô xshafna sacåñte, ýezi nâirika vohunîsh aiwi-vaênât ýat hê cathwârô xshafna sacåñte airime gâtûm hê nishhidhaêta vîspem â ahmât ýat hê pañca xshafna sacåñte.
9: ýezi nâirika vohunîsh aiwi-vaênât ýat hê pañca xshafna sacåñte airime gâtûm hê nishhidhaêta vîspem â ahmât ýat hê xshvash xshafna sacåñte, ýezi nâirika vohunîsh aiwi-vaênât ýat hê xshvash xshafna sacåñte airime gâtûm hê nishhidhaêta vîspem â ahmât ýat hê hapta xshafna sacåñte.
10: ýezi nâirika vohunîsh aiwi-vaênât ýat hê hapta xshafna sacåñte airime gâtûm hê nishhidhaêta vîspem â ahmât ýat hê ashta xshafna sacåñte, ýezi nâirika vohunîsh aiwi-vaênât ýat hê ashta xshafna sacåñte airime gâtûm hê nishhidhaêta vîspem â ahmât ýat hê nava xshafna sacåñte.
11: ýezi nâirika vohunîsh aiwi-vaênât ýat hê nava xshafna sacåñte âat hê paityârem ava-bareñti daêva daêvanãm ýasnâica vahmâica, aêtadha hê aête mazdayasna pañta vîcinaêta pairi urvarâbyasca varedhâbyasca aêsmaêibyô.
12: aêtadha hê aête mazdayasna ainghå zemô thrish makhem ava-kanayen dva makha frasnâdhayen maêsmana gêush ôyum âpô xrafstrem ava-janaêta maoirîm dânô-karshem ýat vâ hama duye saite kahyâcit angrô-mainyavanãm xrafstranãm ava-janyât ýat vâ aête zaêna.
13: aêtahe ýat mazdayasnahe aêtayå nâirikayå cithravaityå daxshtavaityå vohunavaityå daxshtem uzverezyât kâ hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
14: dâtare ... ýô nâirikayå cithravaityå daxshtavaityå vohunavaityå paurvô vasna shyaothna tanûm irithyât ýat hê cithra daxshtem bavaiti ýat hê daxshta cithrem bavaiti kâ hê asti citha.
15: âat mraot ahurô mazdå, paoiryâi upaêta paoiryâi nishasta thrisatem upâzananãm upâzôit aspahe ashtraya thrisatem sraoshô-caranaya, bityâi upaêta bityâi nishasta pañcâsatem upâzananãm upâzôit aspahe ashtraya pañcâsatem sraoshô-caranaya, thrityâi upaêta thrityâi nishasta haptâitîm upâzananãm upâzôit aspahe ashtraya haptâitîm sraoshô-caranaya.
16: [tûiryâi upaêta tûiryâi nishasta ýim añtare vastrem frajasât ýim añtare âhitem rânem frajasât afrangharezât pairi xshudrât kâ hê asti citha, âat mraot ahurô mazdå, navaitîm upâzananãm upâzôit aspahe ashtraya navaitîm sraoshô-caranaya.]
17: ýô nâirikãm cithravaitîm daxshtavaitîm vohunavaitîm xshudrå avi frangherezaiti nôit vanghô ahmât shyaothnem verezyeiti ýadhôit puthrahe hvâzâtahe frâ naêzem nasûm pacât paiti ûthem barât.
18: vîspe drvañtô tanu-drujô ýô aderetô tkaêshô vîspe aderetô-tkaêshô ýô asraoshô vîspe asraoshô ýô anashavanô vîspe anashavanô ýô tanu-perethô! ashem vohû...!!

Fargard 17.

1.: peresat zarathushtrô ahurem mazdãm, ahura mazda ... ashâum kem aojishta mahrka mashyâka daêvô aoshô ýazâite.
2.: âat mraot ahurô mazdå, hâu bâ ashâum zarathushtra ýô aêtahmi anghvô ýat astvaiñti varesåsca hãm-râzayeiti varesåsca pairi-brîneñti srvaêca upa-thwereseñti atha dim upa-taoshayeiñti ûnâhva dim raêshayaca.
3.: âat âhva vyarethâhva zemô daêva hãm-bavaiñti âat âhva vyarethâhva zemô xrafstra hãm-bavaiñti ýim mashyâka spish nãma aojaite ýim mashyâka ýaom ýavô-hva nizhgangheñti vastra vastrâhva.
4.: âat ýat tûm zarathushtra aêtahmi anghvô ýat astvaiñti varesåsca hãm-râzayanguha varesåsca pairi-brînanguha srvaêca upa-thweresanguha, âat tûm pascaêta apa-barôish dasa-gâim haca nerebyô ashavabyô vîsata-gâim haca âthrat thrisata-gâim haca apat pañcâsata-gâim haca baresmen frastairyât.
5.: âat athra makhem ava-kanôish dîshtîm xrûzhdisme vîtastîm varedusme paiti dim âbarôish atha imã vacô framruyå vârethrakhnîsh zarathushtra, at ah'yâi ashâ mazdå urvarå vaxshat.
6.: xshathrâi vairyâi pairi-karem pairi-kârayôish tishrô ýat vâ xshvash ýat vâ nava ahunemca vairîm frasrâvayôish tishrô ýat vâ xshvash ýat vâ nava.
7.: srvâbya makhem ava-kanôish nishtara-naêmât nmânahe avat aipi ýatha kasishtahe erezvô fratemem tbishish, paiti dim âbarôish atha imã vacô framruyå vârethrakhnîsh zarathushtra, ashâ vohû mananghâ ýâ sruyê parê magaonô.
8.: xshathrâi vairyâi pairi-karem pairi-kârayôish tishrô ýat vâ xshvash ýat vâ nava ahunemca vairîm frasrâvayôish tishrô ýat vâ xshvash ýat vâ nava.
9.: paiti tê merekha ashô-zushta imå srvå vaêdhayemi imå srvå âvaêdhayemi imåse-tê srvå merekha ashô- zushta hyâre arshtayasca karetayasca thanvareca ishavasca erezifyô-parena asanasca fradaxshanya paiti daêvô mâzanyãn.
10.: ýezi nôit paiti-vaêdhayeiñti tå srvå pascaêta bun mâzainyanãm daêvanãm arshtayasca karetayasca thanvareca ishavasca erezifyô-parena asanasca fradaxshanya paiti daêvô mâzanyãn.
11.: vîspe drvañtô tanu-drujô ýô aderetô-tkaêshô vîspe aderetô-tkaêshô ýô asraoshô vîspe asraoshô ýô anashavanô vîspe anashavanô ýô tanu-perethô! ashem vohû...!!

