4. Hordad Yasht

Based on edition of Karl F. Geldner, Avesta, the Sacred Books of the Parsis, Stuttgart, 1896. Gld gives name as 'Awerdad Yasht'.

0.

(pa nãm i ýazdã, hôrmezd i hvadâe i awazûnî gurz hvarahe awazâyât, awerdât ameshâspeñd bê rasât,
ezh hamâ gunâh ... pa patit hôm!)
xshnaothra ahurahe mazdå, tarôidîti angrahe mainyêush, haithyâvarshtãm hyat vasnâ ferashôtemem. staomî ashem,
ashem vohû...(3).
fravarâne mazdayasnô zarathushtrish vîdaêvô ahura-tkaêshô,

(Here recite the appropriate Gah dedication.)

haurvatâtô rathwô ýâiryayå hushitôish saredhaêibyô ashahe ratubyô
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!

1.

mraot ahurô mazdå spitamâi zarathushtrâi, azem dadhãm haurvatâtô narãm ashaonãm avåsca rafnåsca baoshnåsca hvîtåsca avôi fraca ýaoxmaide ýô-tê jasâiti ameshanãm speñtanãm ýatha jasâiti ameshanãm speñtanãm vohû manô ashem vahishtem xshathrem vairîm speñtãm ârmaitîm haurvatåsca ameretatåsca.

2.

ýô aêshãm daêvanãm hazangrâi hazangrô paitish baêvarâi baêvanô ahãxshtâi ahãxshtayô paitish nâmêni ameshanãm speñtanãm haurvatâtô zbayôit nasûm janat hashi janat khashi janat saêne janat bûji janat.

3.

âat paoirîm framraomi narem ashavanem imat rashnvô razishta imat ameshaêibyô speñtaêibyô ýô asti mainyavanãm ýazatanãm rayô-nâmanå tå bûjat narem ashavanem haca nasûm haca hashi haca khashi haca saêne haca bûji haca haênayå perethu- ainikayå haca drafshayå perethu-uzgereptayå haca mashyâi drvaityâi sâstayâi haca ustrâi vairyâi haca narô sâstayâi haca ýâtâi haca pairikâi haca urusta.

4.

kutha para ashaonãm patha urvashaiti kutha drvatãm, âat mraot ahurô mazdå, ýezi-mê mãthrem framrava marå-vâ dreñjayå-vâ frâ-vâ mrava karshâim kârayeiti haom tanûm guzaêta,

5.

kãmcit thwãmca drujemca
haithyô-ayanãm heñtîm kãmcit vâ aipyaênãm heñtîm kãmcit vâ raêthwanãm
kãmcit thwãmca drujemca
airyâbyô pâdhaêibyô janâni
thwãmca drujemca bañdâmi
thwãmca drujemca nikhne
thwãmca drujemca nizhbarem adhairi-naêmemca.

6.

thri-karshem frakârayeiti frâ-mraomi narem ashavanem, xshvash-karshem frakârayeiti xshvash frâ-mraomi narem ashavanem, nava-karshem frakârayeiti nava frâ-mraomi narem ashavanem.

7.

nâmêni aêshãm drujinãm
nasûm-kereta paiti janaiti
jata karapanô cithrîm
jâmâca meretô saoca
ýê zaota zarathushtrô
erekhatat haca daozhavât
hvãm anu ushtîm zaoshemca
ýatha kathaca-hê zaoshô.

8.

pasca hû frâshmô-dâitîm
apâxedhra-naêmem janaiti
pasca hvô nôit uzuxshyamnô
nasûm sterethwata snaithisha vîxrûmañtem maire nâshaite
mainyavanãm ýazatanãm
xshnaothrâica frasastayaêca.

9.

zarathushtra aêtem mãthrem
mâ fradaxshayô anyât
pithre vâ puthrâi brâthre vâ hadhô- zâtâi
âthravanâi vâ thrâyaone
haosraogaonô hudaênô
ýô hudaênô ashava aurvô
vîspa kareshô râdhayeiti!

10.

ahe raya hvarenanghaca
tem ýazâi surunvata ýasna haurvatâtem ameshem speñtem zaothrâbyô, haurvatâtem ameshem speñtem ýazamaide

haomayô gava baresmana, hizvô danghangha mãthraca, vacaca shyaothnaca zaothrâbyasca, arshuxdhaêibyasca vâkhzhibyô.
ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide.

(Recite silently:)

(hôrmezd i hvadâe i awazûnî mardum mardum sardagã hamâ sardagã ham bâ ýasht i vahã vaem vahe dîn i mâzdayasnã âgâhî âstvãnî nêkî rasãnât êduñ bât.)

(Recite aloud:)

11.

ýathâ ahû vairyô...(2).
ýasnemca vahmemca aojasca zavareca âfrînâmi haurvatâtô rathwô ýâiryayå hushitôish saredhaêibyô ashahe ratubyô.
ashem vohû....

atha jamyât ýatha âfrînâmi.
ashem vohû...!!

ahmâi raêshca ... hazangrem ... (kerba mazhd) ... ashem vohû...!!