Avesta

Khorda Avesta

9. Drvasp Yasht

Based on edition of Karl F. Geldner, Avesta, the Sacred Books of the Parsis, Stuttgart, 1896.

0.

(pa nãm i ýazdã, hôrmezd i hvadâe i awazûnî gurz hvarahe awazâyât,
gêush urve darvâsp hvarahe bê rasât,
ezh hamâ gunâh ... pa patit hôm!)
xshnaothra ahurahe mazdå , tarôidîti angrahe mainyêush, haithyâvarshtãm hyat vasnâ ferashôtemem. staomî ashem,
ashem vohû...(3).
fravarâne mazdayasnô zarathushtrish vîdaêvô ahura-tkaêshô,

(Here recite the appropriate Gah dedication.)

drvâspayå sûrayå mazdadhâtayå ashaonyå
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!

1.

drvâspãm sûrãm mazdadhâtãm ashaonîm ýazamaide drvô-pasvãm drvô-staorãm drvô-urvathãm drvô- aperenâyukãm pouru-spaxshti dûrât pithana hvâthravana darekhô-haxedhrayana

2.

ýuxta-aspãm varetô-rathãm
hvanat-caxrãm fshaonîm marezãm amavaitîm huraodhãm hvâsaokãm baêshazyãm drvô-stâitîm drvô- varetãm
avanghe narãm ashaonãm.

3.

tãm ýazata
haoshyanghô paradhâtô
upa upa-bdi harayå berezô
srîrayå mazdadhâtayå satem aspanãm hazangrem gavãm baêvare anumayanãm uta zaothrãm frabarô,

4.

dazdi-mê vanguhi sevishte
drvâspe tat âyaptem
ýat bavâni aiwi-vanyå
vîspe daêva mâzanya
ýatha azem nôit tarshtô frâ-nmâne
thwaêshât parô daêvaêibyô
frâ ahmât parô vîspe daêva
anusô tarshta nemåñte
tarshta temanghô dvâråñte.

5.

dathat ahmâi tat avat âyaptem drvâspa sûra mazdadhâta ashaoni thrâthri zaothrô-barâi aredrâi ýazemnâi
jaidhyañtâi dâthrish âyaptem.

6.

ahe raya hvarenanghaca
tãm ýazâi surunvata ýasna
tãm ýazâi huyashta ýasna
drvâspãm sûrãm mazdadhâtãm ashaonîm zaothrâbyô,
drvâspãm sûrãm mazdadhâtãm ashaonîm ýazamaide
haomayô gava baresmana, hizvô danghangha mãthraca, vacaca shyaothnaca zaothrâbyasca, arshuxdhaêibyasca vâkhzhibyô.
ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide!

7.

drvâspãm ... avanghe narãm ashaonãm. (Repeat verses 1-2.)

8.

tãm ýazata
ýô ýimô xshaêtô hvãthwô
hukairyât haca barezanghat satem aspanãm hazangrem gavãm baêvare anumayanãm uta zaothrãm frabarô,

9.

dazdi-mê vanguhi sevishte
drvâspe tat âyaptem
ýatha azem fshaoni vãthwa
ava-barâni avi mazdå dâmabyô
ýatha azem amerextîm
avi-barâni avi mazdå dâmabyô,

10.

uta azem apa-barâni
va shudhemca tarshnemca
haca mazdå dâmabyô
uta azem apa-barâni
va zaourvãmca merethyûmca
haca mazdå dâmabyô
uta azem apa-barâni
va garememca vâtem aotemca
haca mazdå dâmabyô
hazangrem aiwi-gâmanãm.

11.

dathat ahmâi tat avat âyaptem drvâspa sûra mazdadhâta ashaoni thrâthri zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide! (Repeat verse 6.)

12.

drvâspãm ... avanghe narãm ashaonãm. (Repeat verses 1-2.)

13.

tãm ýazata
vîsô puthrô âthwyânôish
vîsô sûrayå thraêtaonô
upa varenem cathru-gaoshem satem aspanãm hazangrem gavãm baêvare anumayanãm uta zaothrãm frabarô,

14.

dazdi-mê vanguhi sevishte
drvâspe tat âyaptem
ýat bavâni aiwi-vanyå azhîm dahâkem thrizafanem thrikameredhem xshvash-ashîm hazangrâ-ýaoxshtîm ashaojanghem daêvîm drujem akhem gaêthâvyô drvañtem ýãm ashaojastemãm drujem fraca kereñtat angrô mainyush aoi ýãm astvaitîm gaêthãm mahrkâi ashahe gaêthanãm,
uta-hê vañta azâni
sanghavâci arenavâci
ýôi hen kehrpa sraêshta zazâtêe
gaêthyâi tê ýôi abdôteme.