Fargard 18.

1.: paravô zî mashyâka uiti mraot ahurô mazdå âi ashâum zarathushtra paiti-dânem ainîm baraiti anaiwyâstô daênãm diwzhat haca âthrava sanghaite,
mâ dim mruyå âthravanem
uiti mraot ahurô mazdå
âi ashâum zarathushtra.
2.: xrafstrakhnem ainîm baraiti anaiwyâstô daênãm diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
3.: urvarãm ainîm baraiti anaiwyâstô daênãm diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
4.: ashtrãm mairîm kâshayeiti anaiwyâstô daênãm diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
5.: ýô saête haurvãm tarasca xshapanem ayazemnô asrâvayô amarô everezyô asixshô asâcayô jayâi cinvat- ushtânem diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
6.: tem dim mruyå âthravanem
uiti mraot ahurô mazdå
âi ashâum zarathushtra
ýô haurvãm tarasca xshapanem
xratûm peresât ashavanem ãzô-bûjim ravazdãm cinvat-peretûm havanghô-dãm ahu-nâsem asha-nâsem vahishta-nâsem vahishtahe anghêush!
7.: paiti mãm erezvô peresanguha
ýim dadhvånghem spênishtemca vaêdhishtemca paiti-vacishtemca parshtem
avatha tê anghat vanghô
avatha anghâi spanyå
ýezi mãm paiti-peresånghe.
8.: peresat zarathushtrô ahurem mazdãm, ahura ... ashâum kâ asti ithyejå marshaonô.
9.: âat mraot ahurô mazdå, akha daêna disyât spitama zarathushtra ýô thrizaremaêm ratûm aiwyånghãm nôit aiwyâsti nôit gâthå srâvayeiti nôit âpô vanguhîsh ýazaiti.
10.: ýasca mê aêtem narem ãzô avi ava-gereptem ravôhu paiti uzbârayat nôit vanghô ahmât shyaothnem verezyeiti ýatha ýat hê pãstô-frathanghem kameredhem kerenuyât.
11.: aêvahe zî ashaokhahe akhahe anashaonô zânu- drâjå asti âfritish dvayå hizu-drâjå thrayãm naêdha-cish cathwârô hvatô zavañte.
12.: ýô aêvahe ashaokhahe akhahe anashaonô haomahe hutahe dadhâiti usefritinãm vâ myezdinãm nôit vanghô ahmât shyaothnem verezyeiti ýatha ýat hazangrô-aspãm haênãm avazôit mâzdayasnîsh avi vîsô janyât nerêsh para gãm azôit varetãm!
13.: paiti mãm erezvô peresanguha ýim dadhvånghem spênishtemca vaêdhishtemca paiti-vacishtemca parshtem avatha tê anghat vanghô avatha anghâi spanyå ýezi mãm paiti-peresånghe.
14.: peresat zarathushtrô ahurem mazdãm, ahura mazda mainyô spênishta dâtare gaêthanãm astvaitinãm ashâum kô asti sraoshahe ashyehe taxmahe tanumãthrahe darshi-draosh âhûiryehe sraoshâvarezô.
15.: âat mraot ahurô mazdå, merekhô ýô parô-darsh nãma spitama zarathushtra ýim mashyâka avi duzhvacanghô kahrkatâs nãma aojaite âat hô merekhô vâcim baraiti upa ushånghem ýãm sûrãm,
16.: usehishtata mashyâka staota ashem ýat vahishtem nîsta daêva aêsha vô dvaraiti bûshyãsta darekhô-gava hâ vîspem ahûm astvañtem hakat raocanghãm frakhrâtô nihvabdayeiti, hvafsa darekhô mashyâka nôit tê sacaite.
17.: mâ thrayãm vahishtanãm aiwithyô buyata humataheca mananghô hûxtaheca vacanghô hvarshtaheca shyaothnahe thrayãm acishtanãm aiwithyô buyata dushmataheca mananghô duzhûxtaheca vacanghô duzhvarshtaheca shyaothnahe.
18.: âat mê paoiryâi thrishvâi xshafne âtarsh ahurahe mazdå nmânahe nmânô-paitîm ýâsaiti,
19.: avainghe nmânahe nmânô-paite usehishta aiwi vastra ýånghayanguha frâ zasta snayanguha â aêsmã ýâsanguha avi mãm bara paiti mãm raocaya aêsmanãm ýaozhdâtanãm frasnâtaêibya zastaêibya ava mê âzish daêvô-dâtô parôit pairithnem anghvãm ava-derenãn sadayeiti.
20.: âat mê bityâi thrishvâi xshafne âtarsh ahurahe mazdå vâstrîm fshuyañtem ýâsaiti,
21.: avainghe fshuya vâstrya usehishta aiwi vastra ýånghayanguha frâ zasta snayanguha â aêsmã ýâsanguha avi mãm bara paiti mãm raocaya aêsmanãm ýaozhdâtanãm frasnâtaêibya zastaêibya ava mê âzish daêvô-dâtô parôit pairithnem anghvãm ava-derenãn sadayeiti.
22.: âat mê thrityâi thrishvâi xshafne âtarsh ahurahe mazdå sraoshem ashîm ýâsaiti, avainghe âi sraosha ashya huraodha âat mãm kemcit anghêush astvatô aêsmanãm paiti baraiti ýaozhdâtanãm frasnâtaêibya zastaêibya ava mê âzish daêvô-dâtô parôit pairithnem anghvãm ava-derenãn sadayeiti.
23.: âat hô sraoshô ashyô aom merekhem frakhrârayeiti parô-darsh nãma spitama zarathushtra ýim mashyâka avi duzhvacanghô kahrkatâs nãma aojaite, âat hô merekhô vâcim baraiti upa ushånghem ýãm sûrãm,
24.: usehishtata mashyâka staota ashem ýat vahishtem nîsta daêva aêsha vô dvaraiti bûshyãsta darekhô-gava hâ vîspem ahûm astvañtem hakat raocanghãm frakhrâtô nihvabdayeiti, hvafsa darekhô mashyâka nôit tê sacaite.
25.: mâ thrayãm vahishtanãm aiwithyô buyata humataheca mananghô hûxtaheca vacanghô hvarshtaheca shyaothnahe thrayãm acishtanãm aiwithyô buyata dushmataheca mananghô duzhûxtaheca vacanghô duzhvarshtaheca shyaothnahe.
26.: âat aoshete haxa hasha ana barezish sayamnanãm, usehishta-tû vyârayeite mãm ýatârô paurvô usehishtaiti parâiti vahishtahe anghêush ýatârô paurvô âthre ahurahe mazdå aêsmanãm paiti-baraiti ýaozhdâtanãm frasnâtaêibya zastaêibya ahmâi âtarsh âfrînât xshnûtô adhbishtô hakhdhanghum,
27.: upa thwâ haxshôit gêush vãthwa
upa vîranãm pouru-tâs
upa thwâ verezvatca manô
verezvatica haxshôit anguha
urvâxsh-anguha gaya jikhaêsha
tå xshapanô ýå jvâhi,
imat âthrô âfrivanem
ýô ahmâi aêsmem baraiti
hikûsh raocas-pairîshtem
ashahe bereja ýaozhdâtã.
28.: ýasca mê aête merekha spitama zarathushtra mithwana strica nairyasca naire ashaone ashaya vanghuya para-dathat nmânem hô manyaêta para-dathô satô-stûnem hazangrô-frasciñbanem baêvare-mishtem baêvare-vaêdhayanem.
29.: ýasca mê aêtahe merekhahe ýat parô- darshahe tanumazô gêush dathat nôit dim ýava azem ýô ahurô mazdå bitîm vâcim paiti-peresemnô bva frasha frayâi vahishtem â ahûm â!
30.: sraoshô ashyô drujim aperesat
apayûxtât paiti vazrât,
druxsh ahvâthre everezike tûm zî aêva vîspahe anghêush astvatô anaiwyâstish hunahi.
31.: âat hê hâ paiti-davata ýâ daêvi druxsh, sraosha ashya huraodha nava azem vîspahe anghêush astvatô anaiwyâstish hunâmi heñti bâdha mâvayacit cathwârô arshâna.
32.: tê mãm avatha vereneñte
ýatha anyåscit arshânô
avi xshudrå xshathrishva hãm-verenavaiñti.
33.: sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm paoiryô.
34.: âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm paoiryô ýat nâ kasvikãmcina ýånghuyanãm avaretanãm naire ashaone jasta ashaya vanghuya nôit dadhâiti.
35.: hô mãm avatha verenûiti ýatha anyåscit arshânô avi xshudrå xshathrishva hãm-verenavaiñti.
36.: sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
37.: âat hê hâ paiti-davata ýâ daêvi druxsh, sraosha ashya huraodha aom ainghe asti uzvarezem ýat nâ kasvikãmcit ýånghuyanãm avaretanãm naire ashaone ajasta ashaya vanghuya dadhâiti.
38.: hô mãm avatha verenãn nijaiñti ýatha vehrkô cathware-zañgrô barethryât haca puthrem nizhdare-dairyât.
39.: sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm bityô.
40.: âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm bityô ýat nâ paurva frabda frabdô-drâjô framaêzaiti.
41.: hô mãm avatha verenûiti ýatha anyåscit arshânô avi xshudrå xshathrishva hãm-verenavaiñti.
42.: sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
43.: âat hê hâ paiti-davata ýâ daêvi druxsh, sraosha ashya huraodha aom ainghe asti uzvarezem ýat nâ pasca ýat usehishtât thrigâim thrish ashem upa-stuyât bish humatanãm thrish huxshathrôtemâi cathwârô adhât ahunem vairîm frasrâvayôit ýenghe hâtãm frâyazâite.
44.: hô mãm avatha verenãn nijaiñti ýatha vehrkô cathware-zañgrô barethryât haca puthrem nizhdare-dairyât.
45.: sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm thrityô.
46.: âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm thrityô ýat nâ hvaptô xshudrå frâraodhayeite.
47.: hô mãm avatha verenûiti ýatha anyåscit arshânô avi xshudrå xshathrishva hãm-verenavaiñti.
48.: sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
49.: âat hê hâ paiti-davata ýâ daêvi druxsh, sraosha ashya huraodha aom ainghe asti uzvarezem ýat nâ pasca ýat hvafnâdha frabûidhyamnô thrish ashem upa-stuyât bish humatanãm thrish huxshathrôtemâi cathwârô adhât ahunem vairîm frasrâvayôit ýenghe hâtãm frâyazâite.
50.: hô mãm avatha verenãn nijaiñti ýatha vehrkô cathware-zañgrô barethryât haca puthrem nizhdare-dairyât.
51.: âat aoshete speñtayâi ârmatêe, speñta ârmaite imem tê narem nisrinaomi imem mê narem nisrârayå upa sûrãm frashô-keretîm vîdush-gâthem vîdush-ýasnem paiti-parshtô-sravanghem mãzdrem hadha-hunarem tanu- mãthrem.