15.

dathat ahmâi ... tåscâ ýazamaide! (Repeat verses 5-6).

16.

drvâspãm ... avanghe narãm ashaonãm. (Repeat verses 1-2.)

17.

tãm ýazata
haomô frâshmish baêshazyô
srîrô xshathryô zairi-dôithrô
barezishte paiti barezahi
haraithyô paiti barezayå, âat hîm jaidhyat avat âyaptem,

18.

dazdi-mê vanguhi sevishte
drvâspe tat âyaptem
ýatha azem bañdayeni
mairîm tûirîm frangrasyânem
uta bastem vâdhayeni
uta bastem upanayeni bastem kavôish haosravanghahe
janât tem kava haosrava
pasne varôish caêcastahe
jafrahe uruyâpahe
puthrô kaêna syâvarshânâi
zûrô-jatahe narahe
akhraêrathaheca naravahe.

19.

dathat ahmâi ... tåscâ ýazamaide! (Repeat verses 5-6.)

20.

drvâspãm ... avanghe narãm ashaonãm. (Repeat verses 1-2.)

21.

tãm ýazata
arsha airyanãm dah'yunãm
xshathrâi hañkeremô haosrava
pasne varôish caêcastahe
jafrahe urvyâpahe satem aspanãm hazangrem gavãm baêvare anumayanãm uta zaothrãm frabarô,

22.

dazdi-mê vanguhi sevishte
drvâspe tat âyaptem
ýatha azem nijanâni
mairîm tûirîm frangrasyânem
pasne varôish caêcastahe
jafrahe urvyâpahe
puthrô kaêna syâvarshânâi
zûrô-jatahe narahe akhraêrathaheca naravahe.

23.

dathat ahmâi ... tåscâ ýazamaide! (Repeat verses 5-6.)

24.

drvâspãm ... avanghe narãm ashaonãm. (Repeat verses 1-2.)

25.

tãm ýazata
ýô ashava zarathushtrô airyene vaêjahi vanghuyå dâityayå
haomayô gava baresmana, hizvô danghangha mãthraca, vacaca shyaothnaca zaothrâbyasca, arshuxdhaêibyasca vâkhzhibyô, âat hîm jaidhyat avat âyaptem,

26.

dazdi-mê vanguhi sevishte
drvâspe tat âyaptem
ýatha azem hâcayene
vanguhîm âzâtãm hutaosãm
anumatêe daênayâi
anûxtêe daênayâi
anu-varshtêe daênayâi
ýâ-mê daênãm mâzdayasnîm
zrasca dât apica aotât
ýâ-mê varezânâi vanguhîm dât frasastîm.

27.

dathat ahmâi ... tåscâ ýazamaide! (Repeat verses 5-6.)

28.

drvâspãm ... avanghe narãm ashaonãm. (Repeat verses 1-2.)

29.

tãm ýazata
berezaidhish kava vîshtâspô
pasne âpô dâityayå satem aspanãm hazangrem gavãm baêvare anumayanãm uta zaothrãm frabarô,

30.

dazdi-mê vanguhi sevishte
drvâspe tat âyaptem
ýatha azâni peshana ashta aurvañtô vîspa-thaurvô ashtôish puthrô vîspa-thaurvô urvi-xaodhô urvi-verethrô stvî-manaothrish ýenghe hapta sata ushtranãm jainyâvarat pasca hvîdhahe, ýatha azâni peshana mairyehe h'yaonahe arejat-aspahe, ýatha azâni peshana darshinikahe daêvayasnahe.

31.

uta azem nijanâni
tãthryâvañtem duzhdaênem
uta azem nijanâi
spinjaurushem daêvayasnem,
uta azem fraourvaêsayeni
humaya varedhakanãmca
h'yaonya haca dainghâvô,
uta azem nijanâni
h'yaonînãm dah'yunãm
pañcasakhnâi satakhnâishca
satakhnâi hazangrakhnâishca
hazangrakhnâi baêvarekhnâishca
baêvarekhnâi ahãxshtakhnâishca.

32.

dathat ahmâi tãm avat âyaptem drvâspa sûra mazdadhâta ashaoni thrâthri zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide! (Repeat verse 6.)

(Recite silently:)

33.

(hôrmezd i hvadâe i awazûnî mardum mardum sardagã hamâ sardagã ham bâ ýasht i vahã vaem vahe dîn i mâzdayasnã âgâhî âstvãnî nêkî rasãnât êduñ bât.)

(Recite aloud:)

ýathâ ahû vairyô...(2).
ýasnemca vahmemca aojasca zavareca âfrînâmi
drvâspayå sûrayå mazdadhâtayå ashaonyå.
ashem vohû....
ahmâi raêshca ... hazangrem ... jasa-mê ... (kerba mazhd) ... ashem vohû...!!