52.: âat hê nãma fradaithyå âtre- dâtem vâ âtre-cithrem vâ âtre-zañtûm vâ âtre-dah'yûm vâ kãmcit vâ âtre-dâtahe nãma.
53.: sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm tûiryô.
54.: âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm tûiryô ýat nâ jahika pasca pañcadasîm saredhem frapataiti anaiwyâsta vâ anabdâtô vâ.
55.: pasca tûirîm gâmô-beretîm ishare pascaêta vaêm ýôi daêva hakat vaêm ava-mivâmahi hizvasca pivasca, [xshayamna pascaêta merekheñte gaêthå astvaitîsh ashahe ýatha zañda ýâtumeñta mereñcîta gaêthå ashahe.]
56.: sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
57.: âat hê hâ paiti-davata ýâ daêvi druxsh, sraosha ashya huraodha naêcish ainghe asti urvarezem
58.: ýat nâ jahika pasca pañcadasîm saredhem frapataiti anaiwyâsta vâ anabdâtô vâ.
59.: pasca tûirîm gâmô-beretîm ishare pascaêta vaêm ýôi daêva hakat vaêm ava-mivâmahi hizvasca pivasca, [xshayamna pascaêta merekheñte gaêthå astvaitîsh ashahe ýatha zañda ýâtumeñta mereñcîta gaêthå ashahe!]
60.: paiti mãm erezvô peresanguha ýim dadhvånghem spênishtemca vaêdhishtemca paiti-vacishtemca parshtem avatha tê anghat vanghô avatha anghâi spanyå ýezi mãm paiti-peresånghe.
61.: peresat zarathushtrô ... ashâum kô thwãm ýim ahurem mazdãm mazishtayanti inaoiti kô mazishta tbaêshangha tbaêshayeiti.
62.: âat mraot ahurô mazdå, jahi bâ ashâum zarathushtra ýô xshudrå hãm-raêthwayeiti dahmanãm adahmanãmca daêvayasnanãm adaêvayasnanãmca tanu-perethanãm atanu-perethanãmca.
63.: thrishum apãm thraotô-stâcãm taxmanãm pairishtayeiti paiti-dîti zarathushtra thrishum urvaranãm uzuxshyeñtinãm srîranãm zairi-gaonanãm vaxshå apayasaite paiti-dîti zarathushtra.
64.: thrishum speñtayå ârmatôish varenå apayasaite paiti-dîti zarathushtra thrishum narsh ashaonô frâyô-humatahe frâyô-hûxtahe frâyô-hvarshtahe amaheca verethrakhnaheca ashavastaheca apayasaite paiti-pasti zarathushtra.
65.: tåsca tê mraomi spitama zarathushtra jãthwô-tara ýatha azhayô xshvaêwånghô ýatha vâ vehrkånghô sravanghavô ýatha vâ vehrkãm azrô-daidhîm gaêthãm avi frapataiti ýatha vâ vazakhãm hazangrô-hunãm âpem avi frapataiti!
66.: paiti mãm erezvô peresanguha ýim dadhvånghem spênishtemca vaêdhishtemca paiti-vacishtemca parshtem avatha tê anghat vanghô avatha anghâi spanyå ýezi mãm paiti-peresånghe.
67.: peresat zarathushtrô ... ashâum ýô nâirikãm cithravaitîm daxshtavaitîm vohunavaitîm baodhô vîdhvå cikithwå baodhanguhaitîm vîthushîm avi-cicithushîm xshudrå avi frangharezaiti
68.: kat ainghe asti paititish kat ainghe asti âperetish kat aêtahe paiti varshta shyaothna cicithwå azaêta.
69.: âat mraot ahurô mazdå, ýô nâirikãm cithravaitîm daxshtavaitîm vohunavaitîm baodhô vîdhvå cikithwå baodhanguhaitîm vîthushîm avi-cicithushîm xshudrå avi frangharezaiti
70.: hazangrem anumayanãm frâvinuyât vîspanãmca aêtaêshãm pasvãm asmanivå zaothra âthre ashaya vanghuya frabarôit bâzva aiwyô vanguhibyô frabarôit.
71.: hazangrem vazyanãm aêsmanãm xraozhdvanãm hushatãm pairîshtanãm âthre ashaya vanghuya frabarôit hazangrem vazyanãm aêsmanãm varedvanãm urvâsnayå vâ vohu-gaonahe vâ vohu-keretôish vâ hadhânaêpatayå vâ kãmcit vâ hubaoidhitemanãm urvaranãm âthre ashaya vanghuya frabarôit,
72.: hazangrem frasteretanãm baresmaine frastairyât hazangrem zaothranãm haomavaitinãm gaomavaitinãm ýaozhdâtanãm pairiangharshtanãm dahmô-ýaozhdâtanãm dahmô-pairiangharshtanãm hãm-irista aêtayå urvarayå ýâ vaoce hadhânaêpâta aiwyô vanguhibyô ashaya vanghuya frabarôit,
73.: hazangrem azhinãm udarô-thrãsanãm ava-janyât duye hazangre anyaêshãmcit hazangrem vazakhanãm dâdhmainyanãm ava-janyât duye hazangre upâpanãm hazangrem maoirinãm dânô-karshanãm ava-janyât duye hazangre anyaêshãmcit,
74.: thrisatem frascimbananãm frasciñbayôit tarasca âpô nâvayå hazangrem upâzananãm upâzôit aspahe ashtraya duye hazangre sraoshô-caranaya.
75.: tat ainghe asti paititish tat ainghe asti âperetish tat aêtahe paiti varshta shyaothna cicithwå azaêta.
76.: ýezi azâite tem ahûm paithyâite ýim ashaonãm ýezi nôit azâite tem ahûm paithyâite ýim drvatãm temanghaênem temascithrem temanghem! ashem vohû...!!

Vendidad: Fargard 19.

1: apâxtarat haca naêmât apâxtaraêibyô haca naêmaêibyô fradvarat angrô mainyush pouru-mahrkô daêvanãm daêvô, uiti davata hô ýô duzhdå angrô mainyush pouru- mahrkô, druxsh upa-dvâra mereñcanguha ashâum zarathushtra, druxsh hê pairi-dvarat bûiti daêvô ithyejô marshaonem davazhå.
2: zarathushtrô ahunem vairîm frasrâvayat, ýathâ ahû vairyô ... vâstârem, âpô vanguhîsh frâyazaêta vanghuyå dâityayå daênãm mâzdayasnîm fraorenaêta, druxsh hê steretô apa dvarat bûiti daêvô ithyejô marshaonem davazhå.
3: druxsh hê paiti-davata, skutara angra mainyô nôit hê aoshô pairi- vaênâmi spitamâi zarathushtrâi pouru-hvarenanghô ashava zarathushtrô, zarathushtrô mananghô pairi-vaênât, daêva mê drvañtô duzhdånghô aoshem hãm-pereseñte.
4: usehishtat zarathushtrô frashûsat zarathushtrô asaretô aka manangha xrûzhdya tbaêshô-parshtanãm asânô zasta drazhimnô katô-masanghô heñti ashava zarathushtrô viñdemnô dathushô ahurâi mazdâi, kva hê drazhahe ainghå zemô ýat pathanayå skarenayå dûraêpârayå drejya paiti zbarahi nmânahe pourushaspahe.
5: uzvaêdhayat zarathushtrô angrem mainyûm, duzhda angra mainyô janâni dãma daêvô- dâtem janâni nasush daêvô-dâtem janâni pairikãm ýãm xnãthaiti ýahmâi us-zayâite saoshyãs verethraja haca apat kãsaoyât ushastarat haca naêmât ushastaraêibyô haca naêmaêibyô.
6: paiti ahmâi adavata duzhdâmô angrô mainyush, mâ mê dãma mereñcanguha ashâum zarathushtra, tûm ahi pourushaspahe puthrô barethryât haca zâvishi apa-stavanguha vanguhîm daênãm mâzdayasnîm viñdâi ýânem ýatha viñdat vadhakhanô dainghupaitish.
7: paiti ahmâi avashata ýô spitâmô zarathushtrô, nôit hê apa-stavâne vanguhîm daênãm mâzdayasnîm nôit astaca nôit ushtânemca nôit baodhasca vîurvîsyât.
8: paiti ahmâi adavata duzhdâmô angrô mainyush, kahe vaca vanâi kahe vaca apa-ýasâi kana zaya hukeretånghô mana dãma angrô-mainyush.
9: paiti ahmâi avashata ýô spitâmô zarathushtrô, hâvanaca tashtaca haomaca vaca mazdô-fraoxta mana zaya asti vahishtem ana vaca vanâni ana vaca apa-ýasâne ana zaya hukeretånghô âi duzhda angra mainyô, dathat speñtô mainyush dathat zrûne akarane fradathen ameshå speñta huxshathra hudhånghô.
10: zarathushtrô ahunem vairîm frasrâvayat, ýathâ ahû vairyô ... vâstârem, frâmraot ashava zarathushtrô, tat thwâ peresâ arsh mê vaoca ahura.
11: peresat zarathushtrô ... ashâum drejya paiti zbarahe ahurâi mazdâi vanghave vohu-maite ånghânô ashâi vahishtâi xshathrâi vairyâi speñtayâi ârmatêe.
12: kutha hîsh azem kerenavâni haca avanghât drujat haca duzhda angra mainyô kutha hãm-raêthwem kutha paiti-raêthwem kutha nasush apayasâne haca avanghât vîsat ýat mâzdayasnôit kutha narem ashavanem ýaozhdathâni kutha nâirikãm ashaonîm ýaozhdâthrem barâni.
13: âat mraot ahurô mazdå, nizbayanguha tû zarathushtra vanguhîm daênãm mâzdayasnîm nizbayanguha tû zarathushtra avaên ameshå speñta avi haptô- karshvairîm zãm nizbayanguha tû zarathushtra thwâshahe hvadhâtahe zrvânahe akaranahe vayaosh uparô-kairyehe nizbayanguha tû zarathushtra vâtô taxmô mazdadhâtô speñta srîra dukhdha ahurahe mazdå,
14: nizbayanguha tû zarathushtra fravashish mana ýat ahurahe mazdå avãm ýãm mazishtãmca vahishtãmca sraêshtãmca xraozhdishtãmca xrathwishtãmca hukereptemãmca ashât apanôtemãmca ýenghe urva mãthrô speñtô, hvatô nizbayanguha zarathushtra imat dãma ýat ahurahe mazdå.
15: vaxshem mê asãsat zarathushtrô, nizbayemi ahurô mazdå ashava dãma dâtem nizbayemi mithrem vouru-gaoyaoitîm huzaênem hvarenanguhastemem zayanãm verethravastemem zayanãm nizbayemi sraoshem ashîm huraodhem snaithish zastaya drazhimnô kameredhe paiti daêvanãm.
16: nizbayemi mãthrô speñtô ýô ash-hvarenå nizbayemi thwâshahe hvadhâtahe zrvânahe akaranahe vayaosh uparô-kairyehe nizbayemi vâtô taxmô mazdadhâtô speñta srîra dukhdha ahurahe mazdå nizbayemi vanguhîm daênãm mâzdayasnîm dâtem vîdôyûm zarathushtra!
17: peresat zarathushtrô ahurem mazdãm, dâtô vanghen ahura mazda kana ýasna ýazâne kana ýasna frâyazâne imat dãma ýat ahurahe mazdå.
18: âat mraot ahurô mazdå, urvaranãm uruthmyanãm ava-jasâhi spitama zarathushtra srîra urusta amavaiti imat vacô framrû, nemô urvaire vanguhi mazdadhâte ashaone ashem vohû vahishtem astî...(1).
19: baresma hê uzbârayat aêshô-drâjô ýavô-frathô mâ hê baresma pairi-keretem pairi-kereñtîsh narô anghen ashavanô hâvôya zasta nyâsemnô ýazemnô ahurem mazdãm ýazemnô ameshê speñtê haomasca zâirish berezô srîråsca vohu manô râtaca vanguhi mazdadhâta ashaone vahishtô.
20: peresat zarathushtrô ahurem mazdãm, vîspô-vîdhvå ahura mazda ahvafnô ahi abanghô tûm ýô ahurô mazdå, vohu manô hãm-raêthwayeiti vohu manô paiti- raêthwayeiti haca avanghât tanvat ýat daêvô-jatayå daêva hãm-raêthwayeiti bvat vohu manô ýaozhdâtô.
21: âat mraot ahurô mazdå, gaomaêzem ayasôit zarathushtra gaom pairi uxshânem bixedhrem dâityô-keretem ýaozhdâta frabarôish zãm paiti ahuradhâtãm pairi-karshem pairi-karshôit aêshô nâ ýô ýaozhdâthryô.
22: satem ashô-stûitinãm upastvôish bizhvat ahunem vairîm frasrâvayôish, catura frasnana frasnayôit gaomaêzem gava dâtayå bish âpem mazdadhâtayå.
23: ýaozhdâta bun vohu manô ýaozhdâta bun mashyô uzgeurvayât vohu manô hâvôya bâzvô dashinaca dashina bâzvô hâvayaca, âat vohu manô nidaidhîsh sûrô-thwarshtanãm raocanghãm ýat hê stârãm bakhô-dâtanãm aiwi raocayåñte vîspem â ahmât ýat hê nava xshafna sacåñte.
24: âat pasca nava-xshaparât âthre zaothrå frabarôish xrûzhdranãm aêsmanãm âthre frabarôish vohu-gaonanãm baoidhinãm âthre frabarôish vohu manô â-baodhayaêta.
25: ýaozhdâta bun vohu manô ýaozhdâta bun mashyô uzgeurvayât vohu manô hâvôya bâzvô dashinaca dashina bâzvô haoyaca fravaocat vohu manô, nemô ahurâi mazdâi nemô ameshaêibyô speñtaêibyô nemô anyaêshãm ashaonãm!
26: peresat zarathushtrô ahurem mazdãm, vîspô-vîdhvå ahura mazda haxshâne narem ashavanem haxshâne nâirikãm ashaonîm haxshâne drvatãm daêvayasnanãm merezujîtîm mashyânãm zãm ahuradhâtãm nipârayañta âpem taciñtãm ýavanãm uruthmãm anyãm hê avaretãm nipârayañta, âat mraot ahurô mazdå, haxshaêsha ashâum zarathushtra.
27: dâtare ... dva tâ dâthra bavaiñti dva tâ dâthra pârayeiñti dva tâ dâthra pairi-bavaiñti dva tâ dâthra paiti hañjaseñti mashyô astvaiñti anghvô havâi urune para-daidhyât.
28: âat mraot ahurô mazdå, pasca para-iristahe mashyehe pasca frasaxtahe mashyehe pasca pairithnem dereniñti daêva drvañtô duzhdånghô, thrityå xshapô vîusaiti ushi raocaiti bâmya gairinãm ashahvâthranãm âsenaoiti mithrem huzaênem hvarexshaêtem uzyôraiti,
29: vîzareshô daêvô nãma spitama zarathushtra urvânem bastem vâdhayeiti drvatãm daêvayasnanãm merezujîtîm mashyânãm, pathãm zrvô-dâtanãm jasaiti ýasca drvaite ýasca ashaone cinvat-peretûm mazdadhâtãm baodhasca urvânemca ýâtem gaêthanãm paiti-jaidhyeiñti dâtem astvaiñti anghvô.
30: hâu srîra kereta taxma huraodha jasaiti spânavaiti nivavaiti pasvaiti ýaoxshtavaiti hunaravaiti, [hâ drvatãm akhem urvânô temô-hva nizarshaite,] hâ ashâunãm urvânô tarasca harãm berezaitîm âsenaoiti tarô cinvatô peretûm vîdhârayeiti haêtô mainyavanãm ýazatanãm.
31: usehishtat vohu manô haca gâtvô zaranyô- keretô fravaocat vohu manô, kadha-nô idha ashâum agatô ithyejanghatat haca anghaot aithyajanghem ahûm â.
32: xshnûtô ashaonãm urvânô pârayeiñti avi ahurahe mazdå avi ameshanãm speñtanãm avi gâtvô zaranyô- keretô avi garô nmânem maêthanem ahurahe mazdå maêthanem ameshanãm speñtanãm maêthanem anyaêshãm ashaonãm.
33: ýaozhdâthryô ashava pasca para-iristîm daêva drvañtô duzhdånghô baodhem avatha fratereseñti ýatha maêshi vehrkavaiti vehrkat haca frataresaiti.
34: narô ashavanô hãm-bavaiñti nairyô sanghô hãm-bavaiti ashtô mazdå ahurahe mrûidhi nairyô sanghô, hvatô nizbayanguha zarathushtra imat dãma ýat ahurahe mazdå.
35: vaxshem mê asãsat zarathushtrô, nizbayemi ahurô mazdå ashava dâmi-dâtem nizbayemi zãm ahuradhâtãm âpem mazdadhâtãm urvarãm ashaonîm nizbayemi zrayô vourukashem nizbayemi asmanem hvanvañtem nizbayemi anakhra raocå hvadhâtå.
36: nizbayemi vahishtem ahûm ashaonãm raocanghem vîspô-hvâthrem nizbayemi garô nmânem maêthanem ahurahe mazdå maêthanem ameshanãm speñtanãm maêthanem anyaêshãm ashaonãm nizbayemi misvânahe gâtvahe hvadhâtahe cinvat-peretûm mazdadhâtãm.
37: nizbayemi saokãm vanguhîm vouru-dôithrãm nizbayemi ukhrå ashâunãm fravashayô vîspå dâmãn savanguhaitish nizbayemi verethrakhnem ahuradhâtem barô-hvarenô mazdadhâtem nizbayemi tishtrîm stârem raêvañtem hvarenanguhañtem gêush kehrpa zaranyô-sravahe.
38: nizbayemi gâthâbyô speñtâbyô ratuxshathrâbyô ashaonibyô nizbayemi ahunavaityå gâthayå nizbayemi ushtavaityå gâthayå nizbayemi speñtâ-mainyêush gâthayå nizbayemi vohuxshathrayå gâthayå nizbayemi vahishtôishtôish gâthayå.
39: nizbayemi avat karshvare ýat arezahe savahe nizbayemi avat karshvare ýat fradadhafshu vîdadhafshu nizbayemi avat karshvare ýat vouru-bareshti vouru-jareshti nizbayemi imat karshvare ýat hvanirathem bâmîm nizbayemi haêtumeñtem raêvañtem hvarenanguhañtem nizbayemi ashôish vanghuyå [cistôish vanghuyå] nizbayemi razishtayå cistayå nizbayemi hvarenô airyanãm dah'yunãm nizbayemi hvarenô ýimâi xshaêtâi hvãthwâi.
40: ýashtô xshnûtô frithô paiti- zañtô sraoshô ashyô huraodhô verethraja sraoshô ashyô, âthre zaothrå frabarôish xrûzhdranãm aêsmanãm âthre frabarôish vohu-gaonanãm baoidhinãm âthre frabarôish âtrem vâzishtem frâyazaêsha daêum janem speñjakhrîm, hvâsta hvarethå frabarôish perenãm vikhzhârayeiñtîm.
41: sraoshô ashyô frâyazaêsha, sraoshô ashyô daêum kuñdem banghem vîbanghem ava-janyât drujaskanãm hãm-pataiti drvatãm daêvayasnanãm merezujîtîm mashyânãm [nazdishtå dainghâvô ýaozhdâthryât haca frakaire frakerenaot vâstre verezyôit pasush-hvarethem gave hvarethem].
42: nizbayemi karô masyô upâpô bûne jafranãm vairyanãm nizbayemi merezu pourvô-hvadhâtô ýûidhishtô mainivå dâmãn nizbayemi hapta sravô bâmya hvånghô puthrånghô pusånghô bavaiñti.
43: fradavata vîdavata
framanyata vîmanyata
angrô mainyush pouru-mahrkô daêvanãm daêvô iñdrô daêvô saoru daêvô nånghaithem daêvô taurvi zairica aêshemem xrvî-drûm akatashem daêum zyãm daêvô-dâtem ithyejô marshaonem zaurva duzhdãfedhrô kerenaoiti, bûiti daêvô driwish daêvô daiwish daêvô kasvîsh daêvô paitishô daêvô daêvanãm daêvôtemô.
44: daêvô uiti davata hô ýô duzhdå angrô mainyush pouru-mahrkô, cim hãm-beretha hãm-bârayama daêva drvañtô duzhdånghô arezûrahe paiti kameredhem.
45: advareñta adâuñta
daêva drvañtô duzhdånghô
urutheñta adâuñta
daêva drvañtô duzhdånghô
akhãm daothrîm dâuñta
daêva drvañtô duzhdånghô, imem nô hãm-beretha hãm-bârayama arezûrahe paiti kameredhem.
46: zâtô bê ýô ashava zarathushtrô nmânahe pourushaspahe kva hê aoshô viñdâma hâu daêvanãm snathô hâu daêvanãm paityârô hâu druxsh vîdruxsh, nyåñcô daêvayâzô nasush daêvô-dâtô draogô mithaoxtô.
47: adâuñta advareñta daêva drvañtô duzhdånghô bûnem anghêush temanghahe ýat erekhatô daozhanguhahe!
ashem vohû...!!

Fargard 20.

1: peresat zarathushtrô ... ashâum kô paoiryô mashyânãm thamnanguhatãm varecanguhatãm ýaoxshtivatãm ýâtumatãm raêvatãm taxmanãm paradhâtãm ýaskem ýaskâi dârayat mahrkem mahrkâi dârayat vazemnô-arshti dârayat âthrô tafnush dârayat tanaot haca mashyehe.
2: âat mraot ahurô mazdå, thritô paoiryô spitama zarathushtra mashyânãm thamnanguhatãm varecanguhatãm ýaoxshtivatãm ýâtumatãm raêvatãm taxmanãm paradhâtãm ýaskem ýaskâi dârayat mahrkem mahrkâi dârayat vazemnô-arshti dârayat âthrô tafnush dârayat tanaot haca mashyehe.
3: vishcithrem dim ayasata
âyapta xshathra vairya paitishtâtêe ýaskahe paitishtâtêe mahrkahe paitishtâtêe dâzhu paitishtâtêe tafnu paitishtâtêe sâranahe paitishtâtêe sârastyehe paitishtâtêe azhanahe paitishtâtêe azhahvahe paitishtâtêe kurukhahe paitishtâtêe azhivâkahe paitishtâtêe drukahe paitishtâtêe astairyehe paitishtâtêe akhashyå pûityå âhityå ýâ angrô mainyush frâkereñtat avi imãm tanûm ýãm mashyânãm.
4: adha azem ýô ahurô mazdå urvarå baêshazyå uzbarem paoirîsh pouru-satå paoirîsh pouru-hazangrå paoirîsh pouru- baêvanô ôyum gaokerenem pairi.
5: tat vîspem frînâmahi tat vîspem fraêshyâmahi tat vîspem nemah'yâmahi avi imãm tanûm ýãm mashyânãm
6: paitishtâtêe ýaskahe paitishtâtêe mahrkahe paitishtâtêe dâzhu paitishtâtêe tafnu paitishtâtêe sâranahe paitishtâtêe sârastyehe paitishtâtêe azhanahe paitishtâtêe azhahvahe paitishtâtêe kurukhahe paitishtâtêe azhivâkahe paitishtâtêe drukahe paitishtâtêe astairyehe paitishtâtêe akhashyå pûityå âhityå ýâ angrô mainyush frâkereñtat avi imãm tanûm ýãm mashyânãm.
7: ýaskem thwãm paiti-sanghâmi mahrkem thwãm paiti-sanghâmi dâzhu thwãm paiti-sanghâmi tafnu thwãm paiti-sanghâmi sâranahe thwãm paiti-sanghâmi sârastyehe thwãm paiti-sanghâmi azhanahe thwãm paiti-sanghâmi azhahvahe thwãm paiti-sanghâmi kurukhahe thwãm paiti-sanghâmi azhivâkahe thwãm paiti-sanghâmi drukahe thwãm paiti-sanghâmi astairyehe thwãm paiti-sanghâmi akhashe thwãm paiti-sanghâmi.
8: ýenghe vareda vanaêma drujim druje vareda vanaêma ýenghe xshathrem aojonghvat maibyô ahura.
9: paiti-perene ashire paiti-perene akhûire paiti-perene akhrãm paiti-perene ukhrãm paiti-perene ýaskahe paiti-perene mahrkahe paiti-perene dâzhu paiti-perene tafnu paiti-perene sâranahe paiti-perene sârastyehe paiti-perene azhanahe paiti-perene azhahvahe paiti-perene kurukhahe paiti-perene azhivâkahe paiti-perene drukahe paiti-perene astairyehe paiti-perene akhashyå pûityå âhityå ýâ angrô mainyush frâkereñtat avi imãm tanûm ýãm mashyânãm.
10: paiti-perene vîspem ýaskemca mahrkemca vîspe ýâtavô pairikåsca vîspå janyô ýå drvaitîsh.
11: â airyêmâ ishyô rafedhrâi jañtû nerebyascâ nâiribyascâ zarathushtrahe vanghêush rafedhrâi mananghô ýâ daênâ vairîm hanât mîzhdem ashahyâ ýâsâ ashîm ýãm ishyãm ahurô masatâ mazdå.
12: jañtu â-airyêmâ-ishyô vîspem ýaskemca mahrkemca vîspe ýâtavô pairikåsca vîspå janyô ýå drvaitîsh.
13-14: ýathâ ahû vairyô ... mâmereñcainîsh gaêthå astvaitîsh ashahe! ashem vohû...!!

Fargard 21.

1: nemase-tê gaospeñta nemase-tê gaosh hudå nemase-tê frâdheñte nemase-tê varedheñte nemase-tê dâthrô baxtem vahishtâi ashaone anazãthâi ashaone ýâ jahi mereñcaite ashemaokhô anashava mashyasca drvå sâsta.
2: ýayata dunma ýayata frâ-âpem nyâpem upa-âpem hazangrô-vârayô baêvare-vârascit mruyå ashâum zarathushtra, ýaskahe apanashtahe mahrkahe apanashtahe jaini-ýaskahe apanashtahe jaini-mahrkahe apanashtahe gadhahe apa-gadhahe apanashtahe.
3: ýezi uzîrô-hva mereñcaite arezahva bishazyât ýezi arezahva mereñcaite xshapô-hva bishazyât ýezi xshapô- hva mereñcaite ushahva bishazyât vî-vâreñti vî-vârâhu nava âfsh nava zå nava urvarå nava baêshazå navata baêshaza-kesha.
4: ýatha zrayô vouru-kashem apô asti hañjakhmanem usihishta hãm-ýaêtånghô ýaonemca avi zãmca zãmca avi ýaonemca usihishta pâiri-haêzanguha ýehe zãthaêca vaxshaêca ýaonem dadhât ahurô mazdå!
5: uzayara uzîra hvarexshaêta aurvat-aspa tarasca harãm berezaitîm raoxshnem kerenavâhi dâmahva temcit uzîra
ýezi ahi garô deretem
mazdadhâtem paiti pañtãm
bakhô-baxtem paiti ýaonem
frathwarshtem paiti âfeñtem.
6: [âat ana parô dush-kereta] âat ana parô mãthrô speñtô, frâ-tê zãthemca vaxshathemca azem idha frasnayeni frâ tê kehrpemca tevîshîmca ýaozhdathâni kerenaomi thwãm hacat-puthrãm hacat-paêmanyãm.
7: kâravaiti paêmavaiti xshviptavaiti raokhnavaiti mazgavaiti frazaiñtivaiti frâ-tê hazangrem xãm azem idha frasnayeni gaodhanem avi hañtacinå ýat asti puthrahe thrimô.
8: ýatha zrayô ... ýehe zãthaêca vaxshaêca zãm dadhât ahurô mazdå!
9: uzayara uzîra mångha gaocithra tarasca harãm berezaitîm raoxshnem kerenavâhi dâmahva temcit uzîra ýezi ahi garô deretem mazdadhâtem paiti pañtãm bakhô-baxtem paiti ýaonem frathwarshtem paiti âfeñtem.
10: [âat ana parô dush-kereta] âat ana parô mãthrô speñtô, frâ-tê zãthemca vaxshathemca azem idha frasnayeni frâ-tê kehrpemca tevîshîmca ýaozhdathâni kerenaomi thwãm hacat-puthrãm hacat-paêmanyãm.
11: kâravaiti paêmavaiti xshviptavaiti raokhnavaiti mazgavaiti frazaiñtivaiti frâ-tê hazangrem xãm azem idha frasnayeni gaodhanem avi hañtacinå ýat asti puthrahe thrimô.
12: ýatha zrayô vourukashem apô asti hañjakhmanem usihishta hãm-ýaêtånghô ýaonemca avi zãmca zãmca avi ýaonemca usihishta pâiri-haêzanguha ýehe zãthaêca vaxshaêca vaxshem dadhât ahurô mazdå.
13: uzayara uzîra stâra gufra afshcithrånghô tarasca harãm berezaitîm raoxshnem kerenavâhi dâmahva temcit uzîra ýezi ahi garô deretem mazdadhâtem paiti pañtãm bakhô-baxtem paiti ýaonem frathwarshtem paiti âfeñtem.
14: [âat ana parô dush-kereta] âat ana parô mãthrô speñtô, frâ-tê zãthemca vaxshathemca azem idha frasnayeni frâ-tê kehrpemca tevîshîmca ýaozhdathâni kerenaomi thwãm hacat-puthrãm hacat-paêmanyãm.
15: kâravaiti paêmavaiti xshviptavaiti raokhnavaiti mazgavaiti frazaiñtivaiti frâ-tê hazangrem xãm azem idha frasnayeni gaodhanem avi hañtacinå ýat asti puthrahe thrimô.
16: ýatha zrayô vourukashem apô asti hañjakhmanem usihishta hãm-ýaêtånghô ýaonemca avi zãmca zãmca avi ýaonemca usihishta pâiri-haêzanguha ýehe zãthaêca vaxshaêca uzayarem dadhât ahurô mazdå!
17: uzayara uzîra paxrushta hî kaxuzhi paxrushta hî ayehye paxrushta hî ýâtumaiti jahi.
18-23: paiti-perene ashire ... astvaitîsh ashahe!
ashem vohû...!!

Fargard 22.

1: mraot ahurô mazdå spitamâi zarathushtrâi,
azem ýô ahurô mazdå
azem ýô dâta vanghvãm
ýase-tat nmânem âkerenem srîrem raoxshnem frâderesrem
uzayeni pârayeni.
2: âat mãm mairyô âkasat
âat mãm mairyô frâkerenaot
angrô mainyush pouru-mahrkô navaca ýaskê navaitishca navaca sata navaca hazangra navasêsca baêvãn âat mãm tûm bishazyôish mãthrô speñtô ýô ash-hvarenå.
3: dathâni tê aêtahe paiti hakat hazangrem aspanãm aurvatô derezi-takanãm ýazâi saoka vanguhi mazdadhâta ashaoni, dathâni tê aêtahe paiti hakat hazangrem ushtranãm urvatô saêni-kaofanãm ýazâi saoka vanguhi mazdadhâta ashaoni.
4: dathâni tê aêtahe paiti hakat hazangrem gavãm axshaênanãm aperetô-tanunãm ýazâi saoka vanguhi mazdadhâta ashaoni, dathâni tê aêtahe paiti hakat hazangrem anumayanãm haretô vîspô-gaonanãm ýazâi saoka vanguhi mazdadhâta ashaoni.
5: uta tê azem âfrînâni srîra dahma âfriti fritha dahma âfriti
ýâ ûnem perenem kerenaoiti
perenemcit vîkhzhârayeiti
avañtemcit bañdayeiti
bañtemca drûm kerenaoiti.
6: paiti ahmâi avashata
mãthrô speñtô ýô ash-hvarenå, kutha tê azem bishazâni kutha tê azem apa-varâni navaca ýaskê navaitishca navaca sata navaca hazangra navasêsca baêvãn.
7: nairyô sanghô aocayata
ýô dadhvå ahurô mazdå,
nairya sangha vyâxana
para-âidhi upa-vazanguha
avi nmânem airyamaini
imat sanghôish airyamanâi,
8: imat tê sanghat ahurô mazdå ashava, azem ýô ahurô mazdå azem ýô dâta vanghvãm ýase-tat nmânem âkerenem srîrem raoxshnem frâderesrem uzayeni pârayeni,
9: âat mãm mairyô âkasat âat mãm mairyô frâkerenaot angrô mainyush pouru-mahrkô navaca ýaskê navaitishca navaca sata navaca hazangra navasêsca baêvãn âat mãm tûm bishazyôish airyama ýô ishyô.
10-12: dathâni ... kerenaoiti.
13: ahe vacô paityesti
para-âidhi upa-vazata
nairyô sanghô vyâxanô
avi nmânem airyamaini
imat sanghat airyamanâi,
14-18: imat tê sanghat ahurô mazdå ashava, azem ýô ahurô mazdå ... kerenaoiti.
19: moshu tat âs nôit darekhem ýat frâyatayat thwaxshemnô airyama ýô ishyô
gairîm avi speñtô-frasnå
vareshem avi speñtô-frasnå.
20: navanãm aspanãm arshnãm gaonem barat airyama ýô ishyô navanãm ushtranãm arshnãm gaonem barat airyama ýô ishyô navanãm gavãm arshnãm gaonem barat airyama ýô ishyô navanãm anumayanãm arshnãm gaonem barat airyama ýô ishyô nava vaêtayô barat nava karshå frakârayat.
21-26: paiti-perene ashire ... ashahe!
ashem vohû...!!
!---!---!---!---! nâismî daêvô, aêvô pañtå ýô ashahe vîspe anyaêshãm apeñtãm!
---!-------!
-------!

Avesta -- Zoroastrian Archives

Contents

Vendidad

English

Glossary